VOV4.Bahnar - Tơ̆ hop akŏm mă 2, Kuô̆k hô̆i jăl XV ‘nao âu hlôi tơ chơ̆t lơ tơ drong gĭt kăl kơ tĕh đak, lơ̆m nŏh đei lơ tơ drong ƀơm truh tơ̆ tơ ring kon kông păng groi kông. Dôm bơ ngai tang măt Kuô̆k hô̆i păng bơ ngai tăh hla lơ̆m tĕh đak păng tơ̆ Tây Nguyên hơ mĕng ‘nâu jĭ tơ drong jang ‘lơ̆ng kĕ tơ iung tơ drong jang găh hơ drĕch kon kông păng tơ drong tơ gŭm ăn hơ drĕch kon kông đơ̆ng 2021 - 2030.

Tŏk bŏk khei 10 sơ năm 2021 âu ki, Phó Thủ tướng Phạm Bình Minh kĭ tơ drong tơ chơ̆t kơ sô̆ 1719/QĐ-TTg tơ lĕch Tơ drong jang tơm kơ tĕh đak atŏk tơ iung mŭk drăm tơ pôl tơ̆ tơ ring kon kông păng groi kông đơ̆ng 2021-2030, jăl I: đơ̆ng sơ năm 2021 truh sơ năm 2025. Tơ̆ Hop akŏm mă 2 (Kuô̆k hô̆i jăl XV) pơ gơ̆r lơ̆m khei 11/2021 âu ki kŭm ‘măn lơ jơ pơ ma nuh găh tơ drong gĭt kăl ‘nâu. 1 kơ sô̆ bơ ngai tang măt Kuô̆k hô̆i tơ ƀôh đon hơ pơi ‘mĕh Khul kơ dră tĕh đak pơ tho ăn dôm anih tơm, anih jang kơ pal jăh tơ lĕch trong pơm hla ar đei ƀơm truh, vă đơ̆ng noh, dôm dêh char đei trong jang rơ đăh vă jang kiơ̆; pơ jing tơ drong ‘lơ̆ng vă tơ gŭm ăn kon pơ lei kon kông tơ̆ tơ ring hơ tăih yăih jang tŏk. ‘Nâu kŭm jing tơ drong hơ pơi ‘mĕh đơ̆ng bơ ngai tăh hla păng dôm dêh char groi kông.

Ƀok Y Thi Niê – Phŏ Kơ dră Anih vei lăng hơ drĕch kon kông apŭng Krông Pach, dêh char Dak Lak akhan: “Khul kơ dră tĕh đak, Kuô̆k hô̆i tơ lĕch lơ tơ drong jang vă atŏk tơ iung tơ ring kon kông, groi kông. Apŭng Krông Pach kŭm apinh dêh char, Trung ương tơ rĕk truh, pơ jing tơ drong ‘lơ̆ng vă hơ met ming trong nơ năm lơ̆m apŭng, man hơ bong đak, chĕng hơ met tĕh choh jang xa, pơ jing dôm tơ ring jang kơ măy, chă tơ drong jang mă ưh ‘nŏh pơ tho tơ drong jang ăn mih ma duch nă tơ̆ âu vă bơ ngai Rađe kŭm hăm kon pơ lei kon kông nai đei tơ drong jang, đei jên khei pơ ‘nhŏ ăn tơ drong arih xa.”

‘Măng hop akŏm mă 2 Kuô̆k hô̆i jăl XV

Hơ tuch khei 11/2021, Dơ nŏ anih vei lăng kon pơ lei dêh char Dak Lak tơ lĕch trong vă jang atŏk tơ iung mŭk drăm, tơ pôl tơ̆ tơ ring kon kông păng groi kông đơ̆ng 2021 – 2030. Kiơ̆ kơ ‘nŏh, Dơ nŏ anih vei lăng kon pơ lei dêh char Dak Lak athei dôm anih jang kơ pal, tơ ring tơ rang akŏm jơ hngâm bơ̆ jang mă ‘lơ̆ng, đei yoa Tơ drong jang tơm kơ tĕh đak atŏk tơ iung mŭk drăm, tơ pôl tơ̆ tơ ring kon kông păng groi kông đơ̆ng 2021 – 2030; hơ nơ̆ng pơm hơ tŏk tơ drong arih xa găh tơ mam drăm, jơ hngâm đon ăn kon pơ lei kon kông.

Tơ rĕk truh tơ drong ‘nâu, ƀok Y Lươm Knul – Phŏ Kơ dră vei lăng kon pơ lei xăh Krông Na, apŭng Buôn Đôn, đei nơ̆r pơ ma: “Vă tơ drong tơ chơ̆t đơ̆ng Kuô̆k hô̆i gơ̆h mât lơ̆m tơ drong arih xa kơ kon pơ lei tơ̆ tơ ring, atŭm hăm ‘nŏh atŏk tơ iung chă tơ mang lăng tơ̆ tơ ring âu, kiơ̆ inh kăl đei đon tơ rĕk truh, pơ tih gia nhen atŏk tơ iung chă tơ mang lăng tơ pôl - “Home Stay”, vei kơ jăp tơ drong juăt ‘lơ̆ng vă pơ vih ăn tơ moi, roi tơ băt dôm tơ mam drăm đơ̆ng kon pơ lei kon kông jang đei. Athei roi tơ băt, pơ tâp pơ hrăm ăn kon pơ lei kon kông vă pơm hơ tŏk đon hlôh vao păng jang chă tơ mang lăng thoi yơ vă gơ̆h đei yoa”. 

