VOV4.Bahnar  – Tơ̆ tơring Tây Nguyên, rim tơring hlôi tơlĕch Khei Bơngai Pơm jang hăm lơ tơdrong jang kăp gĭt. Yă Trần Lệ Nhung – Kơdră Anih Axong jang dêh char Gia Lai ăn tơbăt: Vă tơlĕch pơm kiơ̆ đei jơnei Khei Bơngai Pơm jang xơnăm 2021, atŭm hăm tơdrong pơtoi pơgơ̆r dôm tơdrong jang tŏk bŏk oei đei jơnei, đei lơ đoan viên, bơngai pơm jang xơng drơ̆ng, dôm jăl Kŏng đoan lơ̆m dêh char oei akŏm jang kiơ̆ 4 tơdrong jang tơm noh: tơdrong jang “75 rơbâu tơdrong rơgei, yak hloh tơnap, hơtŏk tơ iung”; tơdrong jang “Tơmơ̆ng – Hlôh vao – Vang glơng” hăm đoan viên păng bơngai pơm jang; pơgơ̆r dôm tơdrong jang “Bơnê kơ bơngai pơm jang” păng pôk hơpăh hăm đoan viên, bơngai pơm jang truh dôm jăl jang Kŏng đoan lơ̆m dêh char. Ƀơ̆t 'măng âu Anih Axong jang dêh char Gia Lai hlôi tơlĕch Khei Pơm jang găh vei xơđơ̆ng pơm jang xơnăm 2021 pơgơ̆r đơ̆ng năr 1 truh năr 31/5 hăm hơnăn “Hơtŏk xơkơ̆t, hơlen dôm tơdrong răm găh vei xơđơ̆ng tơdrong pơm jang păng tơdrong vang jang dôm bơngai vei xơđơ̆ng pơm jang sinh viên”.

Tơ̆ lêh iung pơm jang, Anih Axong pơm jang dêh char hlôi axong 530 trĭu hlj đơ̆ng Jên mong Tơpôl vă tơgŭm man 'nao păng ming hơmet  17 “Bơbŭng hnam Kŏng đoan” ăn đoan viên, bơngai pơm jang tơnap găh hnam oei.  

- Lăp đơ̆ng rŏng pơm lê̆h tơlĕch jang kơ Hơnĭh vei lăng tơdrong jang dêh char Gia Lai, Kŏng đoan Công ty ksu Chư̆ Păh hloloi pơgơ̆r pơm lê̆h tơlĕch jang Khei Kŏng nhân păng Khei Iung jang găh sơđơ̆ng tơdrong jang sơnăm au, Kŏng đoan Kŏng ty gô đei tơdrong pơgơ̆r nhen: pơgơ̆r pơrô̆ tơbăt kơtang ăn trŭh bơngai jang găh tơdrong gĭt kăl kơ Năr Apŭng plĕnh tĕh jang; pơrô̆ tơroi tơbăt găh trong jang tơ iung pơjing kŏng nhân Việt Nam kiơ̆ Tơdrong tơchơ̆ty pơm lê̆h hop akŏm XIII kơ Đảng; pơgơ̆r tơ ƀơ̆p pơma dơnŭh hăm bơngai jang hăm hơnăn “Mơ̆ng-băt hơdăh-Vang tơgŭm djru”; atŏk kơtanglăng hơlen, dăr lăng rim tơdrong hơmơt đei tơdrong ư̆h sơđơ̆ng lơ̆m chă jang păng vang iung nămđơ̆ng dôm bơngai jang vei lăng sơđơ̆ng tơdrongjang. ‘Ngoăih kơ ‘nŏh, Kŏng đoàn Kŏng ty jei gô pơgơ̆r lơ ‘măng năm ngôi, pôk tơmam drăm ăn kŏng nhân ŭnh hnam tơnap tap; tơ iung pơjing păng pơjao mĭnh ƀar tŏ hnam “Pơbŭng hnam tơnŏ Kŏng đoàn” ăn ŭnh hnam kon nhân oei tơnap tap găh hnam oei.

Lan – Zưt chih păng pơre nơ̆r