VOV4.Bahnar - Đơ̆ng rŏng 8 năr bơ̆ jang tơ năp ‘lơ̆ng, đei yoa, giĕng âu ki, tơ̆ Hnam Kuô̆k hô̆i, hăm tơ drong pơ gơ̆r đơ̆ng Kơ dră Kuô̆k hô̆i Vương Đình Huệ, Anih chĕp kơ̆l pơ gơ̆r Kuô̆k hô̆i hlôi pơ gơ̆r đang hop akŏm mă 3, jang kĕh dôm tơ drong đei tơ lĕch vă hơ met dôm tơ drong kăl ăn hop akŏm mă 2, Kuô̆k hô̆i jăl 15.

Kơ dră Kuô̆k hô̆i Vương Đình Huệ pơ ma hơ dăh, ‘nâu jĭ 1 lơ̆m dôm ‘măng hop akŏm đunh hlŏh lơ̆m sơ năm đơ̆ng Anih chĕp kơ̆l pơ gơ̆r Kuô̆k hô̆i tơ gop nơ̆r ăn dôm tơ drong kăl vă roi tơ băt ăn Kuô̆k hô̆i lơ̆m hop akŏm mă 2. Kiơ̆ đơ̆ng chă tơ blang, pơ ma nuh tôch hơ len, Anih chĕp kơ̆l pơ gơ̆r Kuô̆k hô̆i drơ̆ng nơ̆r pơm hơ dăh lơ tơ drong đei hơ met tôch hơ len, đei tôm tơ drong kăl vă tơ roi ăn Kuô̆k hô̆i păng dôm tơ drong kăl kơ hơ nơ̆ng chih hơ met pơ ‘lơ̆ng dơ̆ng.

Anih chĕp kơ̆l pơ gơ̆r Kuô̆k hô̆i pơ tôch hop akŏm mă 3

Hăm tơ drong chih pơ jing luơ̆t, tơ̆ hop akŏm, tơ̆ hop akŏm, Anih chĕp kơ̆l pơ gơ̆r Kuô̆k hô̆i mơ̆ng păng tơ gop nơ̆r ăn 6 khôi luơ̆t oei chih pơ jing. Anih chĕp kơ̆l pơ gơ̆r Kuô̆k hô̆i tơ chĕng ‘lơ̆ng tơ drong jang hơ doi đơ̆ng anih chih păng dôm anih jang kơ Kuô̆k hô̆i hăm đon jang tôch tơ năp, đơ̆ng hrôih, đơ̆ng hơ tăih mưh vă chih hơ met ăn dôm kơ luơ̆t. Tơ drong ‘nâu tơ ƀôh hơ dăh đon pơ hnŏng tơ plih ‘nao đơ̆ng Kuô̆k hô̆i, Anih chĕp kơ̆l pơ gơ̆r Kuô̆k hô̆i, Anih vei lăng hơ drĕch kon kông păng dôm anih jang kơ Kuô̆k hô̆i. Kơ dră Kuô̆k hô̆i athei anih chih hơ nơ̆ng hơ met pơ ‘lơ̆ng, akŏm jơ hngâm chih pơ ‘lơ̆ng dôm kơ luơ̆t, pơm ‘lơ̆ng, gơ̆h drơ̆ng 1 nơ̆r mưh tơ roi ăn Kuô̆k hô̆i păng mưh tơ lĕch yoa, dôm kơ luơ̆t gô pơih tơ ƀôh tơ drong trŏ, trong jang lăp ‘lơ̆ng vă bơ̆ jang đunh đai, jang atŏk tơ iung:

