Truh khei ‘năr âu, jĭ klak nhŭng châu Phi hlôi đei ƀôh tơ̆ dôm jĭt xăh, phường kơ Đắk Lắk, athei soh hŭt hloh 1.000 tŏ đơ̆ng dang 100 ŭnh hnam vei rong. Yă Đặng Thị Thủy, Phŏ Kơdră Anih vei lăng găh Choh jang sa păng Cham char dêh char Đắk Lắk roi tơbăt, tơdrong vei lăng jĭ đei tŭn pran ưh khan lăp đei tơdrong ‘lơ̆ng vei lăng tơdrong jang vei rong kon tơrong, vei rơgoh ‘lơ̆ng tơmam sa mă oei tơgop tơiung ming răt yua tơmam sa:

“‘Nâu jĭ tơdrong tơm tơgŭm kon pơlei sơđơ̆ng jơhngơ̆m lơ̆m vei rong kon tơrong, kŭm nhen mưh tơmam đei tơlĕch ăn anih tĕch mơdro đơ̆ng dôm hơnih et ƀuh. Hrei ‘nâu, nhôn hơtŏk loi dơ̆ng tơdrong jang vei lăng rơgoh ‘lơ̆ng tơmam sa, vă vei sơđơ̆ng tơmam truh tơpang ti bơngai răt yua đei sơđơ̆ng, ƀlep tơdrong gơh yua. ‘Nâu jĭ đei ƀôh ‘lơ̆ng, tơgŭm bơngai răt yua sơđơ̆ng jơhngơ̆m hloh.”

Kŭm hăm vei lăng tơmơ̆t blŭng đơ̆ng khŭl jang thú y, vei sơđơ̆ng rơgoh tang găn jĭ tơ̆ hơnih ket ƀuh kŭm đei pơm kiơ̆ tơpăt, hăm tơdrong vei lăng kơjăp. Ƀok Phạm Quốc Thương - tơ ‘ngla ket ƀuh akŏm tơ̆ plei  Tân Hiệp, phường Tân An, dêh char Đắk Lắk roi tơbăt, vă tơgop tang găn jĭ klak nhŭng châu Phi, hơnih jang hlôi bơngơ̆t hloh truh tơm a đơ̆ng nhŭng:

“Đĭ đăng nhŭng tơmơ̆t lơ̆m hơnih jang tă kơ đei vei lăng tôch kơ jăp. Nhŭng răt tơmơ̆t đơ̆ng dôm hơdrong rong tă kơ đei hla ar pơm tơlĕch rơđăh rơđong, ưh kơ sĭ nhŭng răt tơmơ̆t kư̆ kă, kơna sơđơ̆ng jơhngơ̆m hăm anih tĕch mơdro truh bơngai răt yua, đei iŏk pơkăp ‘lơ̆ng hăm trong jang kơjăp đơ̆ng kang ƀô̆ thú y, kơna hơnih jang nhôn vei sơđơ̆ng ‘lơ̆ng”.

Jĭ klak nhŭng châu Phi đei ƀôh tơ̆ lơ tơring kơ dêh char Gia Lai. ‘Ngoăih kơ pơm ăn hiong răm kơtang ăn bơngai rong, jĭ kŭm ƀơm ưh kơ ‘lơ̆ng kơtang truh tơdrong jang tĕch mơdro đơ̆ng dôm bơngai mơdro yua đơ̆ng kon pơlei tơtăm kơ ưh kơ ‘lơ̆ng, ưh kơ rơgoh tơmam sa đơ̆ng ‘nhĕm nhŭng.

Ƀok Huỳnh Ngọc Diệp, Kơdră Anih vei lăng găh vei rong kon tơrong păng Thú y dêh char Gia Lai, roi tơbăt anih jang hlôi păng tŏk bŏk jang hơdai kơjăp hăm rim tơring vă bơ̆jang kiơ̆ dôm trong jang tang găn jĭ kơtang. Hơdai hăm, khŭl lĭnh kơpal kŭm gô hơtŏk loi dơ̆ng dăr hơlen, vei lăng kơjăp dôm hơnih ket ƀuh păng tĕch mơdro.

“Kiơ̆ đơ̆ng băt hơdăh kơsô̆ nhŭng ket ƀuh tơ̆ dôm hơnih ket ƀuh akŏm lơ̆m tơring ‘noh đei tơ jur pơting hăm dôm khei hơdrol. Anih jang kŭm ling lang tơroi tơbăt păng tơtă ăn kon pơlei ‘noh jĭ klak nhŭng châu Phi ưh kơ tơpoh tơ̆ bơngai kơna kon pơlei sơđơ̆ng jơhngơ̆m răt yua, athei rơih iŏk ‘nhĕm tơ̆ dôm hơnih tĕch mơdro, dôm hơnih đei tơdrong vei lăng đơ̆ng anih jang thú y ‘noh ‘nhĕm ling lang sơđơ̆ng ‘lơ̆ng”.

Kiơ̆ tơroi tơbăt đơ̆ng Anih tơm vei lăng găh Choh jang sa păng Cham char, dang ei lơ̆m teh đak đei vă jê̆ 1 rơbâu hơnih đei jĭ tơ̆ 34 dêh char/pơlei tơm. Hloh 330.000 tŏ nhŭng hlôi athei soh hŭt. Tơ̆ hơnăp tơdrong nhŭng jĭ klak châu Phi đei ƀôh pran lơ̆m teh đak, Phŏ Thủ tướng Trần Hồng Hà ‘nao bơ̆jang hăm Anih tơm vei lăng găh Choh jang sa păng Cham char, dôm anih tơm, anih jang ƀơm truh găh tơdrong jĭ păng tơlĕch trong jang trŏ lăp, ‘lơ̆ng vă vei lăng jĭ, vei sơđơ̆ng hơnih pơtruh ‘nhĕm nhŭng ăn kơ dôm khei hơtuch sơnăm 2025. Phŏ Thủ tướng Trần Hồng Hà athei Anih tơm vei lăng găh Choh jang sa păng Cham char tơtĕnh dăr hơlen pơđĭ trong jang tơlĕch ăn găh tang găn, hơmet ‘lơ̆ng jĭ, lơ̆m noh lăng kăl tơdrong hơgăt hơnăp jang iŏk tơmam hơlen lăng, tơdrong hơgăt hơlen lăng tơdrong jĭ, gơh kĭ ăn tơbăt hơdăh jĭ ăn rim tơring (xăh, dêh char, Trung ương), pơtruh ăn Khŭl kơdră teh đak tơlĕch ăn hla ar kiơ̆ pơm hla ar tŏ sĕt vă hơmet ming, tơmơ̆t dơ̆ng trong jang tơgŭm trŏ lăp hăm tơdrong jang khŭl kơdră chĕp kơ̆l tơring 2 tăl.