VOV4.Bahnar - Pôk rơih bơ ngai tang măt Kuô̆k hô̆i jăl XV păng bơ ngai tang măt Jơ nŭm pơ gơ̆r kon pơ lei jơ̆p tơ ring đơ̆ng 2021-2026 ‘nŏh jĭ tơ drong chinh trĭ tôch gĭt kăl. Tơ̆ Dak Nông, Anĭh vei lăng pôk rơih dêh char oei akŏm jơ hngâm pơ tho ăn dôm anĭh jang, khul grŭp, tơ ring tơ rang adrin hơ met mă ‘lơ̆ng păng trŏ hăm tơ drong hơ găt đơ̆ng khôi luơ̆t.

Gơ nơm jang ‘lơ̆ng tơ drong tơ roi tơ băt găh pôk rơih bơ ngai tang măt Kuô̆k hô̆i jăl XV păng bơ ngai tang măt Jơ nŭm pơ gơ̆r kon pơ lei jơ̆p tơ ring đơ̆ng 2021-2026 mă lơ bơ ngai tăh hla tơ̆ tơ ring hơ tăih yăih, tơ ring mơ mat tat kơ dêh char Dak Nông gơ̆h băt hơ dăh hơ năp jang păng tơ drong đei yoa đơ̆ng kơ dih. Bơ ngai tăh hla H’Plơ tơ̆ plei Sa Pa, xăh Thuận An, apŭng Dak Mil ăn tơ băt, kon pơ lei hơ len tôch kơ jăp găh tơ drong hop akŏm, pơ ma nuh păng dôm tơ drong tơ roi găh dôm bơ ngai lĕch pơ jei pơm bơ ngai tang măt Kuô̆k hô̆i, Jơ nŭm pơ gơ̆r kon pơ lei jơ̆p tơ ring:

“Nhôn hơ pơi ‘mĕh, dôm bơ ngai đei kon pơ lei rơih, đe sư hơ nhăk đĭ tơ drong rơ gei đơ̆ng kơ dih bơ̆ jang tưk tơ iung pơ lei pơ la, tơ gŭm ăn tĕh đak roi đunh roi tŏk pran, kon pơ lei roi đunh roi pơ drŏng, mŭk drăm roi sơ đơ̆ng ‘lơ̆ng.”

Anih MTTQ dêh char Dak Nông pơ gơ̆r hop akŏm pơ ma nuh ‘măng mă 2

Kiơ̆ yă Nguyễn Thị Thu Hường, Kơ dră chĕp kơ̆l Anĭh jang nô̆i vŭ dêh char, Thư ký Anĭh vei lăng pôk rơih dêh char Dak Nông ăn tơ băt, truh dang ei, tơ drong hơ met ăn pôk rơih bơ ngai tang măt Kuô̆k hô̆i jăl XV păng bơ ngai tang măt Jơ nŭm pơ gơ̆r kon pơ lei jơ̆p tơ ring đơ̆ng 2021-2026 tơ̆ dêh char Dak Nông đei tơ lĕch tôch tơ tom, trŏ hăm tơ drong hơ găt đơ̆ng luơ̆t, lăp hăm trong jang đơ̆ng Jơ nŭm pơ gơ̆r Pôk rơih tĕh đak păng anĭh vei lăng pôk rơih jơ̆p tơ ring. Lơ̆m dêh char pơ jing đei 2 Anĭh pôk rơih bơ ngai tang măt Kuô̆k hô̆i păng 14 Anih pôk rơih bơ ngai tang măt jơ nŭm pơ gơ̆r kon pơ lei dêh char, 8 Anih vei lăng pôk rơih Jơ nŭm pơ gơ̆r kon pơ lei apŭng, 71 Anĭh vei lăng pôk rơih Jơ nŭm pơ gơ̆r kon pơ lei tơ̆ xăh. Đơ̆ng rŏng kơ hop akŏm pơ ma nuh ‘măng mă 2, dêh char Dak Nông rơih 11 ‘nu bơ ngai lĕch pơ jei pơm bơ ngai tang măt Kuô̆k hô̆i jăl XV, 96 ‘nu bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei dêh char, 507 ‘nu bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei apŭng, 3.244 ‘nu bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei xăh, đơ̆ng 2021 – 2026:

“Dang ei Anih pơ gơ̆r kơ dêh char kŭm nhen Anih vei lăng pôk rơih dêh char pơ tho ăn dôm apŭng, dôm xăh kiơ̆ hơ năp jang đơ̆ng kơ dih tơ lĕch trong pơ jing dôm anih pôk rơih. Đơ̆ng rŏng kơ ‘nŏh xăh vă athei apŭng chih hơ dăh dôm tơ ring tăh hla păng pơ jing khul tăh hla. Găh tơ drong hơ len năng tơ mam drăm kŭm nhen tơ lĕch jang păng dôm tơ drong jang nai, nhôn roi tơ ƀôh ăn Anih vei lăng pôk rơih dêh char pơ tho ăn dôm tơ ring jang kiơ̆ luơ̆t kŭm nhen dôm nơ̆r pơ tho đơ̆ng trung ương, nơ̆r pơ tho đơ̆ng dêh char vă pơ gơ̆r trŏ trong tơ lĕch lơ̆m tơ drong pôk rơih”.

