VOV4.Bahnar - Đơ̆ng blŭng sơ năm truh dang ei, Khul kon pơ lei jang chŭn mir dêh char Dak Nông hlôi tơ gŭm ăn kon pơ lei tŏk iŏk jên vă hơ tŏk tơ drong jang xa, rei pơ tăm păng rong kon tơ rong. Kơ sô̆ jên asong tŏk iŏk đei tơ lĕch đơ̆ng Anih mong jên tơ gŭm ăn kon pơ lei jang chŭn mir kơ Khul jang chŭn mir dêh char hăm hlŏh 1 ti 300 triu hlak jên.

Đơ̆ng kơ sô̆ jên âu, Khul kon pơ lei jang chŭn mir dêh char tơ lĕch ăn 11 unh hnam tơ̆ xăh Dak N’drót, apŭng (Dak Mil) tŏk iŏk 500 triu vă rong bơ be; 11 unh hnam tơ̆ xăh Trường Xuân (Dak Song) tŏk iŏk 300 triu vă hơ met ming, vei rong ‘long chĕh phe; 10 unh hnam tơ̆ trhĭ trơ̆n Dak Mâm (Krông Nô) tŏk iŏk 500 triu vă pơ tăm ming păng vei rong ‘long chĕh phe. Vă rim unh hnam đei tŏk iŏk jên tơ mât jên trŏ tơ drong jang ngăl kơ na đei yoa lơ. Tơ̆ hơ năp kơnh, Khul kon pơ lei choh jang xa dêh char vă hơ nơ̆ng vei lăng tơ drong iŏk yoa jên đơ̆ng tŏk iŏk, tơ gŭm ăn dôm unh hnam jang xa đei iŏk yoa kơ jăp ‘lơ̆ng.

Dơ̆ng: Tơ blơ̆