VOV4.Bahnar - Tơ̆ hop akŏm mă 2 Kuô̆k hô̆i jăl 15, Hla ar chih akŏm nơ̆r pơ ma, apinh đơ̆ng bơ ngai tăh hla păng kon pơ lei gơih ăn Kuô̆k hô̆i yoa Bí thư Trung ương Đảng, Kơ dră Anih Trung ương MTTQ Việt Nam Đỗ Văn Chiến pơ re chih hơ dăh: Bơ ngai tăh hla păng kon pơ lei tôch tơ rĕk truh tơ drong tang găn jĭ Covid-19. Athei đei trong jang mă ‘lơ̆ng, kơ jăp đunh găh vắc-xin, mă loi ‘nŏh vắc-xin ƀet ăn bơ ngai hơ la kơ 18 sơ năm; Tơ rĕk truh tơ drong tơ gŭm ăn bơ ngai vih tơ̆ pơ lei đơ̆ng tơ ring đei jĭ vă jăh đei tơ drong arih xa, jang xa sơ đơ̆ng. Atŭm hăm ‘nŏh hơ len năng tôm tơ drong găh pơ tho păng hŏk trư̆k tuyê̆n ăn hŏk tro.

Bơ ngai tăh hla păng kon pơ lei tơ gŭm ăn tơ drong Đảng, Kuô̆k hô̆i, Khul kơ dră tĕh đak tơ lĕch lơ hla ar pơ gơ̆r, pơ tho trong tang găn jĭ kiơ̆ jơ hngâm đon "tang găn jĭ nhen tơ blăh hơ yăt", năng jơ hngâm pran, tơ drong arih kơ kon pơ lei kăl hlŏh. Dôm tơ drong jang vei sơ đơ̆ng tơ drong arih xa tơ pôl, khăm hơ len, tơ chă, ăn bơ ngai oei hơ drô̆, vei lăng ‘lơ̆ng ăn kon pơ lei đei bơ̆ jang kơ tă tơ̆ tơ ring kiơ̆ trong "năm jơ̆p trong, tơ tĕh rim ‘măng hnam, hơ len năng rim bơ ngai". Trong jang đunh đai păng dôm trong jang tang găn jĭ đei tơ lĕch khei ‘năr âu ki tôch lăp, iŏk đei lơ tơ drong jơ nei hăm lơ trong jang hrĕnh, pran kơ tang mưh chĕp kơ̆l pơ gơ̆r.

Mă lei, bơ ngai tăh hla păng kon pơ lei oei tơ tăm, pơ ngơ̆t: “Bơ ngai tăh hla păng kon pơ lei akhan, tơ drong tang găn jĭ oei đei 1,2 tơ drong ưh kơ ‘lơ̆ng. Tơ drong tơ dra hơ drol tam mă lăp hăm yăn âu. Ƀât lăp, đei tơ ring oei lăng pơ hơi, ưh kơ chăng, bơ̆ jang ưh kơ lăp mưh chĕp kơ̆l, pơ gơ̆r sek tơ lang, hơ met pơ ‘lơ̆ng dôm tơ drong kăl. Oei ưh kơ ‘lơ̆ng lơ̆m tơ drong hơ len năng tơ̆ yăn âu vă tơ lĕch đei trong jang tŏ sĕt khei ‘năr kŭm nhen đunh khei ‘năr găh tơ drong tang găn jĭ hai, jang atŏk tơ iung mŭk drăm, tơ pôl hai. Tơ drong chih tơ lĕch lơ hla ar pơ tho, pơ gơ̆r jang, lơ̆m nŏh đei 1,2 hla ar ưh kơ lăp hăm yăn âu, jang kiơ̆ ưh gơ̆h, pơm mơ mat tat ăn kon pơ lei păng anih tĕch mơ dro. Anih jang pơ gang tơ̆ tơ ring păng tơ drong vei lăng đơ̆ng dôm anih jang kơ pal oei đei lơ tơ drong ưh ‘lơ̆ng, lơ tơ mam kơ măy kơ mŏk pơ yoa ăn jang pơ gang, pơ gang hơ met jĭ, vắc-xin... athei răt iŏk đơ̆ng tĕh đak đe ngăl kơ na tam tom kơ chăng, jên huach tôch lơ”.

