VOV4.Bahnar - Lăp pă hlŏh 1 khei dơ̆ng ‘nŏh truh năr pôk rơih Kuô̆k hô̆i păng Jơ nŭm pơ gơ̆r kon pơ lei jơ̆p tơ ring. Vă trŏ hăm tơ drong pơm tơm đơ̆ng kon pơ lei păng đei jơ nei mưh pơ gơ̆r pôk rơih, dêh char Dak Lak hlôi hơ tŏk tơ drong tơ roi tơ băt hăm lơ trong pha ra băl, mă loi jĭ hăm bơ ngai tăh hla hơ drĕch kon kông tơ̆ dôm tơ ring hơ tăih yăih.

Đơ̆ng rŏng kơ sŏng xa kơ măng, kră pơ lei Lò Khái Phụ, tơ̆ plei Ea Rớt, xăh Cư Pui, apŭng Krông Bông, dêh char Dak Lak hăt hot chĕp unh ƀin năm tơ̆ dôm hnam lơ̆m pơ lei vă roi tơ băt găh tơ drong pôk rơih. Oei mât lơ̆m pơ yan rô̆ ƀum kơ na ƀok athei tơ gĕch tơ̆ kơ măng năm tơ ƀâp kon pơ lei. Hơ nơ̆ng rim kơ măng, ƀok Phụ tơ gĕch năm tơ̆ 4-5 unh hnam roi tơ băt ăn kon pơ lei dôm tơ drong ƀơm truh pôk rơih. Yoa kon pơ lei tơ̆ plei âu tơ tă bơ ngai H’mông ngăl kơ na dôm tơ drong tơ roi đei ƀok Phụ tơ blơ̆ tơ̆ nơ̆r H’mông vă kon pơ lei ƀônh băt:

“Inh athei chă tơ roi, krao hơ vơn ‘nhŏng ŏh năm pôk rơih, rim bơ ngai athei năm pôk rơih mă tôm, yoa ‘nŏh jĭ luơ̆t tĕh đak păng hơ năp jang đơ̆ng rim bơ ngai. Trong roi tơ băt ‘nŏh gô hôp pơ lei ba tơ gĕch roi tơ ƀôh, tơ dăh unh hnam yơ tam mă hlôh ‘nŏh bơ̆n athei năm tơ̆ hnam sư vă roi tơ băt dơ̆ng”.

Bơ ngai jang tơ̆ anih rapor xăh roi tơ băt găh pôk rơih

Cư Pui jĭ xăh hơ tăih yăih kơ apŭng Krông Bông, đei lơ bơ ngai kon kông oei xa, đei lơ pơ lei hơ tăih kơ xăh vă jê̆ 20km, trong tôch mơ mat. Yoa thoi nŏh vă rim bơ ngai gơ̆h băt găh tơ drong pôk rơih truh, anih pơ gơ̆r pôk rơih tơ̆ xăh Cư Pui đei lơ trong jang vă roi tơ băt ăn kon pơ lei.

Ƀok Nguyễn Văn Tâm, Kơ dră vei lăng kon pơ lei xăh Cư Pui ăn tơ băt, ‘măng pôk rơih âu xăh Cư Pui đei 10 anih pôk rơih, hăm kơ sô̆ bơ ngai kăl đei pôk rơih ‘nŏh 30 ‘nu vă mât jang lơ̆m Jơ nŭm pơ gơ̆r kon pơ lei. Kiơ̆ đơ̆ng 2 ‘măng pơ ma nuh hlôi chih hơ dăh măt 65 ‘nu bơ ngai lĕch pơ jei păng hlôi pơ gơ̆r đang tơ drong iŏk nơ̆r tơ gop tơ̆ tơ ring oei xa hăm dôm bơ ngai lĕch pơ jei vă hơ met ăn ‘măng hop akŏm pơ ma nuh mă 3. Xăh hlôi chih đang măt bơ ngai tăh hla hăm dang 7.200 ‘nu vă năm pôk rơih tơ̆ 13 anih pôk rơih.

Kiơ̆ ƀok Nguyễn Văn Tâm, truh dang ei, tơ drong hơ met ăn pôk rơih adoi bơ̆ jang ‘lơ̆ng trŏ tơ drong hơ găt. Vă gơ̆h đei thoi âu, tơ drong tơ roi tơ băt găh pôk rơih đei bơ̆ jang hơ nơ̆ng păng đei tơ drong tơ gŭm tôch pơ nĕh đơ̆ng đe kră pơ lei, ƀok pơ gơ̆r pơ lei păng bơ ngai đei kon pơ lei lui yom tơ̆ tơ ring.

“Hăm 1 xăh đei lơ kon pơ lei kon kông păng pơ lei tơ̆ xăh hơ tăih băl, vă tơ drong roi tơ băt gơ̆h lăp hăm tơ ring nhôn tơ lĕch lơ trong. Trong roi tơ băt đei yoa hlŏh jĭ roi tơ băt tơ̆ tơ ring kon pơ lei oei, dôm pơ lei pơ la. Nhôn pơ gơ̆r ăn gre aloa năm truh tơ̆ tơ ring kon pơ lei oei vă roi tơ băt. Mă 2 kiơ̆ đơ̆ng hơ năp jang kơ đe kră pơ lei, ƀok pơ gơ̆r pơ lei, bơ ngai đei kon pơ lei lui yom, đe ƀok pơ tho lui khop đe sư tơ gŭm ăn tơ drong tơ roi tơ băt roi đei yoa ƀiơ̆”.

