VOV4.Bahnar - Gô đei trong jang tơgŭm djru pơtho pơhrăm, atŏk tơdrong jang gơ̆h hơgei vă vei kơ jăp tơdrong jang ăn bơngai jang tŏk bŏk tơ ƀơ̆p tơnap tap kơ yươ đei ƀơm kơnê̆ đơ̆ng jĭ hơbuh Covid-19. ‘Nau jing nơ̆r apĭnh athei đơ̆ng Dơnŏ anĭh tơm vei lăng Tơdrong jang - Bơngai rơka păng Tơpôl tŏk bŏk pơtrŭh ăn Khŭl kơdră chĕp pơgơ̆r Tĕh đak lăng hơlen. Kiơ̆ kơ ‘nŏh, akŏp măt bơngai đei vă tơgŭm djru ‘nŏh dang 1 trĭu ‘nu bơngai. Kon jên apĭnh athei tơgŭm ăn hŏk tơdrong jang ‘nŏh 1 trĭu hlak jên lơ̆m 1 ‘nu lơ̆m khei ‘năr đunh hlŏh 6 khei. Akŏp kon jên dang 6.000 ti hlak jên đơ̆ng Hơnĭh mong jên Vei lăng hiong tơdrong jang. Găh tơdrong jang kiơ̆ tơgum djru pơtho pơhrăm, trong pơjing jang au athei ‘moi kiơ̆ iŏk yua bơngai jang tơ ƀơ̆p tơnap tap kơ yuơ đơ̆ng jĭ Covid-19. Tơchĕng hơdrol, tơdăh đei drơ̆ng kiơ̆, trong jang tơgŭm djru au đei tơlĕch jang kiơ̆ hloi lơ̆m jăl 1 dăh mă jăl 2 sơnăm au.

Tơblơ̆ nơ̆r: Amazưt