VOV4.Bahnar - Lơ̆m dôm năr âu ki, dêh char Dak Lak pơ gơ̆r tơ ƀâp ăn bơ ngai tăh hla hăm dôm bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei dêh char jăl X, đơ̆ng 2021-2026 tơ̆ dôm anih pôk rơih lơ̆m dêh char.

Tơ̆ dôm anih tơ ƀâp, đơ̆ng rŏng kơ mơ̆ng tơ roi găh tơ drong arih, tih vơ̆, bơ̆ jang păng tơ drong vă jang tơ̆ hơ năp kơnh đơ̆ng dôm bơ ngai lĕch pơ jei mưh đei pôk pơm bơ ngai tang măt Jơ nŭm pơ gơ̆r kon pơ lei jăl 10, đơ̆ng 2021 – 2026, dôm bơ ngai tăh hla pơ ma tơ ƀôh đon hơ pơi ‘mĕh đơ̆ng kơ dih hăm dôm bơ ngai lĕch pơ jei, pơ ma nuh tôch tơ păt, rơ đăh rơ đong dôm tơ drong mă 2 păh tơ rĕk truh.

Lơ̆m tơ drong vă jang, dôm bơ ngai tang măt lăng kiơ̆ tơ drong oei bơ̆ jang dang ei vă pơ ma tơ lĕch dôm trong bơ̆ jang mưh đei pôk pơm bơ ngai tang măt Jơ nŭm pơ gơ̆r kon pơ lei dêh char, vă tơ gop ăn tơ drong jang atŏk tơ iung mŭk drăm, tơ pôl, hơ tŏk hơ năp jang dăr lăng đơ̆ng Jơ nŭm pơ gơ̆r kon pơ lei, vei kơ jăp tơ drong đei yoa tôch tơ găl đơ̆ng kon pơ lei.

Jơ tơ ƀâp bơ ngai tăh hla tơ̆ phường Tân Thành, plt Buôn Ma Thuột

Lơ̆m dôm ‘măng tơ ƀâp, kiơ̆ bơ ngai tăh hla tơ chĕng, dôm tơ drong vă jang đơ̆ng bơ ngai lĕch pơ jei tơ ƀôh hơ dăh hơ năp jang đơ̆ng bơ ngai tang măt ăn tơ drong đei yoa kơ kon pơ lei. Mă lei 1,2 tơ drong jang oei tam mă rơ đăh, tam tơ ƀôh đei tơ drong kăl, tam mă tơ ƀôh đei trong vă sek tơ lang dôm tơ drong tơ tŏ, tam mă ‘lơ̆ng oei đei tơ̆ 1,2 anih jang, tơ drong jang.

Bơ ngai tăh hla Nguyễn Quyền, tơ̆ phường Tân Thành, plt Buôn Ma Thuột đei nơ̆r pơ ma: “Dôm tơ drong vă jang đơ̆ng dôm bơ ngai lĕch pơ jei athei ‘moi kiơ̆ tơ̆ yăn âu, pơ ma ‘nŏh jang hloi. Oei dang ei tơ drong vă jang đei chih tơ lĕch ‘nŏh lơ mă lei bơ̆ jang ưh kơ tôm, tam mă pơm lăp hăm tơ drong ‘mĕh vă đơ̆ng bơ ngai tăh hla nhôn. Kơ na nhôn ƀôh ‘nâu jĭ tơ drong ‘lơ̆ng vă kon pơ lei păng dôm bơ ngai tang măt ăn kon pơ lei pơ ma nuh găh dôm tơ drong mă kơ dih kâu athei jang vă pơ jing tĕh đak chĕp kơ̆l pơ gơ̆r kiơ̆ luơ̆t roi đunh roi pran kơ jăp, ‘nŏh jĭ tơ drong hơ pơi ‘mĕh đơ̆ng rim bơ ngai tăh hla.”

Bơ ngai tăh hla oei apinh jet dôm bơ ngai lĕch pơ jei găh 1,2 tơ drong ƀơm truh tơ drong vei lăng đơ̆ng đe sư, mă loi jĭ tơ drong pơm trong, man anih pơ yoa ăn tơ drong arih xa kơ kon pơ lei; dôm tơ drong jang đei tơ lĕch jang, man đang bơih mă lei ưh gan đei yoa hăm kon pơ lei. Bơ ngai tăh hla athei dôm bơ ngai lĕch pơ jei tơ dăh đei pôk tŏk lơ̆m jăl jang truh athei chă mơ̆ng nơ̆r pơ ma đơ̆ng kon pơ lei, mă loi jĭ lơ̆m dôm ‘măng tơ ƀâp bơ ngai tăh hla, păng tơ lĕch jang mă ‘lơ̆ng, ưh lăp dơ̆ng ƀât nơ̆r hơ ngăh đĕch.

