VOV4.Bahnar - Lơ̆m khei 9 sơnăm 2021, Kơdră chĕp pơgơ̆r Dơnŏ anĭh vei lăng Kon kông hlôi đei 2 tơdrong tơchơ̆t tơlĕch ăn 1 ti 358 trĭu hlak jên tơgŭm ăn kon kông dơnŭh păng sinh viên Hnam trương Yư̆ ƀĭ Đăi hŏk pơlei tơm Hồ Chí Minh đei tơpŏh jĭ Covid-19. Hrei au, Hơnĭh bơ̆ jang tang măt ăn Dơnŏ anĭh vei lăng Kon kông tơ̆ pơlei tơm Hồ Chí Minh tŏk bŏk hơdrin pơtho tơbăt ăn rim tơring lơ̆m tơring Đông Nam bộ pơgơ̆r tơgŭm djru ƀlep bơngai, ƀlep tơdrong pơkăp, tơtom ăn kon pơlei lơ̆m khei ‘năr tơnap tap kơ yuơ jĭ hơbŭh pơrăm. Jô̆ trŭh đĭ khei 9, rim dêh char Đông Nam bộ đei 10.864 ‘nu kon kông jĭ Covid-19. Dơnŏ anĭh vei lăng Kon kông rim dêh char lơ̆m tơring hlôi chă hơvơn đe tơgum djru păng iung jang năm vei lăng năng tông kon pơlei kon kông tơ̆ rim tơring đei jĭ, tơgop pơm sơđơ̆ng erĭh sa ăn kon pơlei. Hơdrô̆ tơ̆ dêh char Đồng Nai, Dơnŏ anĭh vei lăng Kon kông dêh char pơm tơm, hơvơn đei 3 tân phe tơgŭm atŭm hăm dêh char vei lăng năng tông tơdrong erĭh sa ăn kon kông tơ̆ tơring pơvang tang găn.

Tơblơ̆ nơ̆r: Amazưt