Bơ ngai tăh hla oei pơ ngơ̆t yoa GDP 9 khei sơ năm 2021 ưh đei tôm kơ sô̆ hơ găt; tơ drong tơ lĕch jên tơ mât jang kơ tĕh đak hiơ̆ hyĭn; 1,2 tơ drong hơ găt găh jang mŭk drăm, tơ pôl gĭt kăl kơ sơ năm 2021 iŏk đei tŏ sĕt ƀiơ̆ pơ têng hăm Tơ drong tơ chơ̆t đơ̆ng Kuô̆k hô̆i. Khul tĕch mơ dro hơ pơi ‘mĕh Khul kơ dră tĕh đak, dôm tơ ring đei trong jang tơ tom pơih trong chơ chuĕn tơ mam, kơ măy kơ mŏk vă vei kơ jăp tơ drong jang xa, tĕch mơ dro; đei trong tơ gŭm găh thuê̆; tơ jur ƀiơ̆ jên pơ huach, jên athei nôp, jên thuê tĕh; pơ dui khei ‘năr kla hre, tơ jur jên kon; đei trong tơ gŭm vei kơ jăp khul bơ ngai jang…vă anih tĕch mơ dro gơ̆h jang atŏk tơ iung dơ̆ng.

Bơ ngai tăh hla roi tơ ƀôh lơ bơ ngai mơ mat tat tam iŏk đei jên tơ gŭm vă vei sơ đơ̆ng tơ drong arih xa; tơ drong pơm hla ar tơ gŭm oei mơ mat tat, tơ lĕch jên hiơ̆ hyĭn; lơ tơ ring kon pơ lei jang chŭn mir mơ mat tat yoa đơ̆ng jĭ hơ buh tam mă đei tơ gŭm; oei đei tơ drong xa pơ gơ̆m mưh bơ̆ jang vei sơ đơ̆ng tơ drong arih xa tơ pôl, pơm mơ mat tat, tơ tŏ đon kon pơ lei. Kon pơ lei pơ ngơ̆t găh tơ drong ‘lơ̆ng, đei yoa đơ̆ng pơ tho păng hŏk trư̆k tuyê̆n, mă loi hăm hŏk tro jăl 1; tơ drong athei ngôi hŏk hơ nơ̆ng hăm kơ măy kơ mŏk điên tư gô ƀơm ưh ‘lơ̆ng truh jơ hngâm pran đe hŏk tro.

Khul Kơ dră chĕp kơ̆l Anih Trung ương Mặt trận Tổ quốc Việt Nam athei Kuô̆k hô̆i, Khul kơ dră tĕh đak, dôm anih jang kơ pal, tơ ring tơ rang jăh chih tơ lĕch Nơ̆r tơ chơ̆t đơ̆ng Khul kơ dră chĕp kơ̆l Trung ương Đảng mă 4 găh tơ drong tang găn jĭ Covid-19 păng jang tơ iung ming dơ̆ng mŭk drăm tơ pôl.

Ƀok Đỗ Văn Chiến pơ ma: “Sek tơ lang mă ‘lơ̆ng, đunh đai găh vắc-xin, mă loi ‘nŏh vắc-xin ƀet ăn bơ ngai hơ la kơ 18 sơ năm; hơ tŏk jên jang ăn hnam pơ gang tơ̆ tơ ring păng tơ drong jang pơ gang tang găn jĭ; pơ jing đei kơ măy yoa atŭm lơ̆m tĕh đak vă tang găn jĭ Covid-19; tơ rĕk, sek tơ lang ‘lơ̆ng rim tơ drong ƀơm truh tơ drong arih xa tơ pôl, bơ̆ jang, chă tơ drong jang, tơ drong arih xa kơ kon pơ lei; Hơ nhăk kơ măy kơ mŏk jang pơ gang, tơ mam set hơ len jĭ tơ mât lơ̆m hơ năn tĕh đak vei lăng vă vei kơ jăp kơ jă tĕch. Tơ rĕk truh dôm tơ drong tơ gŭm ăn bơ ngai vih tơ̆ pơ lei đơ̆ng tơ ring đei jĭ vă jăh pơm sơ đơ̆ng tơ drong arih xa, jang xa. Hơ len năng tôm tơ drong găh tơ drong ‘lơ̆ng păng đei yoa đơ̆ng pơ tho păng hŏk trư̆k tuyê̆n ăn hŏk tro; đei trong pơ tho ming dơ̆ng ăn hŏk tro, mă loi jĭ hŏk tro jăl 1”.

