VOV4.Bahnar - Đơ̆ng hơ tuch khei 4 truh dang ei, dêh char Dak Lak sơng hlŏh 137 rơ bâu ‘nu bơ ngai vih đơ̆ng dôm dêh char, pơ lei tơm (plt) găh Pơ băh. Kŭm hăm lơ trong jang vei sơ đơ̆ng tơ drong arih xa kơ plăh dang ei, dêh char oei iŏk jên tơ gŭm, pơ ‘nhŏ ăn bơ ngai jang ‘nao vih chă tŏk iŏk vă jang xa, pơm sơ đơ̆ng tơ drong arih tơ̆ pơ lei. ‘Nâu jĭ 1 lơ̆m dôm tơ drong tơ gŭm tơ tom, tôch đei yoa vă kon pơ lei gơ̆h yak hlŏh mơ mat tat yoa đơ̆ng jĭ hơ buh.

Puh 3 tŏ rơ mo năm vei tơ̆ hơ vĕn ‘ngiĕt thôn 6, xăh Cư Kty, apŭng Krông Bông, ƀok Tăng Ngọc Thịnh, ăn tơ băt, dôm tŏ rơ mo âu ‘nao răt đung kơ âu hlŏh 1 khei đơ̆ng kơ sô̆ jên đei tŏk iŏk tơ̆ anih mong jên tơ gŭm tơ pôl. Ƀât blŭng sơ năm sơ̆, klo kăn ƀok mât tơ̆ dêh char Bình Dương chă jang ăn kơ đe vă chă jên.

Ƀok Tăng Ngọc Thịnh iŏk jên đơ̆ng tŏk iŏk vă răt rong rơ mo

Mă lei jĭ Covid-19 tơ pŏh tôch hơ mơt, tơ drong jang ưh đei sơ đơ̆ng kơ na khei 6 âu ki, klo kăn ƀok vih dơ̆ng tơ̆ pơ lei. Ưh đei tĕh, ưh đei jên jang xa, ƀok đei Grŭp ‘mơ ‘met jên păng asong tŏk iŏk kơ thôn pơ tho trong pơm hla ar tŏk iŏk đei 50 triu đơ̆ng Anih mong jên tơ gŭm tơ pôl, khei ‘năr tŏk iŏk truh 10 sơ năm, jên kon 7,92% 1 sơ năm mă ưh kăl pơ dơ̆ng tơ mam kiơ.

Ƀok Tăng Ngọc Thịnh tơ roi: “Jĭ dêh ưh pă gơ̆h jang bơih kơ na jing brŏk. Đei tơ drong tơ gŭm đơ̆ng anih mong jên asong tŏk iŏk 50 triu vă răt dôm tŏ rơ mo rong ngôi. Inh ƀôh tơ drong ‘nâu tôch hơ iă, tơ gŭm đei lơ bơ ngai mơ mat tat nhen inh.”

Lơ̆m khei 2 khei âu ki, đei hlŏh 20 unh hnam tơ̆ apŭng Krông Bông đei bơ ngai vih đơ̆ng tơ ring Pơ băh đei tŏk iŏk jên hăm jên kon tŏ sĕt, akŏm đĭ đăng kơ sô̆ jên asong tŏk iŏk hlŏh 1 ti. ‘Nâu jĭ 1 lơ̆m dôm apŭng mă blŭng tơ̆ Dak Lak tơ lĕch jên tơ gŭm asong ăn bơ ngai ‘nao vih đơ̆ng tơ ring Pơ băh tŏk iŏk vă jang xa.

Bơ ngai tang măt đơ̆ng Anih mong jên tơ gŭm tơ pôl truh hơ len năng tơ drong iŏk yoa jên đei tŏk iŏk đơ̆ng kon pơ lei

Ƀok Nguyễn Tử Ân, Kơ dră chĕp kơ̆l Anih mong jên tơ gŭm tơ pôl dêh char Dak Lak tơ roi, anih mong jên kơ chăng jang hơ doi hăm khul kơ dră tơ ring chă dăr hơ len, chih iŏk tơ drong ‘mĕh vă păng pơ jing tơ drong ‘lơ̆ng ăn kon pơ lei tŏk iŏk jên vă jang xa, pơm sơ đơ̆ng tơ drong arih tơ̆ pơ lei kơ dih. Anih mong jên tơ lĕch nơ̆r apinh hăm Trung ương pơ truh dơ̆ng 19 ti hlak jên ‘măn ăn dôm unh hnam ‘nao vih đơ̆ng dôm dêh char, plt găh Pơ băh. Kŭm hăm ‘nŏh, hăm dôm unh hnam đei tơ drong arih xa mơ mat tat, tơ dăh đĭ tŏk iŏk jên bơih, anih mong jên vă pơ dui khei ‘năr kla mă ưh ‘nŏh asong tŏk iŏk thim dơ̆ng vă kon pơ lei đei jên jang xa:

“Đe sư athei đei trong jang xa mă rơ đăh tơ̆ tơ ring, mă loi đe sư athei vang jang lơ̆m dôm grŭp mong ‘mơ ‘met, tŏk iŏk jên tơ̆ dôm tơ ring. Mât lơ̆m dôm grŭp âu đe sư đei roi tơ ƀôh trong iŏk yoa jên đơ̆ng tŏk iŏk, trong jang xa, tĕch mơ dro tơ̆ tơ ring, đơ̆ng rŏng đunh khei ‘năr ưh đei măt tơ̆ tơ ring păng pơ ma atŭm dôm unh hnam âu athei iŏk yoa jên đơ̆ng tŏk iŏk lăp hăm tơ drong jang ‘nao, vă gơ̆h đei yoa ‘lơ̆ng.”

Dơ̆ng: Tơ blơ̆