VOV4.Bahnar - Tam truh 1 khei dơ̆ng vă pơ gơ̆r Hop akŏm ‘măng mă 1 Kuô̆k hô̆i jăl 15. Ưh lăp hơ met pơ kĕh kơ dră chĕp kơ̆l đĕch, hop akŏm âu oei vă hơ len năng 1,2 tơ drong tôch gĭt kăl nai dơ̆ng. Yoa thoi nŏh, Kơ drăKuô̆k hô̆i Vương Đình Huệ athei hơ nơ̆ng hơ met pơ ‘lơ̆ng trong pơ gơ̆r Hop akŏm mă 1 kơ Kuô̆k hô̆i jăl 15 kiơ̆ trong tơ jur ƀiơ̆ jơ năr pơ re dôm hla ar chih tơ roi, hơ tŏk jơ năr tơ roi găh tơ drong hơ len năng mă lăp, vă dôm bơ ngai tang măt Kuô̆k hô̆i đei jơ tơ chĕng hơ len păng tơ gop nơ̆r.

Kiơ̆ tơ drong tơ chĕng, Hop akŏm mă 1, Kuô̆k hô̆i jăl 15 vă bơ̆ jang lơ̆m 11 năr 1 puăt. Lơ̆m nŏh, Kuô̆k hô̆i ‘măng 5 năr ăn tơ drong rơih hơ met bơ ngai jang, ‘măn 4 năr 1 puăt vă hơ len năng dôm hla ar chih tơ roi păng 1,2 tơ drong kăl nai, 1 puăt năr hôp hơ met hơ drol; oei đei dơ̆ng ‘nŏh jĭ jơ pơih blŭng păng jơ pơ tôch hop akŏm păng 1 puăt năr hơ met hiă tơ dăh đei dơ̆ng tơ drong kăl vă pơ ma hơ len.

Tơ̆ hop akŏm, dôm bơ ngai jang lơ̆m Anih chĕp kơ̆l pơ gơ̆r Kuô̆k hô̆i drơ̆ng nơ̆r lêh pơih blŭng hop akŏm ‘măng mă mônh, Kuô̆k hô̆i jăl 15 pơ gơ̆r lơ̆m ‘năr 20/7 truh, hăm tơ drong hơ găt tơ lĕch trong hôp rơih hơ met bơ ngai jang adrol păng pơ ma nuh dôm tơ drong kăl đơ̆ng rŏng. Yoa ‘nâu jĭ hop akŏm mă blŭng hăm lơ jơ năr vă hơ met pơ kĕh bơ ngai jang tih, athei hôp kơ tă tơ̆ hnam hôp hloi. Lơ̆m nŏh, đei dang 500 ‘nu bơ ngai tang măt păng lơ kăn ƀô̆, bơ ngai jang pơ vih ăn Kuô̆k hô̆i, bơ ngai chih hla ar tơ roi. Yoa thoi nŏh, dôm bơ ngai jang lơ̆m Anih pơ gơ̆r athei: jăh hơ met mă ‘lơ̆ng ăn tơ drong tang găn jĭ Covid-19. Lơ̆m nŏh, pơ gơ̆r ƀet vaccine tang găn Covid-19 hrôih ăn dôm bơ ngai tang măt păng khul pơ vih… set hơ len tŏ sĕt hlŏh ‘nŏh 2 ‘măng adrol kơ mât hôp. Găh nŏh dơ̆ng, tơ tă ăn dôm bơ ngai tang măt Kuô̆k hô̆i lê̆ gan tơ ƀâp băl đơ̆ng rŏng dôm ‘măng hop akŏm, kơ lih yoa mă đơ̆ng ƀet vaccine bơih ră mă oei ƀât lăp jĭ oei tơ pŏh đĕch. Yoa thoi nŏh, athei kơ chăng tôch ai lơ̆m tơ drong vang năm Hop akŏm mă 1 Kuô̆k hô̆i jăl 15.