Tơ̆ Dak Nông, tơ ring đei hlŏh 40 hơ drĕch hơ drung arih xa hơ dai, kơ sô̆ unh hnam tơ nuh jĭ bơ ngai kon kông oei lơ hlŏh 2 ‘măng kơ sô̆ unh hnam tơ nuh jô̆ atŭm lơ̆m dêh char. Vă bơ̆ jang tơ drong jang tơm kơ tĕh đak atŏk tơ iung mŭk drăm, tơ pôl tơ̆ tơ ring kon kông păng groi kông kơ dêh char Dak Nông đơ̆ng 2021-2025, dêh char apinh Trung ương tơ lĕch hlŏh 3.511 ti hlak jên, lơ̆m nŏh jên Trung ương tơ gŭm hlŏh 2.600 ti, oei đei ‘nŏh jên dêh char, jên đơ̆ng tŏk iŏk păng jên đơ̆ng tơ ra tơ gop. Dêh char oei athei hơ tŏk jên ăn tơ drong jang Chĕng hơ met tơ ring kon pơ lei oei xa păng Tơ drong jang atŏk tơ iung mŭk drăm đơ̆ng choh jang xa, pơ tăm ‘long tơ klep hăm vei lăng bri, pơm hơ tŏk iŏk yoa ăn kon pơ lei.

Um ai tơ ring kon kông tơ̆ dêh char Dak Nông

Yă Thị Djrong (bơ ngai M’Nông) tơ̆ plei Srê 1, xăh Dak Ru, apŭng Dak R’Lấp, dêh char Dak Nông ăn tơ băt, hrei ‘nâu kon pơ lei đei tĕh, mă lei ưh đei jên vă jang xa, ưh gan băt khoa hŏk ki thuơ̆t, kơ na tĕh đak kăl tơ lĕch jên ăn tơ drong jang ‘nâu: “Blŭng a tĕh ‘nŏh bơ̆n đei bơih, bơ̆n đei jơ hngâm jang dơ̆ng. Mă lei athei đei phŏng, đei jên vă jang xa ‘mơ̆i. Tơ dăh đei jên jang bơih ‘nŏh athei pơm thoi yơ vă sư gơ̆h đei yoa ‘lơ̆ng. Jên jang ‘nŏh athei đei anih mong jên tơ gŭm, asong ăn kon pơ lei tŏk iŏk. Hơ drĕch, tơ đăh ‘long ‘nŏh đei Khul kon pơ lei jang chŭn mir tơ gŭm ăn. Tơ dăh đei thoi nŏh ‘nŏh nhôn tôch hơ iă, bơ nê lơ tơ pă”. 

Găh trong jang, Dak Nông vă akŏm jơ hngâm chĕng song tĕh choh jang xa; tơ gŭm pơm hơ met hnam hiăh, hơ met anih oei, vei sơ đơ̆ng tơ drong arih xa ăn kon pơ lei chă mât oei kư̆ kă; hơ tŏk jên jang pơm trong, man anih jang pơ yoa ăn tơ drong jang xa, arih xa kơ kon pơ lei; atŏk tơ iung lơ trong jang xa, pơ tăm ‘long mă lăp hăm tơ drong juăt vă kon pơ lei gơ̆h pơm hơ tŏk tơ drong arih xa; tưk tơ iung dôm tơ drong jang pơ tho tơ drong jang xa, vei lăng jơ hngâm pran kŭm nhen tơ gŭm găh pơ tho pơ hrăm ăn kon pơ lei, kon hơ ‘lơ̆p dôm unh hnam bơ ngai kon kông.

Đơ̆ng tơ pă tơ̆ yăn âu, ƀok Điểu Minh – Bí thư Chi ƀô̆ Plei Bu Bir-xăh Quảng Tín, apŭng Dak R’Lấp đei nơ̆r pơ ma: “Găh anih jang kơ pal athei pơ tho tơ ƀôh mă hơ len, mă 1 găh ki thuơ̆t jang ăn kon pơ lei. Kon pơ lei đei bơ ngai băt, bơ ngai tam mă băt trong jang pơ gar. Hăm bơ ngai tam mă băt ‘nŏh athei hơ nơ̆ng jur pơ tho tơ ƀôh ăn đe sư. Kon pơ lei bơ̆n đei pơ gar ‘long mă lei hŭt hŏh đĕch; pơ tăm chĕh phe, pơ tăm ‘long điêu plei ưh kơ lơ, lơ bơ ngai ưh băt trong vei rong; ưh đei pruih pơ gang, săy phŏng ‘nŏh lơ liơ ‘long gơ̆h jing ‘lơ̆ng”. 

Lơ̆m tơ drong jang tơm kơ tĕh đak atŏk tơ iung mŭk drăm tơ pôl tơ̆ tơ ring kon kông păng groi kông kơ dêh char Dak Nông đơ̆ng 2021-2025, dêh char Dak Nông tơ lĕch 1,2 tơ drong tôch rơ đăh ‘nŏh truh sơ năm 2025 iŏk yoa jô̆ păh lăp kiơ̆ kơ̆l bơ ngai hăm kon pơ lei kon kông tŏk tŏ sĕt hlŏh ‘nŏh 1,5 ‘măng pơ têng hăm sơ năm 2020; kơ sô̆ unh hnam bơ ngai kon kông tơ nuh jur đơ̆ng 3% tŏk tơ̆ kơ pal 1 sơ năm; chĕng song đang 90% tơ drong ‘mĕh vă găh tĕh oei, tĕh choh jang xa; hlŏh 95% kon pơ lei kon kông đei yoa đak rơ gŏh.

                                                                                                Quốc Học: Chih

Dơ̆ng: Tơ blơ̆