‘Nâu jĭ ‘măng mă blŭng 1 tơmam plei ‘long đei pơm ‘lơ̆ng trong jang vei lăng rơgoh ‘lơ̆ng tơmam sa drơ̆ng nơ̆r lơ̆m teh đak, đei pơđĭ hloi trong jang pơm tơlĕch đơ̆ng pơtăm, phĕ, chơ, vei lăng, tăh hơmet truh tĕch tơ̆ teh đak đe.

Kiơ̆ kơ ƀok Lê Anh Trung - Kơdră Khŭl jang Sầu riêng Đắk Lắk, trong jang vei lăng rơgoh ‘lơ̆ng tơmam sa đei tơlĕch ăn ‘măng âu ‘noh trŏ lăp hăm tơdrong tĕch tơ̆ teh đak đe sầu riêng kơ Việt Nam păng ‘meh vă đơ̆ng păih răt tơmơ̆t.

“Tơdrong hơgăt âu đei tôm trong jang pơm tơlĕch păng tĕch sầu riêng tơ̆ teh đak đe, đơ̆ng tơdrong pơtăm, răt iŏk, tăh hơmet truh tơ̆ chơ chuĕn, tĕch tơ̆ teh đak đe. Mưh bơ̆ jang kiơ̆ tôm, anih mơdro sa păng kon pơlei gơh pơm lăp đei ‘meh vă đơ̆ng dôm anih răt tơmơ̆t. ‘Nâu jĭ trong jang khôi luơ̆t gĭt kăl, tơgŭm tơmam hoei kơ đei pơ mơ̆ng tơ̆ hơnăp dôm tơdrong pơgăn ki thuơ̆t ‘nao gô đei ƀôh tơ̆ hơnăp kơnh”.

Lăng ‘lơ̆ng tơdrong hơgăt ‘nao đơ̆ng Anih tơm vei lăng găh Choh jang sa păng Cham char, ƀok Vũ Ngọc Huy - Phŏ kơdră dơnơm Kŏng ti Cổ phần tĕch mơdro hăm teh đak đe Dũng Thái Sơn - roi tơbăt, lơ anih mơdro sa hơdrol sơ̆ pơ ngơ̆t yua ưh đei pơtho. Mă lei dang ei, trong jang ‘nao hlôi pơm tơdrong hiôk trŏ luơ̆t rơđăh, tơgŭm drơ̆ng 1 nơ̆r trong jang đơ̆ng anih jang truh anih mơdro sa:

“Tơdrong athei bơngai mơdro mưh răt iŏk tơ̆ pơgar athei pơm hla ar hăm tơring dăh mă đei trong jang trŏ luơ̆t rơđăh rơđong gô tơgŭm tơdrong jang vei lăng teh đak hiôk hloh, pơm kiơ̆ dôm trong pơtho đơ̆ng tơring... ‘Noh jĭ đei ƀôh ‘lơ̆ng vă tơmam đei ‘lơ̆ng kơjăp.

Găh păih anih jang vei lăng tơring, ƀok Nguyễn Minh Huấn, Kơdră Anih vei lăng găh Choh jang sa păng Cham char dêh char Đắk Lắk roi tơbăt, anih choh jang sa băt hơdăh Tơdrong tơchơ̆t 3015 đơ̆ng Anih tơm vei lăng găh Choh jang sa păng Cham char ‘noh jĭ tơdrong ‘lơ̆ng gĭt kăl vă hơtŏk ‘lơ̆ng tơdrong vei lăng ‘lơ̆ng tơmam đơ̆ng tơm hloi. Anih jang tŏk bŏk hơdrin jang hơdai hăm rim tơring, anih mơdro sa păng khŭl jang jăh pơgơ̆r roi tơbăt, pơhrăm ăn kon pơlei jang chŭn mir, bơngai mơdro găh dôm tơdrong hơgăt ‘nao, hơdai hăm ‘noh athei rim tơring bơ̆jang kiơ̆ tơpăt trong jang dăr hơlen vei lăng sơđơ̆ng ‘lơ̆ng tơmam sa, tơchă băt anih pơm tơlĕch, vei sơđơ̆ng tơdrong rơđăh păng vei lăng ưh kơ pŭn ai đơ̆ng hrôih.

Ƀok Nguyễn Minh Huấn roi tơbăt: “Anih jang bơ̆jang hơdai hăm Anih vei lăng choh pơtăm, Anih vei lăng ‘long pơtăm păng Anih vei lăng kon pơlei rim xăh, phường hơtŏk ‘lơ̆ng đon hlôh vao găh vei lăng ‘lơ̆ng tơmam sa; hơtŏk loi dơ̆ng tơdrong jang pơtho pơtăm sầu riêng kiơ̆ pơkăp ‘lơ̆ng, hơgăt pơm lăp hăm tŏ ‘mi kial tơplih; hơtŏk loi dơ̆ng tơdrong jang hơlen lăng, dăr lăng vei rơgoh ‘lơ̆ng tơmam sa păng kơsô̆ tơring pơtăm, anih tăh hơmet sầu riêng tĕch tơ̆ teh đak đe.”

Tơdrong Anih tơm vei lăng găh Choh jang sa păng Cham char tơlĕch trong jang vei lăng rơgoh ‘lơ̆ng tơmam sa ăn plei sầu riêng, ưh khan lăp pơm lăp tơtom tơ̆ hơnăp pơkoĕl yan âu đơ̆ng anih tĕch tơlĕch tơ̆ teh đak đe, mă oei jing hơyak năm tơƀôh hơdăh trong vă jang hơtŏk ‘lơ̆ng tơmam đơ̆ng choh jang sa Việt hăm tơdrong jang trŏ luơ̆t hơdăh. Tơdrong drơ̆ng lăp ‘lơ̆ng đơ̆ng khŭl jang tơmam, tơpôl mơdro sa păng khŭl kơdră tơring ăn ƀôh tơmam Việt Nam tŏk bŏk ƀrư ƀrư̆ tơƀôh 1 trong jang hơtŏk tơiung tơpăt, kơjăp păng ‘lơ̆ng hloh.