Tơ drong roi tơ băt găh pôk rơih đei tơ mât hơ dai hăm dôm tơ drong hơ ri hơ xoang

Nhen thoi nŏh mơ̆n, tơ̆ xăh Yang Reh, apŭng Krông Bông, dêh char Dak Lak tơ drong tơ roi tơ băt găh pôk rơih đei tư̆k pran. Ƀok Y Mui Niê, ƀok pơ gơ̆r plei Yang Reh, xăh Yang Reh tơ roi, lơ̆m pơ lei đei 4 tŏ aloa roi tơ băt, rim năr hơ nơ̆ng pơih tơ roi găh tơ drong pôk rơih ăn kon pơ lei. ‘Ngoăih kơ ‘nŏh, kăn ƀô̆ jang găh tơ drong jŏh ayŏ kơ dŏ xoang, roi tơ băt xăh hơ nơ̆ng mât tơ̆ pơ lei chă tơ roi găh tơ drong pôk rơih. Kơ dih kâu ƀok Y Mui kŭm hơ nơ̆ng tơ gĕch roi tơ băt găh pôk rơih lơ̆m dôm ‘măng hŏk hôp pơ lei; krao hơ vơn kon pơ lei khan ăn kơ tum kơ tŏng ‘nhŏng ŏh năm jang xa tơ̆ hơ tăih truh ‘năr 23/5 athei vih tơ̆ tơ ring vă năm pôk rơih.

“Kon pơ lei băt truh luơ̆t pôk rơih kŭm gơ nơm đơ̆ng Radio pơih tơ roi hơ nơ̆ng rim năr til pơ gê păng tơ̆ kơ sơ̆, lơ̆m pơ lei đei 4 tŏ aloa roi tơ băt. Trong mă 2 ‘nŏh chih pơ klĕm chư tơ̆ che roi tơ băt, tơ ƀâp bơ ngai tăh hla. Vă truh năr pôk rơih bơ ngai tang măt jơ nŭm pơ gơ̆r kon pơ lei ‘nŏh athei pơm kiơ̆ mă ‘lơ̆ng, hơ met jơ hngâm đon năm pôk rơih vă rơih đei dôm bơ ngai tang măt rơ gei, đei đon ‘lơ̆ng chă pơ vih ăn kon pơ lei”.

Pano, băng rôn đei chô̆ hơ tol tơ̆ lơ anĭh lơ̆m pơ lei pơ la

Kiơ̆ ƀok Bùi Duy Thích, Kơ dră Anih MTTQ Việt Nam apŭng Krông Bông, lơ̆m apŭng đei 25 hơ drĕch hơ drung arih xa hơ dai, lơ̆m nŏh đei 40% ‘nŏh kon pơ lei kon kông. Yoa thoi nŏh vă tơ drong pôk rơih gơ̆h pơ gơ̆r đei jơ nei ‘lơ̆ng, ‘ngoăih kơ roi tơ băt hăm pano, ƀăng rôn, apŭng oei hyup lơ̆m ƀăng brŏ vă roi tơ băt găh pôk rơih gơih ăn Dơ nŏ anih vei lăng kon pơ lei 14 xăh, thĭ trơ̆n. Radio ra por- pơih pơ dăh tivi apŭng pơih tơ drong tơ roi hăm 2 nơ̆r Yoăn păng Rađe, roi tơ băt găh pôk rơih rim năr. Truh dang ei, dôm tơ drong jang hơ met ăn pôk rơih đei tơ lĕch trŏ ƀlep, hơ năn bơ ngai lĕch pơ jei kŭm đei chih đang păng hlôi pơ gơ̆r hop akŏm pơ ma nuh ‘măng mă 3.

“Nhôn hlôi pơ gơ̆r iŏk nơ̆r tơ gop tơ̆ tơ ring oei xa, tơ̆ hlŏh 140 pơ lei, pơ la, kueng kơ phô̆ hăm 87 ‘nu bơ ngai lĕch pơ jei tơ̆ apŭng păng 666 ‘nu bơ ngai lĕch pơ jei tơ̆ xăh. Mặt trận dôm tơ ring oei pơ gơ̆r chih akŏm nơ̆r tơ gop vă roi tơ băt lơ̆m hop akŏm pơ ma nuh ‘măng mă 3. Dang ei tơ̆ apŭng, đĭ đăng Radio roi tơ băt tơ̆ xăh  oei hơ nơ̆ng pơih tơ roi găh tơ drong pôk rơih, lơ̆m dôm ‘măng hŏk hôp pơ lei, kueng kơ phô̆ kŭm tơ gĕch tơ roi hloi găh tơ drong pôk rơih. Dôm khul grŭp tơ pôl kŭm adrin roi tơ băt găh tơ drong pôk rơih Kuô̆k hô̆i păng Jơ nŭm pơ gơ̆r kon pơ lei jơ̆p tơ ring”.

Lơ̆m tơ drong pôk rơih ‘măng mă âu, dêh char Dak Lak đei 20 anih pôk rơih đei pơ jing truh tơ̆ dôm apŭng, thĭ xăh păng plt. Hăm 1 dêh char tĕh xă, đei lơ kon pơ lei kon kông, lơ tơ ring mơ mat tat tam iŏk đei tôm nơ̆r roi tơ băt. Yoa thoi nŏh, vă trŏ hăm tơ drong pơm tơm đơ̆ng kon pơ lei păng đei jơ nei mưh pơ gơ̆r pôk rơih bơ ngai tang măt Kuô̆k hô̆i păng bơ ngai tang măt Jơ nŭm pơ gơ̆r kon pơ lei jơ̆p tơ ring đơ̆ng 2021-2026, dêh char Dak Lak oei hơ tŏk tơ drong tơ roi tơ băt hăm lơ trong pha ra băl, mă loi năng kăl tơ drong roi tơ băt găh pôk rơih tơ̆ tơ ring hơ tăih yăih, tơ ring kon pơ lei kon kông oei xa.

H’Xíu: Chih

Dơ̆ng: Tơ blơ̆