Lâm Đồng dang ei đei 16.000 ha mắc ca, iŏk đei 34% akŏm đĭ đăng teh pơtăm mắc ca lơ̆m teh đak, pơhlom plei ‘long sơnăm 2025 đei dang 13.700 tân, iŏk yoa jô̆ păh lăp đơ̆ng 100 - 300 triu hlak jên 1 ha 1 sơnăm kiơ̆ đơ̆ng trong jang xa. Vă mắc ca jing 1 lơ̆m dôm tơmam pơtăm tơm hơnhăk ba iŏk yoa lơ ăn dêh char, Lâm Đông oei bơ̆ jang kiơ̆ trong chĕng hơmet tơring pơtăm, hơtŏk teh pơtăm mắc ca lơ̆m dêh char truh sơnăm 2030 truh 37.000ha, plei phĕ đei truh 48.000 tân, kơsô̆ plei đei pơm hơmet ‘lơ̆ng hlŏh 90%.

Kiơ̆ ƀok Nguyễn Hà Lộc, Phŏ Kơdră Anih vei lăng choh jang xa păng cham char dêh char Lâm Đồng, kŭm hăm dôm kơloăi ‘long pơtăm nai, mắc ca oei tŏk nhen thoi 1 kơloăi ‘long đei lơ tơdrong ‘lơ̆ng tơ̆ dêh char. Vă jang đei dôm tơdrong nhen hlôi tơlĕch, ‘ngoăih kơ pơm hơtŏk tơdrong ‘lơ̆ng ăn ‘long pơtăm, hơtŏk tơdrong pơm tơlĕch tơmam tơmam đơ̆ng plei mắc ca kiơ̆ trong jang hơdoi, dêh char oei năng kăl truh trong jang tŏk kiơ̆ trong choh jang xa hăm kơmăy kơmŏk ‘nao păng jang kiơ̆ kơmăy pơm tơmam ‘lơ̆ng vă pơm hơtŏk kơjă ăn tơmam, tơgŭm ăn tơdrong jang xa kiơ̆ trong kơjăp ‘lơ̆ng.