Khul kơ dră chĕp kơ̆l Anih Trung ương Mặt trận Tổ quốc Việt Nam oei athei tơ lĕch tơ drong jang tơm găh atŏk tơ iung ming dơ̆ng mŭk drăm, jăh tơ lĕch dôm tơ drong tơ gŭm găh jên hu, pơ lung anih tĕch mơ dro, kon pơ lei tơ lĕch jên jang xa, atŏk tơ iung mŭk drăm, ưh lê̆ đei tơ drong pơ juăl găh tĕch mơ dro tơ mam; đei trong tơ gŭm vei sơ đơ̆ng bơ ngai jang ăn anih tĕch mơ dro, dar dĕh pơm hnam oei ăn công nhân bơ̆ jang đunh hăm dôm tơ ring jang kơ măy, hơ met pơ ‘lơ̆ng anih tơ mât jên jang xa, tĕch mơ dro, găn ƀiơ̆ anih tĕch mơ dro tang ‘măng pơ dơ̆h jang; hơ nơ̆ng đei trong jang lăp ‘lơ̆ng vă tang găn kơ jă tơ mam tŏk, pơm ‘lơ̆ng ăn mŭk drăm jăh jang tŏk hơ lơ̆k dơ̆ng.

Đơ̆ng rŏng kơ jơ pơih blŭng, Kuô̆k hô̆i mơ̆ng hla ar tơ roi găh tơ drong dăr lăng, sek tơ lang, tơl tơ blang nơ̆r apĭnh đơ̆ng bơ ngai tăh hla gơih ăn hop akŏm mă 11, Kuô̆k hô̆i jăl 14. Kơ dră Anih vei lăng tơ drong ‘mĕh vă kơ Kuô̆k hô̆i Dương Thanh Bình ăn tơ băt, kiơ̆ đơ̆ng dôm ‘măng tơ ƀâp bơ ngai tăh hla, đei truh 807 nơ̆r pơ ma apinh đei chih akŏm gơih ăn dôm anih jang kơ pal sek tơ lang. Nơ̆r apĭnh đơ̆ng bơ ngai tăh hla ƀơm truh rim tơ drong arih xa tơ pôl, lơ̆m nŏh 1,2 tơ drong hơ nơ̆ng đei bơ ngai tăh hla tơ rĕk truh nhen: Tơ mam drăm, cham char; tơ drong tơ gŭm hăm bơ ngai đei kŏng, bơ ngai jang, vei sơ đơ̆ng tơ drong arih xa tơ pôl; choh jang xa, kon pơ lei jang chŭn mir, tơ ring tơ rang; khul kơ dră pơ gơ̆r păng tơ drong tơ gŭm hăm kăn ƀô̆, bơ ngai jang kơ tĕh đak… Truh dang ei, đĭ đăng nơ̆r apĭng hlôi đei tơl tơ blang.

Ƀok Dương Thanh Bình oei pơ ma tơ lĕch 1,2 nơ̆r apinh, lơ̆m nŏh đei athei dôm anih jang kơ Kuô̆k hô̆i hơ tŏk hlŏh dơ̆ng tơ drong dăr lăng mưh chih hla ar hơ găt luơ̆t; dăr lăng dôm tơ drong ‘nao đei ƀơm truh tơ drong arih xa kơ kon pơ lei: “Dôm khul tang măt Kuô̆k hô̆i, bơ ngai tang măt Kuô̆k hô̆i athei hơ tŏk tơ drong chih akŏm, sek tơ lang kiơ̆ nơ̆r apinh đơ̆ng bơ ngai tăh hla, tơ tom gơih ăn dôm anih jang kơ pal sek tơ lang kiơ̆ tơ drong hơ găt đơ̆ng khôi luơ̆t. ‘Ngoăih kơ ‘nŏh, pơ truh nơ̆r hăm Khul kơ dră tĕh đak pơ tho ăn dôm anih tơm, anih jang kơ pal tơ̆ Trung ương hơ len năng, sek tơ lang dôm nơ̆r apinh oei sek tơ lang, pơm ‘lơ̆ng, sek tơ lang trŏ ƀlep. Atŭm hăm ‘nŏh hơ tŏk tơ drong ‘lơ̆ng mưh chih pơ jing trong chĕp kơ̆l pơ gơ̆r, hơ met pơ ‘lơ̆ng luơ̆t; hơ tŏk tơ drong ‘lơ̆ng mưh chih tơ lĕch tơ drong hơ găt luơ̆t, pơm ‘lơ̆ng, trŏ ƀlep lơ̆m dôm hla ar chih hơ găt luơ̆t”.

Lại Thị Hoa: Chih

Dơ̆ng: Tơ blơ̆