Dang ei jơ̆p teh đak đei pơhlom 448.000 ha bri pơtăm vă iŏk tơ̆r, tŏk tenh hloh pơtêng hăm khei năr ou sơnăm sơ̆. 'Nguaih kơ noh, hlôi đei pơhlom 63.000 ha bri đei tơplih đơ̆ng bri 'long iĕ jing 'long bri iŏk tơ̆r tih, kiơ̆ đơ̆ng dôm tơdrong tơgŭm đơ̆ng Teh đak păng jang hơdoi tơ-'ngla hăm teh đak vang jang. Teh 'long bri đei pơkăp vei lăng kơjăp 'lơ̆ng đei jê̆ 943.000 ha. Mă hlôi đei hơtŏk hăm dôm pơkăp vei lăng bri kơjăp 'lơ̆ng đơ̆ng apŭng plenh teh, lơ tơnap tap hăm bơngai pơtăm bri adoi oei đei nhen jang rah rai, jên jang kăp, ưh đei tơguăt jang kiơ̆ kơjă, tơdrong vei lăng ưh đei tơnăp.

Ƀok Nguyễn Danh Hùng, Phŏ Kơdră Anih Choh jang xa păng Cham char Nghệ An ăn tơbăt: Tơring đei mŭk drăm tih tên gơnơm đei teh 'long bri să, lơ anih jang mŭk drăm jang gah tơ̆r păng dôm hơp tak xah vang jang. Mă lei, 'long bri đei pơtăm vă iŏk tơ̆r kơ Nghệ An adoi oei tŏ sĕt hăm 33.000ha. Khei năr truh, vă hơtŏk kơjă 'long bri pơtăm, dêh char Nghệ An pơtoi tơrĕk truh pơtăm 'long bri tih vă iŏk tơ̆r: “Dêh char hlôi tơlĕch pơkăp hơdah, tơring ayơ pơtăm 'long bri tih vă iŏk tơ̆r, vă sơkơ̆t chă pơtăm 'long bri, tơguăt hăm chư̆ng chi bri. Hô̆i đŏng kon pơlei dêh char adoi tơchơ̆t tơgŭm pơtăm 'long bri tih, mă athei pơtơm đơ̆ng tơm hơdrĕch…”

Tơ̆ 'măng pơma đam, lơ bơngai juăt jang, bơngai vei lăng, bơngai jang khua hŏk tơlĕch lơ trong jang vă hơtŏk tơring pơtăm 'long bri tih tơguăt hăm chư̆ng chi vei lăng bri kơjăp 'lơ̆ng đei jơnei hloh. Kiơ̆ kơ noh, dôm trong jang adoi akŏm lơ̆m keh đang pơkăp khôi luơ̆t, pơm ƀônh hla bar chư̆ng chi; asong tŏk iŏk jên, ƀao hiêm bri; tơgŭm hơdrĕch 'lơ̆ng nhen 'long keo lai mô, keo tam bội; iŏk yua trong jang kơmăi kơsô̆ lơ̆m vei lăng păng hơlen tơm a la chă; hơtŏk tơdrong tĕch răt đunh đai hăm kơjă sơđơ̆ng.

Đơ̆ng tơdrong tơguăt păng tơgŭm kih thuơ̆t, ƀok Hoàng Văn Hồng, Phŏ Kơdră Anih Pơtrŭt choh jang kơ Teh đak akhan, athei hơtŏk kơtang tơdrong pơtăm 'long bri pơkăp hăm chư̆ng chi, atŭm hăm noh hơtŏk tơguăt unh hnam kon pơlei – hơp tak xah – anih jang mŭk drăm – anih pơkăp chư̆ng chi. Kiơ̆ kơ noh, Anih pơtrŭt choh jang gô pơtoi pơm gơng tơroh, tơgŭm bơngai pơtăm 'long bri iŏk jang kiơ̆ kơmăi kơsô̆, trong pơm jang kơjăp păng tĕch tơlĕch sơđơ̆ng: “Anih Pơtrŭt choh jang kơ Teh đak pơtoi hơtŏk chă tơroi tơbăt, pơtho kih thuơ̆t ăn kon pơlei. Chih akŏm dôm tơdrong pơtrŭt choh jang xa vă kon pơlei gơh sơkơ̆t hơdah, đơ̆ng noh băt đei tơdrong tam mă 'lơ̆ng, vă pơih să dôm tơdrong pơtrŭt choh jang pơtăm 'long bri tih iŏk tơ̆r gơh kơjăp 'lơ̆ng”

Pơma đam ưh hơdrô̆ jing anih tơroi gah tơdrong juăt jang, chă trong pơklaih tơnap tap mă oei pơih trong hiôk ăn tơdrong jang hơdoi đơ̆ng rim tơring, anih jang mŭk drăm păng bơngai pơtăm 'long bri. Dôm tơdrong tơchơ̆t păng tơgŭm gah kih thuơ̆t đơ̆ng anih jang kơpal, pơgơ̆r gah hơtŏk choh jang xa gô pơjing trong 'nao vă hơtŏk teh pơtăm 'long bri tih iŏk tơ̆r tơguăt hăm chư̆ng chi kơjăp 'lơ̆ng, tơgop hơtŏk kơjă mŭk drăm, hơtŏk tơdrong pơm jang hơrih xa păng vei lăng cham char.