“Anih chĕp kơ̆l pơ gơ̆r Kuô̆k hô̆i drơ̆ng nơ̆r tơ mât dơ̆ng tơ drong chih hơ met ming Luơ̆t Tơ kêng tơ drong yoch sek phak lơ̆m tơ drong jang chih pơ jing luơ̆t, tơ drong tơ chơ̆t sơ năm 2021 vă tơ roi ăn Kuô̆k hô̆i set hơ len, drơ̆ng nơ̆r lơ̆m hop akŏm mă 2 kiơ̆ trong tơ jur ƀiơ̆ năr bơ̆ jang lơ̆m 1 ‘măng hop akŏm. Tơ̆ jơ hop akŏm âu, ‘ngoăih kơ tơ drong tơ gop đơ̆ng Khul kơ dră tĕh đak, ‘nŏh Anih chĕp kơ̆l pơ gơ̆r Kuô̆k hô̆i oei tơ gop ăn trong chih jô̆, hơ năp jang chih jô̆ đơ̆ng dôm dêh char, plt găh trung ương nhen dôm tơ drong hơ găt jang mŭk drăm, GIDP, jô̆ păh lăp kiơ̆ kơ̆l bơ ngai păng dôm kơ sô̆ hơ găt nai".

Kơ dră Kuô̆k hô̆i akhan: năng atŭm dôm hla ar chih tơ roi lơ̆m hop akŏm chih ‘lơ̆ng ngăl, tơ ƀôh hơ dăh tơ drong tơ plih roi ‘lơ̆ng lơ̆m tơ drong bơ̆ jang đei tơ roi kŭm nhen dôm tơ drong adrin, đon pơ hnŏng, hơ năp jang păng jơ hngâm jang pran kơ tang đơ̆ng dôm anih jang mưh tơ lĕch jang. Athei Khul kơ dră tĕh đak, dôm anih jang kơ pal akŏm jơ hngâm pơ gơ̆r bơ̆ jang kiơ̆ 1,2 trong jang vă hơ met pơ ‘lơ̆ng dôm tơ drong mơ mat tatm tam mă lăp.

Kơ dră Kuô̆k hô̆i Vương Đình Huệ pơ ma pơ tôch hop akŏm

Mĭnh tơ drong tôch đei bơ ngai tăh hla tơ rĕk ‘nŏh jĭ Anih chĕp kơ̆l pơ gơ̆r Kuô̆k hô̆i asong iŏk 14 rơ bâu 620 ti đơ̆ng jên ‘măn răk kơ trung ương vă pơ yoa ăn tơ drong tang găn jĭ. Tơ blang tơ̆ hop akŏm Kơ dră tơm vei lăng jên hu Hồ Đức Phớc pơ ma hơ dăh: Yoa tơ drong răm đơ̆ng jĭ tôch dêh, rim tơ ring iŏk yoa vă đĭ jên ‘măng răk tơ̆ tơ ring, Jên mong, ‘mơ met păng dôm kơ sô̆ jên trŏ luơ̆t nai vă tơ lĕch ăn tơ drong tang găn jĭ Covid-19 păng tơ gŭm ăn kon pơ lei ƀơm kơ nê̆ đơ̆ng jĭ. Kơ lih thoi nŏh, athei asong iŏk 14 rơ bâu 620 ti đơ̆ng jên ‘măn răk kơ trung ương vă pơ yoa ăn tơ drong tang găn jĭ.

“Anih mong jên vắc-xin truh dang ei đei 8.700 ti. Hơ drô̆ Anih tơm vei lăng jên hu hlôi gơih hlŏh 14 rơ bâu ti vă răt vắc-xin. Vắc-xin dang ei trư lê̆ sô̆ hlôi tơ chơ̆t đei hlŏh 3,5 rơ bâu ti đơ̆ng Anih mong jên văc-xin. Kơ sô̆ oei đei dơ̆ng măn vă răt hơ nơ̆ng dơ̆ng. Mă 2, jên tang găn jĭ Anih tơm vei lăng jên hu đei nơ̆r athei rim dêh char tơ roi, đơ̆ng rŏng iŏk đei nơ̆r tơ roi Anih tơm vei lăng jên hu vă tơ roi ăn Anih chĕp kơ̆l pơ gơ̆r Kuô̆k hô̆i găh jên tang găn jĭ đơ̆ng jên mong kơ dôm tơ ring.”

