VOV4.Bahnar - Đơ̆ng rŏng hlŏh 1 khei tơlĕch jang kiơ̆ Tơdrong tơchơ̆t 68 đơ̆ng Khŭl kơdră tĕh đak păng Tơchơ̆t 23 đơ̆ng Thủ tướng tĕh đak găh mĭnh ƀar trong jang tơgŭm djru ăn bơngai jang păng bơngai hơvơ̆h đe jang tơ ƀơ̆p tơnap tap kơ yuơ jĭ hơbŭh Covid-19 pơm ăn, trŭh dang ei, dêh char Dak Lăk hlôi tơgŭm ăn vă jê̆ 49.000 ‘nu bơngai hăm akŏp kon jên vă jê̆ 18 ti 200 trĭu hlak jên. Dêh char Dak Lăk tơlĕch jang đei 8 lơ̆m 11 khŭl kăl vă tơgŭm djru kiơ̆ tơdrong tơchơ̆t. Dêh char hơnơ̆ng dăr lăng păng jang kiơ̆ khŭl tơgŭm djru bơngai jang ư̆h kơ đei kĭ pơkăp jang păng ŭnh hnam mơdro sa. Hơdrô̆ hăm tơgum djru bơngai hơvơ̆h jang pơtho pơhrăm, pơtho ming, atŏk tơdrong bơ̆ jang gơ̆h vă vei kơ jăp tơdrong jang ăn bơngai jang ‘nŏh hrei au tim mă đei hơnĭh ayơ chă athei tơgŭm ăn. Tơhlăk tơhlĭn tĭh hlŏh hrei au ‘nŏh dăr lăng, lăng hơlen rim bơngai sơng iŏk tơgŭm djru au. Dak lăk hrei au đei lơ kon pơlei oei tơ̆ lơ dêh char anai brŏk vĭh, rim dêh char au jei tŏk bŏk jang kiơ̆ ăn oei hơtăih dĭh băl kơna tơdrong dăr lăng tơ ƀơ̆p tôch tơnap tap. Mă lei, dêh char tŏk bŏk hơdrin jang kiơ̆ rim trong jang vă sơđơ̆ng tơgŭm djru tơtom, tĕnh koăng păng ƀlep bơngai.

Tơblơ̆ nơ̆r: Amazưt