VOV4.Bahnar - Anih vei lăng kon pơ lei dêh char Dak Lak ‘nao tơ lĕch tơ drong tơ chơ̆t hăm 9 grŭp tơ drong jang tơm bơ̆ jang lơ̆m sơ năm hŏk 2021 – 2022. Kiơ̆ kơ ‘noh, hơ dai hăm tơ drong kơ chăng pơ jing păng tơ lĕch trong jang sơ năm hŏk 2021 - 2022 ‘lơ̆ng, lăp hăm tơ drong jĭ hơ buh COVID-19 tơ̆ tơ ring, rim hnam trưng kăl kơ dăr hơ len kăt tơ jur păng ‘mơ ‘met tôch ai rim jên jang vă vei sơ đơ̆ng, ưh kơ hơ tŏk jên nôp hŏk pơ têng hăm sơ năm hŏk 2020 - 2021; đei trong jang tơ gŭm, ưh kơ nôp jên, tơ jur, pơ dui khei ‘năr nôp jên hŏk, tơ gŭm tơ tom hla ar hŏk hăm dôm oh hŏk tro đei tơ drong arih sa mơ mat tat; ưh kơ lê̆ đei ƀôh tơ drong thu jên lơ blŭng sơ năm hŏk.

Kơ dră Anih vei lăng găh pơ tho pơ hrăm Dak Lak pơ lung hŏk tro păng thây kô pơ tho

Hăm dôm tơ ring mơ mat tat, tơ ring groi kông ưh kơ đei tôm tơ drong hiôk pơ tho hŏk trực tuyến, hnam trưng kơ chăng jang hơ dai hăm mĕ ƀă pơ gơ̆r ăn hŏk tro hŏk pơ hrăm hăm dôm trong ‘lơ̆ng vă jang đang trong tơ lĕch jang sơ năm hŏk, vei sơ đơ̆ng ‘lơ̆ng pơ tho pơ hrăm; ưh kơ pơ gơ̆r pơ tho hŏk trực tuyến hăm grŭp mầm non; akŏm jang hơ dai, pơ tho, tơ gŭm mĕ ƀă vei rong, pơ tho hơ ioh tơ̆ hnam kiơ̆ dôm kênh mă lăp.

Thuem: Tơ blơ̆