Tơ̆ hop akŏm, đĭ đăng bơ ngai jang lơ̆m Anih chĕp kơ̆l pơ gơ̆r Kuô̆k hô̆i drơ̆ng nơ̆r asong iŏk 14 rơ bâu 620 ti jên ‘măn răk kơ trung ương vă pơ yoa ăn tơ drong tang găn jĭ, pơm ‘lơ̆ng gơ̆h ‘mơ ‘met, đei yoa trŏ tơ drong hơ găt đơ̆ng Luơ̆t jên hu păng Tơ drong tơ chơ̆t 30 đơ̆ng Kuô̆k hô̆i păng chih tơ roi ăn Anih chĕp kơ̆l pơ gơ̆r Kuô̆k hô̆i kiơ̆ tơ drong hơ găt.

Găh tơ drong dăr hơ len, Kơ dră Kuô̆k hô̆i pơ ma hơ dăh, tơ̆ hop akŏm ‘măng mă âu, Anih chĕp kơ̆l pơ gơ̆r Kuô̆k hô̆i pơ ma nuh, tơ gop nơ̆r găh trong jang tôch rơ đăh păng tơ drong dăr lăng kiơ̆ rim tơ drong jang dăr hơ len tih đơ̆ng Kuô̆k hô̆i păng Anih chĕp kơ̆l pơ gơ̆r Kuô̆k hô̆i lơ̆m sơ năm 2022. Kiơ̆ nơ̆r pơ ma đơ̆ng Anih chĕp kơ̆l pơ gơ̆r Kuô̆k hô̆i, Tổng Thư ký Kuô̆k hô̆i păng dôm Kơ dră chĕp kơ̆l Khul dăr hơ len đei hơ năp jang athei chih pơ kĕh păng kĭ ăn trong jang dăr hơ len vă pơ gơ̆r jang kiơ̆:

“Anih chĕp kơ̆l pơ gơ̆r Kuô̆k hô̆i drơ̆ng nơ̆r athei pơ gơ̆r hop akŏm trư̆k tuyê̆n lơ̆m tĕh đak vă tơ lĕch jang răh, pơ gơ̆r jang răh dôm tơ drong dăr hơ len. Tơ drong tôch ‘nao ‘nŏh krao Anih jô̆ hơ len kơ tĕh đak vang mât jang lơ̆m khul dăr hơ len hloi. Năng tơ drong tơ plih ‘nao tơ drong jang dăr hơ len, hơ tŏk tơ drong đei yoa, ‘lơ̆ng đơ̆ng dăr hơ len ‘nŏh jĭ 1 lơ̆m dôm tơ drong tơm vă tơ plih ‘nao, hơ tŏk tơ drong ‘lơ̆ng đơ̆ng tơ drong jang kơ Kuô̆k hô̆i lơ̆m jăl jang mă 15”.

Pơ ma pơ tôch hop akŏm mă 3, Kơ dră Kuô̆k hô̆i Vương Đình Huệ akhan, tơ̆ hop akŏm, Anih chĕp kơ̆l pơ gơ̆r Kuô̆k hô̆i tơ gop nơ̆r ăn 6 kơ luơ̆t păng lơ tơ drong gĭt kăl nai. Găh tơ drong hơ met ăn hop akŏm mă 2, athei hơ met mă ‘lơ̆ng hlŏh tơ drong vei sơ đơ̆ng, tang găn jĭ, pơm ‘lơ̆ng ăn rim trong jang, sek tơ lang tơ tom ăn dôm bơ ngai tang măt truh hop akŏm. Đơ̆ng rŏng hop akŏm âu dôm anih jang jăh chih pơ kĕh hla ar vă kĭ tơ lĕch, roi tơ băt tơ drong tơ chơ̆t đơ̆ng hop akŏm. 

Dơ̆ng: Tơ blơ̆