VOV4.Bahnar - Giĕng âu ki, pơ gơ̆r hop akŏm trư̆k tuyê̆n lơ̆m tĕh đak pơ tôch tơ drong pôk rơih bơ ngai tang măt Kuô̆k hô̆i jăl XV păng bơ ngai tang măt Jơ nŭm pơ gơ̆r kon pơ lei jơ̆p tơ ring đơ̆ng 2021-2026. Vang hop akŏm tơ̆ Anih pơih pơ dăh tơ̆ Hnam Kuô̆k hô̆i đei Kơ dră Kuô̆k hô̆i adrol ki, kơ dră chĕp kơ̆l dang ei, kơ dră chĕp kơ̆l adrol ki kơ Đảng, tĕh đak; kơ dră chĕp kơ̆l, bơ ngai tang măt ăn dôm anih tơm, anih jang kơ pal păng dôm tơ ring lơ̆m tĕh đak. Kơ dră Kuô̆k hô̆i Vương Đình Huệ, Kơ dră Anih vei lăng pôk rơih tĕh đak pơ ma hơ dăh, bơ̆n gơ̆h hơ iă hăm tơ drong iŏk đei lơ̆m tơ drong pôk rơih âu ki.

Tơ̆ hop akŏm, dôm bơ ngai tang măt pơ ma nuh găh dôm tơ drong hơ iă, trong jang rơ gei, mă loi ‘nŏh ƀât mă tơ drong jĭ oei tôch krê hơ mơt ki. Kiơ̆ Kơ dră vei lăng kon pơ lei dêh char Bắc Giang Lê Ánh Dương, tơ drong kăl hlŏh đơ̆ng tơ drong pôk rơih đei pơ gơ̆r đang ‘lơ̆ng đei lơ tơ drong tơ gop gĭt kăl, tơ ƀôh hơ dăh đon jang rơ gei, hơ bĕch hơ bal đơ̆ng dôm Grŭp pôk rơih tơ̆ dêh char Bắc Giang:

“Dôm bơ ngai jang lơ̆m grŭp pôk rơih hăm hơ băn ao vei lăng kơ dih kâu, đei klăih song pơm lơ grŭp, hơ nhăk ba kơ thŭng mong kơ phĭu năm truh jơ̆p kueng ƀôt, rim unh hnam kon pơ lei oei ăn oei nhơ drô̆, bơ̆ jang klĕp ‘lơ̆ng. Tơ drong jang tôch glĕh hrat, mă lei dôm bơ ngai jang lơ̆m grŭp pôk rơih păng bơ ngai tăh hla hơ nơ̆ng tơ ƀôh jơ hngâm đon yak hlŏh mơ mat tat vă pơ gơ̆r đang ‘lơ̆ng tơ drong pôk rơih. Dôm um rup ‘nŏh jing tôch ‘lơ̆ng lơ̆m jơ hngâm đon kon pơ lei, jing um rup ưh đei lai yơ hiơt lơ̆m dôm ‘măng pôk rơih tơ̆ tơ ring”.

Hop akŏm trư̆k tuyê̆n lơ̆m tĕh đak pơ tôch tơ drong pôk rơih Bơ ngai tang măt Kuô̆k hô̆i jăl XV păng Bơ ngai tang măt Jơ nŭm pơ gơ̆r kon pơ lei jơ̆p tơ ring đơ̆ng 2021-2026

Năng dơ̆ng tơ drong jơ nei đơ̆ng tơ drong pôk rơih bơ ngai tang măt Kuô̆k hô̆i jăl XV, bơ ngai tang măt Jơ nŭm pơ gơ̆r kon pơ lei jơ̆p tơ ring 2021-2026 kiơ̆ tơ drong lăng hơ len năng Mặt trận Tổ quốc Việt Nam, ƀok Đỗ Văn Chiến, Kơ dră Anih Trung ương Mặt trận Tổ quốc Việt Nam akhan:

“Kiơ̆ dôm tơ drong chinh trĭ gĭt kăl kơ Đảng păng tĕh đak păng tơ drong jang tang găn jĭ Covid-19 tơ̆ tĕh đak bơ̆n ăn ƀôh kăn ƀô̆, bơ ngai jang kơ tĕh đak păng bơ ngai jang lơ̆m rim Anih Mặt trận đơ̆ng trung ương truh tơ̆ tơ ring, hlôh vao hơ dăh nơ̆r Ƀok Hô pơ tho: Ƀônh dang yơ ưh đei kon pơ lei kŭm mơ mat. Hơ nat dang yơ đei kon pơ lei kŭm kĕ”.

Pơ ma pơ tôch hop akŏm, Kơ dră Kuô̆k hô̆i Vương Đình Huệ, Kơ dră Anih vei lăng pôk rơih tĕh đak akhan, hop akŏm tơ chĕng, hăm tơ drong pơ gơ̆r tôch kơ jăp đơ̆ng Anih tơm Chinh trĭ, Ban Bí thư, tơ drong chĕp kơ̆l pơ gơ̆r bơ̆ jang tôch tơ năp, rơ gei đơ̆ng Kuô̆k hô̆i, Anih Trung ương Mặt trận tổ quốc Việt Nam, rim anih jang kơ pal, dôm khul grŭp vei lăng pôk rơih đơ̆ng Trung ương truh tơ ring, tơ drong pôk rơih bơ ngai tang măt Kuô̆k hô̆i păng bơ ngai tang măt Jơ nŭm pơ gơ̆r kon pơ lei jơ̆p tơ ring đơ̆ng 2021-2026 đei pơ gơ̆r đang ‘lơ̆ng hơ iă găh lơ tơ drong, pơm lăp hăm kon pơ lei pơm tơm, hơ tŏ băl, trŏ khôi luơ̆t, sơ đơ̆ng, gơ̆h ‘mơ ‘met păng tơ pă jing Năr chơt hơ iă kơ đĭ đăng kon pơ lei.

