Ƀar Tơdrong jang đei akŏm kơsô̆ jên tơmơ̆t jang vă jê̆ 60.000 ti hlak jên. Pơma tơ̆ hop akŏm, Kơdră Anih vei lăng kon pơlei dêh chăr Lâm Đồng Hồ Văn Mười pơma hơdăh, tơdrong pơjao hla ar tơchơ̆t tơdrong jang tơmơ̆t jên jang ƀlep lơ̆m ‘măng tơbăt Năr pơjing Đảng Cộng sản Việt Nam đei tơdrong ‘lơ̆ng gĭt kăl, tơƀôh hơnăp jang chĕp kơ̆l đơ̆ng Đảng lơ̆m trong vă jang hơtŏk tơiung mŭk drăm - tơpôl, lơ̆m noh kơmăy kơmŏk sir iŏk păng kơmăy kơmŏk nhôm vei hơnăp jang gĭt kăl.

Kơdră Anih vei lăng kon pơlei dêh char lăng ‘lơ̆ng tơdrong kơchăng, khŏm jang đơ̆ng TKV, hơdai hăm athei rim anih jang, tơring jang hơdai kơjăp, pơm kơđeh khei ‘năr hơmet pơ ‘lơ̆ng hla ar, vei sơđơ̆ng iŏk teh păng ăn kon pơlei oei tơ̆ plei hle ƀlep trong jang.