VOV4.Bahnar - ‘Năr 28/10, Khŭl dăr hơ len kơ Anih tơm vei lăng găh bơ ngai jang - linh jĭ rơ ka păng tơ pôl hlôi đei jơ bơ̆ jang hăm Anih vei lăng kon pơ lei dêh char Dak Lak găh tơ drong jang tơ gŭm kon pơ lei, anih jang mơ dro sa, bơ ngai jang păng bơ ngai iŏk yua bơ ngai jang tơ ƀơ̆p mơ mat tat yua đơ̆ng jĭ hơ buh COVID-19. Tang măt Anih vei lăng tơ drong jang, Anih tơm vei lăng găh bơ ngai jang - linh jĭ rơ ka păng tơ pôl hơ len lăng lơ trong jang tơ gŭm tơ̆ Dak Lak oei hiơ̆ tơ lĕch jang, ưh kơ jang hơ dai. Jang kiơ̆ tơ drong tơ chơ̆t 68 đơ̆ng Khŭl kơ dră teh đak, jô̆ truh ‘năr 26/10, dêh char Dak Lak hlôi kĭ ăn vă jê̆ 3.000 ‘nu iŏk yua bơ ngai jang, dang 55.000 ‘nu bơ ngai jang sa yua hăm kơ sô̆ jên hloh 29 ti hlak jên.

Ƀok Vũ Trọng Bình, Kơ dră Anih vei lăng tơ drong jang, Anih tơm vei lăng bơ ngai jang - linh jĭ rơ ka păng tơ pôl pơ ma tơ̆ jơ bơ̆ jang

Kiơ̆ đơ̆ng noh, hlôi tơ lĕch ăn vă đĭ đăng bơ ngai iŏk yua bơ ngai jang, dang 48.000 ‘nu bơ ngai jang hăm 21 ti hlak jên. 1,2 grŭp trong jang tơ gŭm dêh char Dak Lak hlôi jang kiơ̆ ‘lơ̆ng, mă lei, 1,2 grŭp trong jang tơ gŭm hlôi kĭ ăn  lơ mă lei kơ sô̆ kla ăn đei tŏ sĕt nhen: trong jang tơ gŭm bơ ngai jang ưh kơ đei pơ kăp hla ar bơ ngai jang, hlôi kĭ ăn hloh 9.400 ‘nu, mă lei ‘nao tơ lĕch đei dang 3.000 ‘nu hăm hloh 3,8 ti hlak jên, kơ sô̆ kla 35%; trong jang tơ gŭm bơ ngai jang pơ dơ̆h ‘mơ̆i pơm hla ar bơ̆ jang, pơ dơ̆h kơ jang ưh kơ đei sa jên khei hlôi kĭ ăn 357 ‘nu, ‘nao tơ lĕch kla ăn 173 ‘nu, kơ sô̆ tơ lĕch kla 47%. Khŭl hlôi athei dêh char Dak Lak kăl hơ met ming vă tơ tom tơ gŭm dôm bơ ngai đei ƀơm kơ nê̆ yua đơ̆ng jĭ Covid-19.

Thuem: Tơ blơ̆