Hop akŏm oei chih iŏk đei 5 ƀai hŏk gĭt kăl, ‘nŏh jĭ: tơ iung jơ hngâm pran đơ̆ng tơ guăt đĭ đăng kon pơ lei, jơ hngâm pran đơ̆ng tơ guăt hơ drĕch hơ drung păng tơ drong lui khop, đon lui đơ̆ng kon pơ lei, đon hlôh vao, vang jang tôch ‘lơ̆ng đơ̆ng rim anih jang chinh trĭ lơ̆m tơ drong pôk rơih ‘nŏh jĭ tơ drong tơm kăl hlŏh, pơm ‘lơ̆ng ăn tơ drong jơ nei đơ̆ng pôk rơih. Kơ dră Kuô̆k hô̆i Vương Đình Huệ, Kơ dră Anih vei lăng pôk rơih tĕh đak pơ ma hơ dăh:

“Athei jang ‘lơ̆ng dôm tơ dron g jang chă rơih bơ ngai jang; đơ̆ng hop akŏm pơ ma nuh, chă rơih bơ ngai lĕch pơ jei, iŏk nơ̆r tơ gop đơ̆ng bơ ngai tăh hla hăm bơ ngai lĕch pơ jei, krao hơ vơn pôk rơih vă rơih đei dôm bơ ngai tang măt tơ găl hlŏh, lăp hăm dôm tơ drong hơ găt. Chă rơih bơ ngai vang mât jang lơ̆m dôm grŭp pôk rơih tơ̆ tơ ring, jang rơ gei, hlôh vao kơ jăp, đon jang tơ năp ‘lơ̆ng, hlôh vao kloh klĕch luơ̆t pôk rơih, jang hơ gei, vei kơ jăp dôm tơ drong hơ găt mưh tăh hla, jô̆ hơ len kơ phĭu; jang ‘lơ̆ng tơ drong pơ tâp pơ hrăm pôk rơih ăn dôm khul grŭp vei lăng pôk rơih, mă loi ‘nŏh jĭ dôm Grŭp pôk rơih”. 

Kơ dră Kuô̆k hô̆i Vương Đình Huệ, Kơ dră Anih vei lăng pôk rơih tĕh đak iung pơ ma lơ̆m hop akŏm

Kơ dră Kuô̆k hô̆i Vương Đình Huệ, Kơ dră Anih vei lăng pôk rơih tĕh đak pơ ma hơ dăh, bơ̆n gơ̆h hơ iă hăm dôm tơ drong iŏk đei lơ̆m tơ drong pôk rơih âu ki. Mă loi, ƀât mă oei mơ mat tat yoa đơ̆ng jĭ hơ buh, tơ drong jơ nei đơ̆ng pôk rơih roi tơ ƀôh hơ dăh hlŏh dơ̆ng jơ hngâm pran đơ̆ng tơ drong ‘mêm tĕh đak, tơ drong tơ guăt 1 ƀơ̆r đon, tơ drong adrin, pơ hnŏng yak tŏk hlŏh mơ mat tat păng đon hmăng jang tŏk kơ dih đơ̆ng hơ drĕch Việt Nam, akŏm kơ jăp lơ̆m đon lui đơ̆ng kon pơ lei hăm Đảng pqăng tĕh đak păng khul kơ dră chĕp kơ̆l pơ gơ̆r tĕh đak bơ̆n.

Kiơ̆ Kơ dră Kuô̆k hô̆i Vương Đình Huệ, tơ̆ hơ năp kơnh, tơ drong jang kăl đei tơ lĕch hăm Kuô̆k hô̆i jăl XV păng Jơ nŭm pơ gơ̆r kon pơ lei jơ̆p tơ ring ‘nŏh tôch trăp trĭn, tôch gĭt kăl athei jăh bơ̆ jang mă ‘lơ̆ng đơ̆ng dang ei hloi. Kăl loi athei akŏm jơ hngâm pơ gơ̆r mă ‘lơ̆ng hop akŏm ‘măng mă 1 kơ Kuô̆k hô̆i jăl XV. ‘Nâu jĭ hop akŏm tôch gĭt kăl hăm tơ drong jang tơm ‘nŏh set hơ len, tơ chơ̆t găh khul grŭp păng bơ ngai jang tih lơ̆m tĕh đak; hơ len năng, tơ chơ̆t 1,2 tơ drong jang, trong vă jang tih kơ tĕh đak ăn 05 sơ năm truh nhen: Trong jang atŏk tơ iung mŭk drăm, tơ pôl, trong jang jên hu, tơ mât jên jang đunh păh lăp păng 1,2 tơ drong jang tơm kơ tĕh đak đơ̆ng 2021-2025.

Dơ̆ng: Tơ blơ̆