Kơ dră Kuô̆k hô̆i Vương Đình Huệ pơ tho tơ ƀôh trong hơ met ăn Hop akŏm mă mônh kơ Kuô̆k hô̆i jăl 15

Găh jơ năr pơ gơ̆r Hop akŏm mă 1, Kuô̆k hô̆i jăl 15, Kơ dră Kuô̆k hô̆i Vương Đình Huệ tơ lĕch nơ̆r pơ ma: “Akŏm đĭ đăng jơ năr kăl set hơ len dơ̆ng vă tơ chơ̆t. Tơ̆ hop akŏm mă mônh, Kuô̆k hô̆i jăl 14, 10 năr lăp bơ̆ jang hơ drô̆ tơ drong rơih hơ met bơ ngai jang păng roi tơ băt tơ drong jang mŭk drăm tơ pôl, jên hu 6 khei đĕch. Oei hop akŏm ‘măng mă âu bơ̆n đei lơ tơ drong kăl nai hai, tơ drong ‘nâu bơ̆n athei hơ len năng dơ̆ng mă hơ dăh, ‘măng mă âu bơ̆n athei tơ lĕch dơ̆ng trong jang 5 sơ năm, đei hloi trong jang atŏk tơ iung mŭk drăm, tơ pôl 5 sơ năm, hơ len năng dơ̆ng 5 sơ năm adrol ki, păng tơ roi tơ băt vă Kuô̆k hô̆i hơ len, tơ chơ̆t trong jang atŏk tơ iung mŭk drăm, tơ pôl 5 sơ năm đơ̆ng 2021-2025, păng trong jang găh jên hu 5 sơ năm. Jô̆ hơ len mă ‘lơ̆ng, ưh đei lê̆ jăl adrol ki tơ pŭ ăn jăl đơ̆ng rŏng âu dơ̆ng”.  

Kơ dră Kuô̆k hô̆i Vương Đình Huệ oei athei hơ nơ̆ng hơ met ming Hop akŏm ‘măng mă 1 kơ Kuô̆k hô̆i jăl 15 kiơ̆ trong tơ jur ƀiơ̆ jơ năr pơ re hla ar tơ roi, hơ tŏk tơ drong hơ len năng vă dôm bơ ngai tang măt đei jơ tơ chĕng hơ len păng tơ gop nơ̆r.

Găh tơ drong vă hop akŏm, kŭm hăm tơ drong rơih hơ met bơ ngai jang, lơ̆m hop akŏm âu, Kuô̆k hô̆i oei hơ len năng dôm hla ar chih tơ roi găh tơ drong jang atŏk tơ iung mŭk drăm, tơ pôl, jên thu mong, tơ lĕch jang kơ tĕh đak 6 khei blŭng sơ năm păng dôm trong vă bơ̆ jang atŏk tơ iung mŭk drăm, tơ pôl, thu mong jên tĕh đak 6 khei hơ tuch sơ năm 2021; kĭ pơ kăp kơ sô̆ jên thu mong, tơ lĕch jang kơ tĕh đak sơ năm 2019; hơ len năng, drơ̆ng nơ̆r dôm tơ drong tơ chơ̆t đơ̆ng Kuô̆k hô̆i găh tơ drong chih pơ jing luơ̆t, tơ drong tơ chơ̆t sơ năm 2022, tơ proh trong iŏk yoa tĕh kơ tĕh đak đơ̆ng 2021-2030 păng trong iŏk yoa tĕh kơ tĕh đak đơ̆ng 2021-2025.

