VOV4.Bahnar - Hăm trong jang “hô sơ truh dang yơ sek tơ lang truh dang noh”, dêh char Dak Lak oei adrin tơ lĕch lơ tơ drong tơ gŭm ăn anih tĕch mơ dro păng bơ ngai jang tơ ƀâp mơ mat tat yoa đơ̆ng jĭ Covid-19. Gơ nơm thoi noh, truh dang ei đĭ đei vă jê̆ 3.000 anih jang hăm hlŏh 50.500 ‘nu kon pơ lei đei xa yoa dôm tơ drong tơ gŭm kiơ̆ tơ drong tơ chơ̆t 68 đơ̆ng Khul kơ dră tĕh đak.

Đơ̆ng rŏng kơ pơm đang hla ar kiơ̆ nơ̆r pơ tho đơ̆ng Anih ƀai hiêm tơ pôl dêh char Dak Lak, công ty pơm mam pơ sei Đông Nam Á, tơ̆ tơ ring jang kơ măy Hòa Phú, plt Buôn Ma Thuột, dêh char Dak Lak đei tơ jur ưh kơ nôp vă jê̆ 200 triu hlak jên. ‘Nâu jĭ kơ sô̆ jên hơ tŏ hăm 0,5% jên nôp ƀao hiêm krê pơ̆k rơ ka mưh oei bơ̆ jang, jĭ đơ̆ng tơ drong jang ăn hlŏh 600 ‘nu bơ ngai jang lơ̆m dang 1 sơ năm, jô̆ đơ̆ng khei 7 sơ năm 'nâu truh khei 6 sư năm đơ̆ng rŏng. Yă Lê Thị Tuyết Hạ, Phŏ Kơ dră chĕp kơ̆l công ty ăn tơ băt, mă đơ̆ng ưh kơ lơ mă lei tơ drong tơ gŭm âu nhen thoi pơ lung jơ hngâm, mơ nat ăn anih jang kơ plăh oei mơ mat tat âu:

“Akŏm đĭ đăng jên khei păih công ty nhôn kla dang 3 ti 1 khei, mưh đei tơ gŭm tơ jur 0,5% ‘nŏh hơ tŏ hăm 15 triu 1 khei. Dang ei jên đei tơ gŭm đơ̆ng tơ drong tơ chơ̆t 68 găh công ty hlôi iŏk răt bơ̆n tơ mam pơ gang vă tang găn jĭ păng vei lăng tơ drong arih xa ăn kăn ƀô̆ bơ ngai jang, ‘mơ ‘met ƀiơ̆ jên pơ huach ăn công ty kơ plăh mơ mat tat âu.”

Ƀao hiêm tơ pôl dêh char Dak Lak tơ gŭm chih tơ băt hla ar ăn Anih tĕch mơ dro, bơ ngai jang pơ dơ̆h jang dăh mă pơ dơ̆h nôp ƀao hiêm tơ pôl vă gơ̆h iŏk đei tơ drong tơ gŭm 68.

Tơ̆ hơ năp tơ drong krê hơ mơt đơ̆ng jĭ Covid-19 tơ pŏh ‘măng mă 4, plt Buôn Ma Thuột, dêh char Dak Lak lơ ‘măng pơ gơ̆r pơ vang găn tơ pôl kiơ̆ tơ drong tơ chơ̆t 16, 15 păng 15+. Lơ anih tĕch mơ dro athei pơ dơ̆h jang xa mă ưh ‘nŏh tơ lĕch trong jang mă lăp vă pơm ‘lơ̆ng ăn tơ drong tang găn jĭ. Tơ drong jang păng jên khei kơ bơ ngai jang ƀơm ưh ‘lơ̆ng tôch dêh. Jên tơ gŭm đơ̆ng tơ drong tơ chơ̆t 68 hlôi tơ gŭm ăn lơ anih jang đei dơ̆ng kon jên vă vei lăng, tơ gŭm ăn bơ ngai jang, pơ lung đe sư sơ đơ̆ng jơ hngâm bơ̆ jang.

