VOV4.Bahnar - Kiơ̆ chih jô̆ đơ̆ng Anih vei lăng găh bơ ngai jang - lĭnh jĭ rơ ka păng tơ pôl dêh char Dak Lak, đơ̆ng khei 7/2021 truh dang ei, lơ̆m dêh char đei hloh 75.000 ‘nu kon pơ lei brŏk đơ̆ng dôm dêh char. Hơ drô̆ đơ̆ng blŭng khei 10 truh dang ei, đei vă jê̆ 26.000 ‘nu. Lơ̆m noh găh lơ ‘noh kŏng nhân tŏk bŏk bơ̆ jang tơ̆ rim tơ ring jang kơ măy kơ mŏk tơ̆ Bình Dương, Đồng Nai, pơ lei tơm Hồ Chí Minh. Vă tơ gŭm grŭp bơ ngai âu, Anih jang hlôi pơ ma dơ nuh hăm rim tơ ring đei ‘mĕh vă chă bơ ngai jang vă tơ klep hơ dai iŏk vă mư̆h rim hnam kơ măy bơ̆ jang pơm tơ lĕch hmă hơ lơ̆k dơ̆ng đơ̆ng rŏng jĭ hơ buh.

Hơ drô̆ hăm dôm bơ ngai đei ‘mĕh vă bơ̆ jang tơ̆ tơ ring, Anih jang kŭm athei anih vei lăng bơ ngai jang rim apŭng, thị xăh, pơ lei tơm chih akŏm hơ năn vă pơ jing trong jang tơ gŭm mă lăp. Kiơ̆ lơ̆m tơ drong tơ chơ̆t 128 đơ̆ng Khŭl kơ dră teh đak tang găn jĭ hai tơ iung ming mŭk drăm hai, tơ̆ Dak Lak, hăm dôm bơ ngai tơ chơ̆t oei kơ tă, tơ ring gô hơ nơ̆ng bơ ngơ̆t truh hơ len lăng rim trong jang tơ gŭm tơ drong jang mă lăp, tơ gŭm sơ đơ̆ng tơ drong arih sa lơ̆m tơ drong ‘nao.

Thuem: Tơ blơ̆