Tơ̆ hop akŏm mă 57, Anih chĕp kơ̆l pơ gơ̆r Kuô̆k hô̆i ‘nao âu, dôm bơ ngai tang măt kŭm tơ gop nơ̆r găh tơ drong vă Dăr lăng đơ̆ng Kuô̆k hô̆i, Anih chĕp kơ̆l pơ gơ̆r Kuô̆k hô̆i sơ năm 2022. Kiơ̆ kơ ‘nŏh, dôm bơ ngai jang lơ̆m Anih chĕp kơ̆l pơ gơ̆r Kuô̆k hô̆i drơ̆ng nơ̆r hăm tơ drong dăr lăng đơ̆ng Kuô̆k hô̆i păng Anih chĕp kơ̆l pơ gơ̆r Kuô̆k hô̆i sơ năm 2022 yoa Tổng thư ký Kuô̆k hô̆i tơ lĕch păng akhan tơ drong vă dăr lăng tôch lăp, ‘moi kiơ̆ tơ drong hơ găt mưh bơ̆ jang dăr lăng, tơ drong hơ găt pơ vih ăn tơ drong jang dăr lăng hăm dôm tơ drong tih đei lơ bơ ngai tăh hla tơ rĕk. Dôm bơ ngai jang lơ̆m Anih chĕp kơ̆l pơ gơ̆r Kuô̆k hô̆i drơ̆ng nơ̆r rơih 4 lơ̆m 6 tơ drong vă dăr lăng đơ̆ng Kuô̆k hô̆i păng Anih chĕp kơ̆l pơ gơ̆r Kuô̆k hô̆i.

Pơ ma lơ̆m hop akŏm, Phŏ Kơ dră Kuô̆k hô̆i Đỗ Bá Tỵ pơ ma hơ dăh: “Kŭm hăm tơ drong jang dăr lăng atŭm kơ Kuô̆k hô̆i, athei Anih vei lăng hơ drĕch kon kông păng dôm anih jang adrin tơ lĕch trong tơ blang, dôm tơ drong tih oei pơm tơ tŏ đon, athei pơm hơ dăh hơ năp jang đơ̆ng dôm khul grŭp, rim bơ ngai, tơ chĕng hơ len vă pơ gơ̆r dôm ‘măng pơ ma tơ blang, hơ nơ̆ng tơ plih ‘nao trong jang ăn dôm khul dăr lăng, vang bơ̆ jang hơ doi, hơ tŏk tơ drong ‘lơ̆ng đơ̆ng apinh jet tơ̆ Anih chĕp kơ̆l pơ gơ̆r Kuô̆k hô̆i”.

Yoa jơ năr đơ̆ng dang ei truh năr hop akŏm ưh pă lơ, kơ plăh ‘nŏh oei đei lơ tơ drong athei jang, yoa thoi nŏh, Kơ dră Kuô̆k hô̆i athei dôm anih jang kơ pal kơ chăng jang hơ doi hơ len năng, adrin hơ met pơ ‘lơ̆ng rim tơ drong găh hơ năp jang đơ̆ng kơ dih, jang kĕh ‘lơ̆ng, jăh gơih hla ar ăn dôm bơ ngai tang măt Kuô̆k hô̆i. Kiơ̆ Kơ dră Kuô̆k hô̆i Vương Đình Huệ, đơ̆ng rŏng kơ hop akŏm mă 57, Anih chĕp kơ̆l pơ gơ̆r Kuô̆k hô̆i vă hôp pă 1 ‘măng dơ̆ng chă hơ len năng dôm tơ drong oei đei vă tơ roi ăn Kuô̆k hô̆i lơ̆m hop akŏm mă mônh, lơ̆m nŏh đei lơ tơ drong gĭt kăl ƀơm truh trong jang atŏk tơ iung mŭk drăm, tơ pôl, trong jang jên hu, trong tơ mât jên jang kơ tĕh đak 5 sơ năm… Kơ dră Kuô̆k hô̆i athei Khul kơ dră tĕh đak jăh gơih hla ar hô sơ, hla ar chih tơ pă găh dôm tơ drong ƀơm truh dôm anih jang kơ Kuô̆k hô̆i vă pơ gơ̆r hơ len năng.

Dơ̆ng: Tơ blơ̆