VOV4.Bahnar - Kơ dră tơm, Kơ dră Anih vei lăng hơ drĕch kon kông Hầu A Lềnh ‘nao đei jơ bơ̆ jang hăm Anih jang Đảng dêh char, Anih vei lăng kon pơ lei kon pơ lei dêh char Yên Bái găh  jang kiơ̆ tơ drong jang vei lăng hơ drĕch kon kông, tơ drong jang hơ met ăn tơ lĕch jang kiơ̆ Tơ drong jang tơm teh đak hơ tŏk tơ iung mŭk drăm - tơ pôl tơ ring kon pơ lei kon kông păng tơ ring groi kông jăl jang 2021-2030. Tơ̆ jơ bơ̆ jang, Bí thư Đảng dêh char Yên Bái - Đỗ Đức Duy ‘meh vă, Anih vei lăng hơ drĕch kon kông hơ nơ̆ng bơ ngơ̆t truh, tơ gŭm dêh char Yên Bái bơ̆ jang kiơ̆ ‘lơ̆ng trong jang tơ gŭm bơ ngai kon kông tơ̆ hơ năp kơnh; ‘noh jĭ trong jang tơ gŭm hơ vơn kon jên jang; trong jang tơ gŭm ăn Bơ ngai đei đe lui yom; vei lăng bri; hơ tŏk tơ iung choh jang sa tơ klep hăm tơ mang lăng.... Kơ dră tơm, Kơ dră Anih vei lăng hơ drĕch kon kông Hầu A Lềnh athei dêh char Yên Bái hơ tŏk loi dơ̆ng tơ drong jang tơ roi tơ băt, krao hơ vơn hơ tŏk ‘lơ̆ng đon hlôh vao đơ̆ng pơ đĭ khŭl jang chĭnh trĭ găh tơ drong jang vei lăng hơ drĕch kon kông, jang kiơ̆ trong jang tơ gŭm bơ ngai kon kông, pơm tơ drong lăp đon lơ̆m kon pơ lei; dăr hơ len, hơ met ming trong jang tơ gŭm bơ ngai kon kông mă lăp lơ̆m jăl jang ‘nao; tơ chĕng hơ len athei akŏm kon jên jang hơ met pơ ‘lơ̆ng pơ tôch 1,2 tơ drong mơ mat tat tơ̆ tơ ring kon pơ lei kon kông.

Thuem: Tơ blơ̆