VOV4.Bahnar - Đơ̆ng năr 17/8 trŭh năr 15/9/2021, Dơnŏ anĭh tơm vei lăng jang Kơtơ̆ng ang păng Pơre nơ̆r pơgơ̆r tơdrong jang “Jơhngơ̆m đon ‘lơ̆ng pơyan jĭ hơbŭh, ‘mêm mơnat chă tơgum dĭh băl” hăm kon jên jang trŭh 160 ti hlak jên.  Dơnŏ anĭh tơm vei lăng jang Kơtơ̆ng ang păng Pơre nơ̆r hlôi krao hơvơn păng pơrô̆ athei rim hơnĭh mơdro sa nhen Grup jang VNPT, Viettel Telecom, T&T Group, Dơnŏ anĭh mong jên MBank, Hơnĭh tơm Kong ty Bưu điện Việt Nam, Viettel Post vang iung jang hơdoi hăm tơdrong pơgơ̆r au. Dôm bơngai đei sa hơpăh ‘nŏh bơngai dơnŭh, bơngai tơnap tap đei răm đơ̆ng jĭ hơbuh Covid-19 pơm ăn, tim mă sơng iŏk đei tơnô̆ tơgŭm djru đơ̆ng pơlei tơm Hồ Chí Minh. ‘Moi kiơ̆ hla bơar chĭh hơnăn dôm bơngai đei sa hơpăh kơ yuơ Dơnŏ anĭh Mặt trận Tổ quốc pơlei tơm HCM pơm, Bưu điện Việt Nam (Vietnam Post) hăm Viettel Post gô iung jang hơdoi hăm kơdră tơring păng rim khŭl bơ̆ jang kơ tơring vă pơgơ̆r pôk tơmam drăm ‘nŏh đei rim tơmam drăm sa,phe ƀa nhen 5 kĭ phe, đak rơmă, sĭk, ƀôt ngok, đak tương, tôl, ƀum tây, kơtăp iĕr vă sơđơ̆ng jơ sŏng sa ăn kon pơlei kơ pơlei tơm HCM lơm dôm năr tang găn jĭ.

Tơblơ̆ nơ̆r: Amazưt