VOV4.Bahnar - Giĕng âu ki, Anih MTTQ Việt Nam dôm dêh char lơ̆m tơ ring Tây Nguyên hlôi pơ gơ̆r đang hop akŏm pơ ma nuh ‘măng mă 3 vă chih măt dôm bơ ngai đei tôm tơ drong kăl lĕch pơ jei pơm bơ ngai tang măt Kuô̆k hô̆i jăl XV, bơ ngai tang măt Jơ nŭm pơ gơ̆r kon pơ lei dêh char đơ̆ng 2021-2026. Tơ drong hơ met ăn năr pôk rơih tŏk bŏk đei dôm tơ ring pơ gơ̆r kiơ̆ tơ drong hơ găt đơ̆ng khôi luơ̆t.

Tơ̆ hop akŏm pơ ma nuh ‘măng mă 3 kơ dêh char Gia Lai, đơ̆ng rŏng kơ pơ ma nuh đĭ đăng bơ ngai vang hop akŏm drơ̆ng nơ̆r chih măt 10 ‘nu bơ ngai vă lĕch pơ jei pơm bơ ngai tang măt Kuô̆k hô̆i jăl XV. Hop akŏm asong ăn 3 ‘nu bơ ngai sut măt lĕch pơ jei lơ̆m tơ drong pôk rơih Kuô̆k hô̆i jăl XV. Hop akŏm hlôi chih hơ dăh măt 119 ‘nu bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei dêh char Gia Lai jăl XII, đơ̆ng 2021-2026. Kiơ̆ yă R’chăm Hdéo, jang lơ̆m Anih vei lăng pôk rơih dêh char Gia Lai, dôm bơ ngai apinh sut măt ưh pă đei lĕch pơ jei pơm bơ ngai tang măt Kuô̆k hô̆i jăl XV tơ tă đơ̆ng kơ dih ‘mĕh ngăl, ưh đei ƀơm kơ nê̆ truh tơ drong rơih hơ met, dăh mă kơ sô̆ bơ ngai vă lĕch pơ jei pơm bơ ngai tang măt quốc hội jăl XV.

“Kiơ̆ đơ̆ng hop akŏm pơ ma nuh ‘măng mă 3, inh ƀôh đei 3 ‘nu bơ ngai apĭnh sut măt lĕch đơ̆ng hơ năn vă pơ jei pơm bơ ngai tang măt Kuô̆k hô̆i jăl XV âu, đơ̆ng hop akŏm pơ ma nuh păng iŏk nơ̆r tơ gop đơ̆ng bơ ngai tăh hla ‘nŏh 3 ‘nu bơ ngai âu lăp hăm tơ drong hơ găt vă lĕch pơ jei pơm bơ ngai tang măt Kuô̆k hô̆i ră mă lei đe sư apĭnh sut măt kơ dih kơ na athei năng kăl tơ drong ‘mĕh vă kơ dih đơ̆ng đe sư, tơ drong ưh đei ƀơm truh tơ drong rơih hơ met khul jang tang măt quốc hội kơ dêh char Gia Lai”

Dak Nông pơ gơ̆r hop akŏm pơ ma nuh ‘măng mă 3

Ƀok Đinh Ngọc Hải, Phŏ Kơ dră Anih MTTQ Việt Nam dêh char Gia Lai tơ roi, đơ̆ng rŏng kơ hop akŏm pơ ma nuh mă 3, Anih vei lăng pôk rơih dêh char Gia Lai hlôi chih đang hơ năn 14 ‘nu bơ ngai lĕch pơ jei pơm bơ ngai tang măt Kuô̆k hô̆i jăl XV (lơ̆m nŏh đei 4 ‘nu bơ ngai đơ̆ng Trung ương, 10 ‘nu bơ ngai tơ̆ tơ ring).