Bơ ngai tăh hla chă hơ len năng rim tơ drong găh bơ ngai lĕch pơ jei

Kiơ̆ đơ̆ng pơ ma nuh, dôm bơ ngai lĕch pơ jei pơ ma hơ dăh vă oei xa ‘lơ̆ng, răp mơ̆ng tôm nơ̆r pơ ma đơ̆ng bơ ngai tăh hla vă pơ gơ̆r sek tơ lang mă ưh ‘nŏh tơ roi ăn anih jang kơ pal sek tơ lang kiơ̆ nơ̆r athei đơ̆ng kon pơ lei; jang ‘lơ̆ng hơ năp jang đơ̆ng bơ ngai tang măt. Dôm nơ̆r pơ ma đơ̆ng kon pơ lei gô jing tơ drong kăl vă bơ ngai lĕch pơ jei hơ nơ̆ng hơ met pơ ‘lơ̆ng tơ drong vă jang đơ̆ng kơ dih lơ̆m khei ‘năr pơ gơ̆r pôk rơih kŭm nhen đơ̆ng rŏng kơ jing bơ ngai tang măt ăn Jơ nŭm pơ gơ̆r kon pơ lei dêh char jăl truh.

Yă Vi Thị Kiều Chi, găh anih pôk rơih kơ sô̆ 1, plt Buôn Ma Thuột ăn tơ băt: “Đơ̆ng rŏng mơ̆ng dôm nơ̆r pơ ma tơ gop đơ̆ng bơ ngai tăh hla kơ dih kâu inh ƀôh tơ drong adrin bơ̆ jang đơ̆ng kơ dih kâu kăl đei hơ tŏk hlŏh dơ̆ng, athei tơ chĕng hơ len mă tôm, lăng kiơ̆ tơ̆ yăn âu kŭm nhen băt hơ dăh rim tơ ring kon pơ lei oei xa, đei thoi nŏh tơ drong bơ̆ jang gơ̆h ‘lơ̆ng, kŭm nhen ning mônh kơnh mưh đei pôk pơm bơ ngai tang măt Jơ nŭm pơ gơ̆r kon pơ lei dêh char gơ̆h đei trong vă kơ dih kâu lăng, hơ nơ̆ng hơ met pơ ‘lơ̆ng tơ drong jang đơ̆ng kơ dih”.

Tơ̆ anih pôk rơih kơ sô̆ 9, apŭng Cư Kuin, dôm bơ ngai tang măt tơ ƀâp hlŏh 150 ‘nu bơ ngai tăh hla dơ̆ng tang ăn kon pơ lei tơ̆ dôm xăh Cư Êwi păng Ea Hu. Tơ drong jang đơ̆ng dôm bơ ngai lĕch pơ jei ‘nŏh hơ len năng rơ đăh rim tơ drong tơ̆ tơ ring vă tơ lĕch trong tưk tơ iung tơ drong pran ‘lơ̆ng lơ̆m tơ drong jang atŏk tơ iung mŭk drăm, tơ pôl đei yoa păng pran kơ jăp, lơ̆m nŏh akŏm jơ hngâm pơ jing dôm tơ ring choh jang xa hăm kơ măy kơ mŏk ‘nao; tưk tơ iung tơ drong pran tơ̆ rim xăh vă pơ jing đei tơ mam ‘lơ̆ng kiơ̆ trong “1 xăh 1 tơ mam”; adrin pơ jing tơ ring tơ rang ‘nao, jang ‘lơ̆ng tơ drong vei lăng sơ đơ̆ng arih xa tơ pôl, mă loi ‘nŏh jĭ tơ drong sut pơ ngot, tơ jur tơ nuh hin; vei kơ jăp tơ drong sơ đơ̆ng chinh trĭ, sơ đơ̆ng tơ pôl tơ̆ tơ ring…

Hop akŏm chih iŏk đei 17 ‘măng iung pơ ma, hăm hlŏh 30 nơ̆r tơ gop, pơ ma apĭnh. Lơ̆m nŏh, bơ ngai tăh hla, ‘mĕh vă dôm bơ ngai lĕch pơ jei tơ dăh đei pôk jang athei jang ‘lơ̆ng tơ drong vă jang đơ̆ng kơ dih; hơ tŏk hơ năp jang đơ̆ng bơ ngai tang măt Jơ nŭm pơ gơ̆r kon pơ lei vang roi tơ ƀôh, chih pơ jing dôm tơ drong tơ chơ̆t đei yoa, lăp hăm rim tơ drong tơ̆ tơ ring; bơ̆ jang kiơ̆ trong pơ ma ‘nŏh jang hloi, pơ ngơ̆t truh tơ drong arih xa kơ kon pơ lei; adrin jang kĕh dôm tơ drong vă jang, hơ nhăk apŭng Cư Kuin jing apŭng đei ƀôh kơ dêh char. Hop akŏm vă pơ jing tơ drong ‘lơ̆ng ăn bơ ngai tăh hla tơ ƀâp pơ ma nuh păng băt hơ dăh ƀiơ̆ dôm bơ ngai lĕch pơ jei, kiơ̆ đơ̆ng nŏh tơ chĕng hơ len, chă rơih, pôk hơ tŏk dôm bơ ngai đei tôm tơ drong hơ găt kăl pơm bơ ngai tang măt Jơ nŭm pơ gơ̆r kon pơ lei dêh char Dak Lak jăl X, đơ̆ng 2021 – 2026.

Dơ̆ng: Tơ blơ̆