VOV4.Bahnar - Jĭ 1 dêh char đei truh vă jê̆ 50% kơ sô̆ kon pơ lei ‘noh jĭ bơ ngai Jrai păng Bahnar, hloh 10 sơ năm âu ki, anih jang găh pơ tho pơ hrăm dêh char Gia Lai ling lang bơ ngơ̆t truh tơ drong pơ tho păng hŏk nơ̆r Jrai păng Bahnar lơ̆m hnam trưng hŏk jăl 1 hăm tơ drong tơm hơ tŏk ‘lơ̆ng tơ drong hlôh vao lơ̆m kon pơ lei, tơ gop vei răk păng hơ tŏk tơ drong kăp gĭt nơ̆r pơ ma, tơ drong jŏh ayŏ ‘lơ̆ng hơ iă đơ̆ng rim hơ drĕch kon kông Tây Nguyên. Đơ̆ng sơ năm hŏk 2010 - 2011, Anih vei lăng găh pơ tho pơ hrăm dêh char Gia Lai hlôi athei tơ mơ̆t tơ drong pơ tho nơ̆r kon kông lơ̆m trong tơ lĕch jang pơ tho hŏk atŭm kơ jăl hŏk. Truh dang ei, rim hnam trưng adoi tơ lĕch jang pơ tho hŏk kiơ̆ ƀlep tơ drong jang. Kiơ̆ đơ̆ng noh, tơ drong pơ tho hŏk nơ̆r kon kông đei rim hnam trưng proh hơ met jơ năr mă lăp păng pơm kiơ̆ tôm kơ sô̆ tiêt pơ tho kiơ̆ tơ drong hơ găt, pơm lăp ‘lơ̆ng ‘mĕh vă đơ̆ng hŏk tro kŭm nhen mĕ ƀă hŏk tro lơ̆m tơ ring.

Thuem: Tơ blơ̆