VOV4.Bahnar - Đơ̆ng ‘năr 1/7, Luơ̆t oei sa sơ năm 2020 đei tơ mơ̆t yua, kơ sâp hla ar chih hơ năn ŭnh hnam, kơ sâp hla ar oei sa pơ gia oei gơ̆h yua ding truh đĭ ‘năr 31/12/2022. Anih tơm vei lăng Kŏng an tơ plih trong jang vei lăng kon pơ lei oei sa hăm trong jang ‘noh asong hla ar chih hơ năn ŭnh hnam jing vei lăng điên tư hăm kơ sô̆ băt hơ năn kơ dih, ƀơ̆t doh, rim ‘nu kon pơ lei gô vei sơ đơ̆ng đei kơ sô̆ băt hơ dăh hơ năn kơ dih gô jing tơ khoă vă kon pơ lei bơ̆ jang rim tơ drong pơm hla ar hăm anih jang teh đak mă ư̆h kơ kăl athei tơ ƀôh kơ sâp hla ar chih hơ năn ŭnh hnam dăh mă dôm hla ar nai. Hăm kơ sâp hla ar chih hơ năn ŭnh hnam, kơ sâp hla ar oei sa pơ gia hlôi asong hơ drol kơ ‘năr 1/7, dôm hla ar âu oei gơ̆h yua  nhen hla ar hơ len lăng hơ dăh găh oei sa ding truh đĭ ‘năr 31/12/2022. Mă lei, mư̆h kon pơ lei pơm dôm hla ar chih măt oei sa, hơ met ming tơ drong kơ tơ̆ng ang lơ̆m Hơ nih mong răk găh oei sa, tơ klăh oei sa hơ drô̆, sut chih măt oei sa hơ nơ̆ng, chih măt oei sa pơ gia, pơ dui khei ‘năr oei sa pơ gia, sut chih măt oei sa pơ gia hơ nhăk truh tơ plih kơ tơ̆ng ang lơ̆m kơ sâp hla ar chih hơ năn ŭnh hnam, kơ sâp hla ar oei sa pơ gia ‘noh anih jang kŏng an gô iŏk pơ dreo kơ sâp hla ar chih hơ năn ŭnh hnam, kơ sâp hla ar oei sa pơ gia hlôi asong, bơ̆ jang kiơ̆ hơ met ming, chih tơ roi kơ tơ̆ng ang lơ̆m Hơ nih mong răk găh hơ nih oei sa.

Thuem: Tơ blơ̆