‘Nhŏng Trần Trung Tiến, bơ ngai jang tơ̆ công ty pơm mam pơ sei Đông Nam Á, tơ̆ tơ ring jang kơ măy Hòa Phú, plt Buôn Ma Thuột, dêh char Dak Lak ăn tơ băt: “Ƀât jĭ oei tôch hơ mơt tơ drong jang xa, bơ̆ jang jur ƀiơ̆ ‘nŏh jên khei kŭm jur ‘năi. Mă lei khul kơ dră chĕp kơ̆l công ty tôch pơ ngơ̆t ăn bơ ngai jang păng đei lơ trong jang, mă 1 tơ gŭm por sŏng mưh ‘nhŏng ŏh năm jang, tơ gŭm thim jên đak xăng vă năm jang, ƀât lăp oei pơ ngơ̆t chă bơ̆n anih oei jê̆ ƀiơ̆, sơ đơ̆ng ƀiơ̆ vă bơ ngai jang gơ̆h vĕh đơ̆ng tơ ring hơ mơt, tơ ring đei jĭ oei tơ pŏh vă gơ̆h năm bơ̆ jang hơ nơ̆ng ăn công ty.”

Kiơ̆ ƀok Nguyễn Khắc Tuấn, Kơ dră chĕp kơ̆l Anih ƀao hiêm tơ pôl dêh char Dak Lak, bơ̆ jang dôm tơ drong tơ gŭm kiơ̆ tơ drong tơ chơ̆t 68, ƀao hiêm tơ pôl dêh char tơ jur ƀiơ̆ jên nôp ƀao hiêm vei lăng bơ ngai jang păng jĭ jăn đơ̆ng tơ drong jang ăn vă jê̆ 3 rơ bâu anih tĕch mơ dro păng bơ ngai iŏk đe jang, hăm dang 44 rơ bâu ‘nu bơ ngai jang. Akŏm đĭ đăng jên tơ gŭm hlŏh 13 ti hlak jên. Pơ dơ̆h ‘mơ̆i nôp jên hưu păng jên tơ gŭm ăn bơ ngai lôch răm hăm 4 anih jang, hăm kơ sô̆ jên dang 800 triu. Anih nhôn oei pơm hla ar chih tơ băt ăn anih tĕch mơ dro păng bơ ngai jang pơ dơ̆h jang yoa đơ̆ng jĭ mă ưh ‘nŏh pơ dơ̆h nôp jên ƀao hiêm tơ pôl mă lei ưh đei xa jên hiong tơ drong jang vă gơ̆h tơ gŭm kiơ̆ tơ drong Tơ chơ̆t 68. Truh dang ei, tơ drong tơ lĕch Tơ drong tơ chơ̆t 68 tơ̆ anih jang tôch hiôk hian. Gơ nơm thoi nŏh tơ gŭm ăn bơ ngai jang păng anih tĕch mơ dro tơ jur ƀiơ̆ jơ năr gô mưh pơm đang rim hla ar:

“Mưh tơ lĕch tơ drong ‘nâu nhôn drơ̆ng nơ̆r đơ̆ng trung ương truh tơ̆ tơ ring ‘nŏh athei bơ̆ jang kiơ̆ trong jang đơ̆ng Khul kơ dră tĕh đak păng anih jang kơ pal tơ pă. Ƀao hiêm tơ pôl Việt Nam pơ tho, lơ̆m 1 năr athei chih tơ băt ăn bơ ngai jang păng anih tĕch mơ dro mưh đei tôm hla ar bơih, hơ drô̆ hăm ƀao hiêm tơ pôl Dak Lak, nhôn pơ tho ăn rim anih jang mưh pơm đang hla ar, gơih ăn anih ƀao hiêm tơ pôl ‘nŏh lơ̆m dang 1 jơ athei chih tơ băt ăn anih tĕch mơ dro hloi vă pơm hiôk hian hlŏh ăn anih tĕch mơ dro păng bơ ngai jang đei xa yoa tơ drong tơ gŭm đơ̆ng Tơ drong tơ chơ̆t 68.”

