Tơ̆ Hop akŏm, lơ bơngai tang măt pơma hơdăh, atŏk tơiung choh jang xa rơgŏh ưh lăp trong jang ưh gơ̆h veh tơ̆ hơnăp tŏ ‘mi kial oei tơplih đĕch, mă oei jing tơdrong ‘lơ̆ng vă pơm hơtŏk kơjă tơmam đơ̆ng choh jang xa đei păng vei lăng cham char. Hăm dêh char đei hlŏh 1,36 triu hect-a teh păng lơ tơdrong ‘lơ̆ng găh choh jang xa nhen Đắk Lắk, choh jang xa rơgŏh, jang hơdoi kơjăp ‘lơ̆ng jĭ tơdrong tôch gĭt kăl.

Tiến sĩ Trần Ngọc Thanh – Kơdră Anih tơchĕng hơlen găh Choh jang xa păng atŏk tơiung tơring tơrang akhan, choh jang xa rơgŏh păng tơdrong đei yoa tam mă đei roi tơbăt xă, 1 păh ‘nŏh yoa dôm tơdrong tơchĕng hơlen hrei ‘nâu oei pơgơ̆r xă, tam mă chih hơdăh kiơ̆ tơring vă kon pơlei gơ̆h jang kiơ̆ hloi: “Dôm tơdrong tơchĕng hơlen găh choh jang xa hăm mơ̆r, choh jang xa hơdoi klĕp ‘lơ̆ng đunh kơ âu ‘nao lăp pơm tơƀôh atŭm atŭm đĕch. Tơdrong kon pơlei kăl đei ‘nŏh jĭ trong jang mă hơdăh vă jang kiơ̆ tơ̆ HTX păng jang xa tơpă tơ̆ yăn âu. Teh đei, mă lei trong iŏk yoa phŏng tam mă hơdăh, jing săy ưh kơ trŏ kơloăi, ưh kơ trŏ pơyan, jing huach kư̆ kă ưh đei yoa. Hơpơi ‘mĕh gô đei trong jang hrôih ƀiơ̆ păng jang kiơ̆ ƀônh hai.”

Mă tơpă đei ƀôh đơ̆ng tơdrong choh jang xa, ƀok Trần Thanh Thoảng, 1 ‘nu kon pơlei jang chŭn mir tơroi, vă gơ̆h choh jang xa rơgŏh ‘lơ̆ng... anih vei lăng athei hơtŏk tơdrong dăr lăng, vei lăng mă ‘lơ̆ng tơmam pơyoa ăn choh jang xa, mă loi ‘nŏh jĭ phŏng păng pơgang sơdrông: “Teh đak athei vei lăng mă kơjăp dôm kơloăi phŏng, pơgang sơdrông păng sek tơlang tơpăt dôm anih tĕch tơmam ya, ưh kơ ‘lơ̆ng. Kon pơlei jang chŭn mir mưh răt tơmam athei rơih răt mă trŏ tơmam ‘lơ̆ng, vă mưh jang xa kơnh gơ̆h đei yoa ‘lơ̆ng ăn ‘long pơtăm.”

Lăp đon hăm nơ̆r pơma âu, athei đei trong vang yak hơdoi ‘lơ̆ng đơ̆ng anih vei lăng vă vei lăng phŏng, pơgang sơdrông, Phŏ Kơdră Anih rei pơtăm păng vei lăng ‘long pơtăm Nguyễn Quốc Mạnh ăn tơbăt, hrei ‘nâu, Anih hlôi klăih song hơdăh 22 lơ̆m kơsô̆ 59 hla ar vei lăng ăn tơring, đei hloi dôm tơdrong hơgăt găh pơm tơlĕch, tĕch mơdro phŏng. Dôm tơring athei pơih lăng păng jang kiơ̆: “Lơ̆m khei ‘năr bơ̆ jang, pơm dôm hla ar đei ƀơm truh tơ̆ rei pơtăm, vei lăng ‘long pơtăm, tơdăh Anih vei lăng choh jang xa păng cham char Đắk Lắk tơƀâp pơmat tat, athei tơroi hloi ăn Anih tơm păng anih jang nhôn lê̆ nhôn ăn bơngai jang gơ̆h hlŏh jur tơgŭm ăn, sek tơlang ‘lơ̆ng dôm tơdrong pơm hla ar hlôi đei pơjao.”

Kŭm ƀơm truh tơdrong choh jang xa kơjăp ‘lơ̆ng mơ̆n, Anih vei lăng jang khoa hŏk, kơmăy kơmŏk păng cham char kơ Quốc hội jang hơdoi hăm Anih tơm vei lăng choh jang xa păng cham char pơgơ̆r hop akŏm “atŏk tơiung choh jang xa kơjăp ‘lơ̆ng tơklep hăm vei lăng cham char”.

Tơ̆ hop akŏm, dôm bơngai tang măt akhan: ƀât mă tŏ ‘mi kial oei tơplih roi đunh roi dêh, tơmam drăm teh đak păng cham char bri brăh roi ưh ‘lơ̆ng, cham char tơ̆ tơring tơrang păng anih choh jang xa roi kơnê̆ ‘nŏh jĭ dôm tơdrong nol mă anih choh jang xa kơ teh đak bơ̆n athei tơplih ming trong jang tŏk, đơ̆ng iŏk yoa tơmam bri brăh jing atŏk tơiung kơjăp ‘lơ̆ng, đơ̆ng ‘mĕh jang đei lơ tơmam jing jang đei tơmam ‘lơ̆ng, đei yoa păng lăp hăm cham char rơgŏh. Atŏk tơiung choh jang xa kơjăp ‘lơ̆ng ưh lăp nơ̆r athei jang kiơ̆ tơ̆ yăn âu hloi đĕch mă oei jing hơnăp jang tih đơ̆ng Việt Nam vă jang kiơ̆ nơ̆r pơkăp lơ̆m apŭng plenh teh.

Tơ̆ Hop akŏm, Phŏ Kơdră Quốc hội Lê Minh Hoan pơma hơdăh: Choh jang xa hơdoi kơjăp ‘lơ̆ng ưh kăl tơlĕch jên jang lơ đơ̆ng blŭng mă kăl đei trong jang ‘lơ̆ng. ‘Mĕh jang tŏk pran kơjăp athei bơ̆ jang đơ̆ng dôm tơdrong iĕ hlŏh, ưh đei gô chang hơmet pơ ‘lơ̆ng trong jang, đei tôm jên ‘mơ̆i na bơ̆jang, athei bơ̆ jang kiơ̆ đơ̆ng rim unh hnam, jang đei tơdrong iĕ hlŏh, truh rim kăn ƀô̆ pơtrŭt choh jangathei pơma hăm nơ̆r ƀônh hlôh hlŏh, rim anih tơchĕng hơlen athei tơlĕch trong jang đei yoa hlŏh.

Truh âu kơnh Quốc hội hơnơ̆ng hơmet ming dôm luơ̆t đei ƀơm truh vă hơmet ming dôm tơdrong oei tơhlăk găn trong, tơgŭm tơmât jên jang xa rơgŏh ‘lơ̆ng păng hơtŏk tơdrong dăr lăng mưh jang kiơ̆, pơm ‘lơ̆ng ăn tơdrong choh jang xa Việt Nam ưh lăp jang tŏk pran đĕch mă oei tơgop bơ̆ jang đei trong jang tŏk đơ̆ng teh đak truh sơnăm 2045./.