VOV4.Bahnar – Yuơ răm đơ̆ng pơrang jĭ COVID-19, lơ anih jang mŭk drăm jing tơnap tap kơyuơ athei pơdơh kơ jang, kăt tơjur kơsô̆ bơngai, phŏ noh tơpăi hloi, pơdui kiơ̆ noh lơ bơngai jang tơ̆ Đăk Lăk duh hiong tơdrong jang păng jên xa. Vă dôm bơngai âu da ƀiơ̆ tơnap tap, Đăk Lăk hlôi pơm trong hiôk vă dôm bơngai jang gơh đei iŏk jên tơgŭm ưh đei tơdrong jang trŏ ƀlep hloh.

Chĕp hô sơ năm truh Anih Tơroi axong tơdrong jang dêh char Đăk Lăk vă bơ̆ hla bar gơh đei iŏk jên tơgŭm ưh đei tơdrong jang, atŭm hăm noh chơ chă ăn kơ po minh tơdrong jang ‘nao, ‘nhŏng Trương Đức Dũng, oei tơ̆ trong Đào Duy Từ, phương Thành Công, plei tơm Buôn Ma Thuột ăn tơbăt: Adrol ki, xư jang kŏng nhơ̆n hăm jên khei xa hơpăh pơhlom 6 trĭu hlj minh khei. Dôm tơdrong pơrăm kơnê̆ đơ̆ng pơrang jĭ COVID -19 hơbuh hli ăh xơnăm 2020 păng dang ei hlôi pơm ăn Anih jang tơpăi. Adrol kơ chă tơdrong jang ‘nao, tơdrong erih unh hnam gô gơnơm lơ̆m jên bảo hiêm ưh đei tơdrong jang mă po iŏk đei: “Lơ̆m khei năr hơbuh pơrang jĭ đơ̆ng xơnăm xơ̆ truh dang ei noh anih jang mŭk drăm pơtơm tơjur ƀôh hơdăh păng ưh kĕ dơ̆ng kơjăp noh athei tơklăh ăh xơnăm âu. Inh duh hơpơi ‘moih chă đei tơdrong jang ‘nao xơđơ̆ng lơ̆m tơdrong erih.”

Duh ưh đei tơdrong jang păng chôt vih đơ̆ng dêh char Khánh Hòa, ‘nhŏng Nguyễn Vũ Bốn, oei tơ̆ thôn 6, xăh Ea Bhôk, apŭng Chư̆ Kuin, duh hăt hot năm bơ̆ hla bar vă iŏk jên tơgŭm ưh đei tơdrong jang. ‘Nhŏng Bốn ăn tơbăt, xư đei Anih Tơroi axong tơdrong jang Đăk Lăk pơtho bơ̆ hla bar kăl păng tenh vă dăh đei iŏk jên tơgŭm ưh đei tơdrong jang hloh 2 trĭu hlj minh khei, ‘Nhŏng Bốn akhan, mă jên âu tŏ xĕt hloh kơ jên khei jang, mă lei duh tơgop tơgŭm unh hnam yak hloh tơnap tap: “Lơ̆m kơplăh khei năr pơrang jĭ hơbuh âu tam mă đei tơdrong jang ‘nao, noh ƀao hiểm ưh đei tơdrong jang chă tơgŭm duh da ƀiơ̆. Lơ̆m khei năr truh, inh hơpơi ‘moih duh chă đei tơdrong jang tơjê̆ âu vă tơjê̆ unh hnam”

Ƀok Nguyễn Văn Cường, Phŏ Kơdră Anih Tơroi axong tơdrong jang (Anih Axong jang Linh jĭ rơka păng Tơpôl) dêh char Đăk Lăk ăn tơbăt, lơ̆m 5 khei blŭng xơnăm 2021, Đăk Lăk hlôi đei 3.365 ‘nu bơngai nôp hô sơ athei xek tơlang tơdrong tơgŭm ưh đei tơdrong jang. Găh khei 5 đei hloh 1 rơbâu hô sơ, tŏk 15% pơtêng hăm khei adrol ki. Lơ̆m noh, kơsô̆ bơngai jang tơ̆ ‘nguaih dêh char nôp hô sơ apinh tơgŭm ưh ưh đei tơdrong jang đei 70%. Dang ei hlôi đei jê̆ 3 rơbâu ‘nu đei iŏk jên tơgŭm ưh đei tơdrong jang hăm kơsô̆ jên hloh  45 tih hlj.

Atŭm hăm tơdrong xek tơlang jên tơgŭm ưh đei tơdrong jang, vă tơgŭm ăn bơngai jang xơđơ̆ng tơdrong erih, Anih jang oei hăt hot tơgŭm, tơroi tơdrong jang, tơgŭm hŏk tơdrong jang. Gơnơm thoi noh, lơ̆m khei 5 hlôi đei 89 ‘nu tŏk bŏk oei xa jên tơgŭm ưh đei tơdrong jang đei hŏk tơdrong jang kiơ̆ nhen tơchơ̆t, hăm jên tơgŭm jê̆ 400 trĭu hlj. Anih jang duh tơlĕch lơ tơdrong tơgŭm hăm tơdrong jang, tơroh hăm dôm anih jang mŭk drăm vă tơgŭm ăn dôm bơngai jang dăh hrôih chă đei tơdrong jang. Ƀok Nguyễn Văn Cường ăn tơbăt: “Găh tơdrong tơroi tơdrong jang ăh khei năr pơrang jĭ hơbuh hli pơrăm tih tên truh dôm tơdrong jang nhen, pơgơ̆r akŏm tơbang todrong jang akŏm lơ bơngai noh Anih jang ưh gơh pơm tơlĕch ôh. Anih jang adrô̆ akŏm tơroi tơgŭm kiơ̆ điê̆n thoăi Website, facebook noh mă tơm. Anih jang tơrĕk hăm anih mŭk drăm, tơrĕk hăm bơngai jang vă đe tơroh kiơ̆ điê̆n thoăi dăh mă nôp hô sơ kơtă hloi.”

Tơdrong tơgŭm xek tơlang dôm hla bar tơgŭm jên ưh đei tơdrong jang đơ̆ng anih jang kơpal kơ Đăk Lăk hlôi tơgŭm ăn bơngai jang mă hiong tơdrong jang yuơ răm đơ̆ng pơrang jĭ COVID -19 gơh xơđơ̆ng jơhngơ̆m, yak hloh tơnap tap oei gô chang đei tơdrong jang ‘nao.

Lan chih păng pơre nơ̆r