“Đơ̆ng rŏng kơ hop akŏm pơ ma nuh mă 3 vă chih hơ dăh hơ năn bơ ngai lĕch pơ jei tơ pă, kiơ̆ đơ̆ng nŏh Khul kơ dră chĕp kơ̆l Anih MTTQ Việt Nam dêh char păng khul kơ dră pơ gơ̆r dôm tơ ring vă jang hơ doi hăm Dơ nŏ anih vei lăng kon pơ lei jơ̆p tơ ring chih tơ lĕch trong ăn dôm bơ ngai lĕch pơ jei pơm bơ ngai tang măt Kuô̆k hô̆i kŭm nhen tang măt Jơ nŭm pơ gơ̆r kon pơ lei dêh char tơ ƀâp bơ ngai tăh hla vă krao hơ vơn pôk rơih vă tơ ƀôh hơ dăh hơ năp jang đơ̆ng kơ dih. Kiơ̆ đơ̆ng nŏh tơ gŭm ăn bơ ngai tăh hla băt hơ dăh rim bơ ngai tơ dăh đei pôk rơih ‘nŏh athei jang mă tơ năp ‘lơ̆ng lơ̆m tơ drong pơ jing khul kơ dră pơ gơ̆r jơ̆p tơ ring”

Tơ̆ Dak Lak, giĕng âu ki, kŭm hăm pơ gơ̆r hop akŏm pơ ma nuh mă 3, Anih Mặt trận Tổ quốc Việt Nam dêh char hlôi roi hơ dăh tơ drong iŏk nơ̆r tơ gop, đon lui đơ̆ng bơ ngai tăh hla tơ̆ tơ ring oei xa, drơ̆ng nơ̆r chih hơ năn dôm bơ ngai đei tôm tơ drong tơ găl pơm bơ ngai tang măt Kuô̆k hô̆i jăl XV, păng bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei dêh char đơ̆ng 2021 - 2026. Kiơ̆ đơ̆ng pơ ma nuh lơ̆m hop akŏm măng mă 3, dôm bơ ngai truh hop akŏm drơ̆ng nơ̆r chih măt 11 ‘nu bơ ngai lĕch pơ jei pơm bơ ngai tang măt Kuô̆k hô̆i jăl XV (tam mă jô̆ 4 ‘nu bơ ngai đơ̆ng Trung ương); drơ̆ng nơ̆r asong ăn 1 ‘nu bơ ngai sut măt ưh pă lĕch pơ jei pơm bơ ngai tang măt Kuô̆k hô̆i jăl XV. Hop akŏm oei drơ̆ng nơ̆r chih măt 125 ‘nu bơ ngai đei tôm tơ drong kăl vă lĕch pơ jei mât jang lơ̆m Jơ nŭm pơ gơ̆r kon pơ lei dêh char, jăl jang đơ̆ng 2021 – 2026. Yă Nguyễn Thị Thu Nguyệt, Kơ dră vei lăng khul drŏ kăn Việt Nam dêh char Dak Lak ăn tơ băt: Vă iŏk đei 30% bơ ngai lĕch pơ jei ‘nŏh jĭ drŏ kăn pơm bơ ngai tang măt Jơ nŭm pơ gơ̆r kon pơ lei jơ̆p tơ ring, Khul hlôi pơ gơ̆r 4 lăm pơ tâp pơ hrăm tơ̆ dôm apŭng Krông Ana, Ea Hleo păng plt Buôn Ma Thuột, ‘măn ăn hlŏh 300 ‘nu drŏ kăn ‘măng mă blŭng lĕch pơ jei pơm bơ ngai tang măt Jơ nŭm pơ gơ̆r kon pơ lei jơ̆p tơ ring:

“Nhôn akhan ‘nâu jĭ tơ drong tơ gŭm tôch tơ tom ăn dôm bơ ngai lĕch pơ jei găh đon hlôh vao, trong krao hơ vơn mưh lĕch pơ jei vă pơm ‘lơ̆ng dôm bơ ngai lĕch pơ jei hlôh vao, sơ đơ̆ng jơ hngâm mât lơ̆m tơ drong krao hơ vơn pôk rơih truh âu, gơ̆h đei jơ nei ‘lơ̆ng hlŏh. Kăl loi kiơ̆ kơ sô̆ đei tơ lĕch, adrin iŏk đei 30% bơ ngai lĕch pơ jei ‘nŏh jĭ drŏ kăn pơm bơ ngai trang măt Jơ nŭm pơ gơ̆r kon pơ lei jơ̆p tơ ring”.

