VOV4.Bahnar - Bơ̆ jang kiơ̆ nơ̆r pơ tho đơ̆ng Grŭp jang unh điên Việt Nam găh tơ jur kơ jă điên, jên điên ăn dôm khul grŭp, rim bơ ngai ƀơm ưh ‘lơ̆ng đơ̆ng jĭ Covid – 19, Công ty jang unh điên Dak Lak oei pơ gơ̆r chih măt dôm anih chă tơ mang lăng, tep pơ dơ̆h, dôm anih ăn oei hơ drô̆, khăm hơ met ăn bơ ngai đei jâu tơ pŏh jĭ, bơ ngai jĭ vă tơ gŭm kiơ̆ tơ drong hơ găt.

Chih hơ năn roi tơ băt ăn dôm bơ ngai đei tơ jur, ưh iŏk jên điên

Khei ‘năr tơ gŭm kơ jă điên păng jên điên ăn dôm bơ ngai âu đei jô̆ đơ̆ng kơ sô̆ jên điên khei 6 truh khei 12/2021. Kiơ̆ tơ drong tơ dra đơ̆ng Công ty jang unh điên Dak Lak, akŏm đĭ đăng jên tơ gŭm pơ hlom năng hlŏh 5 ti. Dôm anih tep pơ dơ̆h mưh chă tơ mang lăng gô đei tơ jur kơ jă unh điên tôch ai. Ưh đei iŏk jên điên hăm dôm anih ăn bơ ngai oei hơ drô̆, khăm hơ len ăn dôm bơ ngai đei jâu tơ pŏh jĭ, hơ met ăn bơ ngai jĭ Covid – 19; tơ jur 20% jên điên ăn dôm anih jang pơ gang oei khăm, set hơ len, hơ met ăn bơ ngai đei jâu tơ pŏh jĭ păng bơ ngai jĭ Covid – 19. 

Dơ̆ng: Tơ blơ̆