VOV4.Bahnar - Bơ̆ jang kiơ̆ nơ̆r pơ tho đơ̆ng Thủ tướng tĕh đak, Anih jang kơ Khul kơ dră tĕh đak ‘nao đei hla ar chih găh tơ drong hơ len năng kơ sô̆ hơ iŏh pơ ti yoa đơ̆ng jĭ COVID-19 păng tơ lĕch trong tơ gŭm tơ̆ hơ năp kơnh vă ưh đei hơ iŏh pơ ti yơ ưh iŏk đei tơ drong pơ ngơ̆t, vei rong.

Hla ar chih gơih ăn Kơ dră tơm vei lăng tơ drong jang xa, linh jĭ rơ ka păng tơ pôl, chih hơ dăh: ‘Măng jĭ hơ buh COVID-19 tơ pŏh dơ̆ng mă 4 tơ̆ Việt Nam hăm pơ rang jĭ Delta tơ pŏh tôch hrĕnh, krê hơ mơt ƀiơ̆ hlôi ƀơm kơ nê̆ truh jơ hngâm pran, tơ drong arih kơ kon pơ lei, mă loi hăm lơ unh hnam pơm ăn kơ hrĕng ‘nu hơ iŏh jing pơ ti, hiong đĭ tơ drong ‘mêm kơ eng, pơ ngơ̆t vei rong đơ̆ng unh hnam păng kơ tum kơ tŏng ‘nhŏng ŏh.

Anih jang kơ Khul kơ dră tĕh đak athei Anih tơm vei lăng tơ drong jang xa, linh jĭ rơ ka păng tơ pôl jang hơ doi hăm dôm tơ ring jô hơ len kơ sô̆ hơ iŏh pơ ti (mĕ dăh mă ƀă, dăh mă pơ ti đĭ mĕ ƀă hloi) yoa đơ̆ng jĭ COVID-19 păng tơ lĕch trong tơ gŭm tơ̆ hơ năp kơnh vă đe ŏh pơ ti oei gơ̆h iŏk đei đon pơ ngơt, vei rong păng đei lơ tơ drong tơ gŭm ‘lơ̆ng hlŏh, đunh đai tôch lăp ăn đe hơ iŏh pơ ti yoa đơ̆ng jĭ COVID-19.

Dơ̆ng: Tơ blơ̆