Tơ̆ Dak Nông, đơ̆ng rŏng pơ ma nuh, đĭ đăng bơ ngai vang hop akŏm drơ̆ng nơ̆r chih măt dôm bơ ngai đei tôm tơ drong kăl lĕch pơ jei pơm bơ ngai tang măt Kuô̆k hô̆i jăl XV đei 10 ‘nu (lơ̆m nŏh đơ̆ng Trung ương 2 ‘nu, tơ̆ tơ ring ‘nŏh 8 ‘nu) păng drơ̆ng nơ̆r asong ăn 3 ‘nu bơ ngai sut măt, ưh đei vang lĕch pơ jei pơm bơ ngai tang măt Kuô̆k hô̆i jăl XV. Atŭm hăm ‘nŏh, Hop akŏm oei chih măt 88 ‘nu bơ ngai đei tôm tơ drong kăl vă lĕch pơ jei pơm bơ ngai tang măt Jơ nŭm pơ gơ̆r kon pơ lei dêh char Dak Nông, jăl jang 2021-2026. Ƀok Điểu Xuân Hùng, Kơ dră Anih Mặt trận Tổ quốc Việt Nam dêh char Dak Nông ăn tơ băt:

“Đơ̆ng rŏng hop akŏm pơ ma nuh ‘măng mă 3 tôch, hơ năp jang đơ̆ng Khul kơ dră chĕp kơ̆l Anih MTTTQ dêh char Dak Nông nhôn ‘nŏh vă chih pơ kĕh hơ năn dôm bơ ngai lĕch pơ jei pơm bơ ngai tang măt Kuô̆k hô̆i jăl XV păng Jơ nŭm pơ gơ̆r kon pơ lei dêh char. Nhôn vă jur tơ̆ tơ ring hơ len năng mă trŏ kơ sô̆ kon pơ lei, bơ ngai tăh hla mưh ƀôh đei tơ drong ưh kơ lăp vă pơm ‘lơ̆ng ăn tơ drong pôk rơih gơ̆h tơ păt ‘lơ̆ng, trŏ luơ̆t. Hơ dai hăm tơ drong dăr lăng, hơ len dơ̆ng rim bơ ngai lĕch pơ jei pơm bơ ngai tang măt Kuô̆k hô̆i jăl XV păng Jơ nŭm pơ gơ̆r kon pơ lei jơ̆p tơ ring nhôn vă krao hơ vơn ăn bơ ngai lĕch pơ jei 1 anih tŏ sĕt hlŏh ‘nŏh 10 ‘măng, oei bơ ngai tang măt Jơ nŭm pơ gơ̆r kon pơ lei dêh char 1 anih tŏ sĕt hlŏh ‘nŏh 5 ‘măng kiơ̆ luơ̆t hơ găt”.

Đơ̆ng rŏng kơ hop akŏm pơ ma nuh ‘măng mă 3, Anih vei lăng pôk rơih dôm dêh char lơ̆m tơ ring Tây Nguyên hơ nơ̆ng pơ gơ̆r dôm hơ yak đơ̆ng rŏng dơ̆ng vă dôm bơ ngai lĕch pơ jei chă krao hơ vơn đe tơ gŭm mưh pôk rơih, roi tơ băt hăm bơ ngai tăh hla găh tơ drong vă jang đơ̆ng kơ dih mưh pơm bơ ngai tang măt tơ dăh đei pôk rơih păng pơ ma nuh găh dôm tơ drong mă bơ ngai tăh hla tơ rĕk truh.

Dơ̆ng: Tơ blơ̆