VOV4.Bahnar - ‘Năr 5-11, Jơ nŭm pơ gơ̆r kon pơ lei dêh char Dak Lak tơ lĕch Tơ drong tơ chơ̆t găh tơ drong ưh kơ thu iŏk jên hŏk ki I sơ năm hŏk 2021 – 2022.  Tơ drong tơ chơ̆t đei khŭl kơ dră chĕp kơ̆l Anih pơ gơ̆r kon pơ lei dêh char Dak Lak tơ lĕch vă tơ jur ƀiơ̆ mơ mat tat ăn kon pơ lei tơ̆ hơ năp đei ƀơm ưh kơ ‘lơ̆ng đơ̆ng jĭ COVID-19.  Kiơ̆ kơ ‘noh, dêh char gô ưh kơ thu iŏk jên hŏk ki I, sơ năm hŏk 2021 - 2022 đơ̆ng khei 9 truh đĭ khei 12-2021 hăm hơ ioh mẫu giáo, hŏk tro phô thŏng, bơ ngai hŏk kơ rim anih pơ tho pơ hrăm hơ nơ̆ng kiơ̆ tơ drong jang pơ tho pơ hrăm phô thŏng lơ̆m dêh char. Jên bơ̆ jang kiơ̆ đơ̆ng jên jang kơ teh đak, hơ met ăn jên asong thim găh jên kla hơ nơ̆ng hlôi hơ len lăng hăm jên thu iŏk hŏk ki I sơ năm hŏk 2021 – 2022 ăn rim anih pơ tho pơ hrăm kơ teh đak kiơ̆ klaih song jên jang tơ lĕch ăn. Tơ drong tơ chơ̆t âu kŭm pơ trŭt rim anih jang pơ tho pơ hrăm mầm non, pơ tho pơ hrăm phô thŏng ‘ngoăih kơ teh đak pơ gơ̆r đei trong jang tơ gŭm ưh kơ iŏk, tơ jur jên hŏk ki I sơ năm hŏk 2021 – 2022.

Thuem: Tơ blơ̆