Kŭm hăm ‘nŏh, Khul kơ dră chĕp kơ̆l Anih Mặt trận Tổ quốc jơ̆p tơ ring jang hơ doi, hơ met tôm tơ drong kăl vă pơ gơ̆r ‘lơ̆ng dôm ‘măng tơ ƀâp bơ ngai tăh hla, roi tơ băt dôm bơ ngai lĕch pơ jei pơm bơ ngai tang măt Kuô̆k hô̆i jăl XV păng bơ ngai tang măt Jơ nŭm pơ gơ̆r kon pơ lei dêh char đơ̆ng 2021-2026. Dơ nŏ anih vei lăng kon pơ lei tơ̆ xăh hơ nơ̆ng hơ len năng, chih hơ met hơ năn bơ ngai tăh hla ‘nao tơ plih anih oei, dôm bơ ngai oei hrŭl vă rim bơ ngai tăh hla gơ̆h năm pôk rơih ngăl.

Ƀok Nguyễn Phú Nghĩ, Phŏ Kơ dră Anih MTTQ dêh char Dak Nông ăn tơ băt, Hop akŏm pơ ma nuh tơ̆ dôm tơ ring lơ̆m dêh đei pơ gơ̆r rơ đăh ‘lơ̆ng, trŏ jơ năr, trŏ tơ drong hơ găt đơ̆ng luơ̆t păng đei bơ ngai tăh hla tôch lăp đon:

“Tơ drong roi tơ băt bơ ngai lĕch pơ jei pơ gơ̆r tơ̆ anih jang, khul grŭp păng iŏk nơ̆r tơ gop đơ̆ng bơ ngai tăh hla tơ̆ anih sư jang păng nơ̆r pơ ma thim đơ̆ng kơ dră chĕp kơ̆l đei bơ̆ jang tôch ‘lơ̆ng. Dôm bơ ngai đei rơih lĕch pơ jei tôch đei kon pơ lei lui, tơ ƀôh hơ dăh lơ̆m tơ drong lĕch pơ jei khul kơ dră chĕp kơ̆l hlôi rơih trŏ bơ ngai vă gơ̆h đei dôm bơ ngai lĕch pơ jei pơm bơ ngai tang măt Kuô̆k hô̆i păng Jơ nŭm pơ gơ̆r kon pơ lei jơ̆p tơ ring tơ găl hlŏh. Găh tơ drong hơ găt hăm bơ ngai lĕch pơ jei kŭm tôch kơ jung, athei hŏk jrŭ, trŏ sơ năm, rơih kăn ƀô̆ roi ‘lơ̆p ƀiơ̆ kŭm đei jang ‘lơ̆ng ngăl vă dơ̆ng tang păng pơm ‘lơ̆ng ăn tơ drong ‘mĕh vă trŏ luơ̆t đơ̆ng kon pơ lei”.

Lơ̆m jơ hơ len năng tơ drong hơ met ăn pôk rơih ‘năr 23/3, ƀok Phùng Khánh Tài, Phŏ Kơ dră Anih Trung ương MTTQ Việt Nam athei dêh char Dak Nông hơ nơ̆ng jang ‘lơ̆ng tơ drong tơ roi tơ băt găh pôk rơih. MTTQ dêh char athei pơ gơ̆r ‘lơ̆ng hop akŏm pơ ma nuh ‘măng mă 3 vă rơih, chih măt dôm bơ ngai tơ găl hlŏh lĕch pơ jei tang măt tơ̆ Kuô̆k hô̆i păng Jơ nŭm pơ gơ̆r kon pơ lei jơ̆p tơ ring đơ̆ng 2021 – 2026, atŭm hăm ‘nŏh athei jang ‘lơ̆ng tơ drong pơ tâp pơ hrăm ăn bơ ngai jang lơ̆m anih vei lăng pôk rơih jơ̆p tơ ring:

“Inh athei dêh char jang ‘lơ̆ng tơ drong sek tơ lang kơ thơ tơ kêng đơ̆ng kon pơ lei. Hơ nơ̆ng hơ len năng bơ ngai vang lĕch pơ jei pơm bơ ngai tang măt Kuô̆k hô̆i kŭm nhen bơ ngai tang măt Jơ nŭm pơ gơ̆r kon pơ lei jơ̆p tơ ring, mă loi ‘nŏh dôm tơ drong chinh trĭ adrol sơ̆ păng dang ei đei ƀơm truh dôm tơ drong kon pơ lei pơ ma tơ lĕch lơ̆m ‘măng tơ ƀâp bơ ngai tăh hla. Inh tơ chĕng ‘nâu jĭ kênh tôch gĭt kăl vă đei trong lăng hơ len mưh ƀôh kăl. Nhôn athei dêh char băt hơ dăh rim tơ drong găh kon pơ lei, dôm tơ drong pơm tơ tŏ đon mưh tơ kêng lơ bơ ngai, tơ drong ƀơm truh tơ̆ tĕh, cham char dăh mă dôm tơ drong ƀơm truh tơ drong lui khop. Dêh char athei tơ rĕk vă sek tơ lang, ưh gơ̆h lê̆ khul kơ nê̆ iŏk yoa pơ ma kư̆ kă kơ plăh khei ‘năr gĭt kăl dang ei, ƀơm ưh ‘lơ̆ng truh tơ drong pôk rơih.”

Dang ei tơ drong hơ met ăn Năr chơt hơ iă kơ đĭ đăng kon pơ lei oei hơ nơ̆ng đei dêh char Dak Nông tơ lĕch jang ‘lơ̆ng, trŏ tơ drong hơ găt, lăp hăm khôi luơ̆t păng năr đei tơ lĕch. Tơ drong tơm đơ̆ng dêh char ‘nŏh pôk rơih 1 ‘măng đei tôm kơ sô̆ hơ găt păng rơih đei dôm bơ ngai tang măt rơ gei, đei jơ hngâm đon ‘lơ̆ng hlŏh, tơ găl dơ̆ng tang găn tơ drong ‘mĕh vă păng tơ drong pơm tơm đơ̆ng kon pơ lei.

Tuấn Anh: Chih

Dơ̆ng: Tơ blơ̆