Jên tơ gŭm đơ̆ng tơ drong tơ chơ̆t 68 chă tơ gŭm ăn lơ anih tĕch mơ dro đei dơ̆ng kon jên tơ gŭm ăn bơ ngai jang, pơ lung đe sư sơ đơ̆ng jơ hngâm bơ̆ jang

Ƀok Nguyễn Quang Thuân, Phŏ Kơ dră Anih vei lăng bơ ngai jang xa, linh jĭ rơ ka păng tơ pôl dêh char ăn tơ băt, truh dang ei tơ̆ Dak Lak hlôi jang đei 9/11 grŭp tơ gŭm kiơ̆ tơ drong Tơ chơ̆t 68. Lơ̆m nŏh, đei 3 grŭp tơ gŭm đei tơ lĕch jang ‘lơ̆ng ‘nŏh tơ gŭm tơ jur jên nôp ƀao hiêm vei sơ đơ̆ng mưh oei bơ̆ jang, tang găh jĭ jăn đơ̆ng tơ drong jang; gơ̆t ‘mơ̆i nôp jên hưu păng tơ gŭm kla ăn bơ ngai lôch, tơ drong tơ gŭm ăn bơ ngai hơ ri hơ xoang păng bơ ngai chông trong chă tơ mang lăng. Hrei ‘nâu, Anih jang oei tơ lĕch trong hơ tŏk tơ drong roi tơ băt, tơ ƀôh ăn Dơ nŏ anih vei lăng kon pơ lei dêh char pơ jao hơ năp kĭ pơ kăp tơ drong tơ gŭm ăn Dơ nŏ anih vei lăng kon pơ lei dôm apŭng, thĭ xăh păng plt vă pơm ‘lơ̆ng găh jơ năr, trong pơm hla ar păng trŏ bơ ngai đei xa yoa. Atŭm hăm ‘nŏh, Anih oei pơ jing lơ khul jang vă hơ len năng, athei jăh jang kiơ̆ tơ drong tơ chơ̆t 68 tơ̆ tơ ring:

“Vă bơ̆ jang ‘lơ̆ng ƀiơ̆ tơ drong jang ‘nâu tơ̆ hơ năp kơnh, anih jang hlôi đei trong pơ ma nuh, jang hơ doi hăm Anih vei lăng tơ drong tơ roi tơ băt, dôm anih jang kơ pal đei ƀơm truh, mă loi ‘nŏh jĭ dôm tơ ring hơ tŏk tơ drong tơ roi tơ băt dôm grŭp tơ gŭm hăm rim bơ ngai vă pơm ‘lơ̆ng hla ar, trŏ bơ ngai păng chih tơ lĕch hla ar pơ tho ăn dôm grŭp tơ gŭm âu vă kiơ̆ đơ̆ng nŏh hơ tŏk tơ drong roi tơ băt, vă rim bơ ngai đei xa yoa băt hơ dăh dôm tơ drong ‘nâu.”

Hăm trong jang pơm “hô sơ truh dang yơ sek tơ lang truh dang noh, ưh gơ̆h lê̆ kon pơ lei păng anih tĕch mơ dro athei gô chang”, dang ei dôm anih jang kơ pal kơ dêh char Dak Lak oei hơ tŏk tơ drong jang hơ doi tơ lĕch trong hơ len năng, chih măt vă tơ gŭm ăn bơ ngai jang păng tơ ‘ngla iŏk bơ ngai jang kiơ̆ tơ drong hơ găt. Hăm đon pơ hnŏng tơ gŭm tơ tom, trŏ bơ ngai, rơ đăh rơ đong, ưh gơ̆h xa pơ gâm tơ drong tơ gŭm.

H’Xíu H’Mốc: Chih

Dơ̆ng: Tơ blơ̆