VOV4.Bahnar - Dêh char Kon Tum đei trong sơ lam kơ jung hlŏh 292km tơ til hăm 2 tĕh đak Lào păng Campuchia. Lơ̆m dôm sơ năm âu ki, khul linh vei lăng tơ ring sơ lam Kon Tum jang hơ doi hăm Khul kơ dră chĕp kơ̆l 13 xăh, găh 4 apŭng sơ lam kơ dêh char tơ lĕch jang ‘lơ̆ng trong jang tơ gŭm ăn kon pơ lei atŏk tơ iung mŭk drăm tơ pôl. Kŭm hăm ‘nŏh, jang ‘lơ̆ng tơ drong tơ roi tơ băt, krao hơ vơn kon pơ lei vang dăr joang vei lăng trong sơ lam, jrăng sơ lam, pơ jing đei tơ drong jang đĭ đăng kon pơ lei vang vei kơ jăp tơ ring sơ lam.

Sơ năm 2021 âu unh hnam ‘nhŏng A Thá păng mŏ Y Éo tơ̆ plei Pêng Lang, xăh sơ lam Đăk Blô, apŭng Đăk Glei, dêh char Kon Tum sơ lam hăm tĕh đak Lào hlôi tŏk klăih đơ̆ng tơ nuh hin. Mŏ Y Éo chơt hơ iă, đei thoi âu gơ nơm đơ̆ng Đại úy Hoàng Văn Hiệp, Bơ ngai vei lăng Khul krao hơ vơn kon pơ lei, kŭm hăm đe kăn ƀô̆, linh tơ̆ Kơ đông linh Đăk Blô pơm ‘nhŏng ŏh hăm unh hnam, pơ tho tơ ƀôh trong jang atŏk tơ iung mŭk drăm, rong ‘me kon hơ ‘lơ̆p hŏk pơ hrăm:

“Kơ đông linh Đăk Blô, kăn ƀô̆ lơ̆m kơ đông ‘nŏh jĭ ma Hiệp pơ tho tơ ƀôh ăn unh hnam nhôn trong jang xa. Pơ tih gia nhen pơ tăm sâm tơ lei mă ưh ‘nŏh pơ tăm ƀum. Kơ đông, ma Hiệp oei tơ gŭm ăn klo kăn măr nhi rong nhŭng vă jang xa. Unh hnam tôch hơ iă rong đei kon hơ ‘lơ̆p năm hŏk, hnam man kơ jăp ‘lơ̆ng. Klo kăn măr nhi vă adrin jang xa, vă tŏk pran hlŏh dơ̆ng”.

Vei kơ jăp trong jang “3 ‘moi kiơ̆, 4 hơ dai”, ‘nŏh jĭ: “’Moi kiơ̆ anih jang, tơ ring tơ rang păng ‘moi kiơ̆ trong jang đơ̆ng kơ pal tơ jur” păng “Sŏng xa hơ doi, oei xa hơ doi, bơ̆ jang hơ doi păng vang pơ ma nơ̆r kon kông” hăm kon pơ lei, khul linh vei lăng tơ ring sơ lam Kon Tum tơ gop 'lơ̆ng lơ̆m tơ drong jang atŏk tơ iung mŭk drăm, tơ pôl tơ̆ tơ ring sơ lam Kon Tum.

Dôm kơ đông linh vei lăng tơ ring sơ lam tơ̆ hlŏh 292km trong sơ lam hăm 2 tĕh đak Lào păng Campuchia hlôi pơ jao ăn 67 ‘nu đảng viên jur hŏk hôp tơ̆ 58 chi ƀô̆ pơ lei, pơ la păng vă jê̆ 300 ‘nu đảng viên vei lăng vă jê̆ 970 unh hnam; 46 ‘nu kăn ƀô̆, si kuan pơm ‘nhŏng ŏh hăm 38 unh hnam bơ ngai kon kông mơ mat tat vă tơ gŭm ăn đe sư jang tŏk.

Kŭm hăm ‘nŏh, khul linh vei lăng tơ ring sơ lam tơ lĕch lơ trong jang tôch đei yoa tơ gŭm ăn kon pơ lei jang tŏk mŭk drăm, nhen: iŏk rong 75 ‘nu ŏh hŏk tro kiơ̆ tơ drong jang Chông ŏh năm hŏk; iŏk 14 ‘nu mon pơm kon rong kơ đông; tơ gŭm 124 tŏ rơ mo yŏng ăn 67 unh hnam tơ nuh; trong pơ tăm sâm tơ lei, tơ ƀăr... tơ gop pơm hơ tŏk tơ drong arih xa, hơ tŏk iŏk yoa ăn kon pơ lei. Tơ̆ xăh sơ lam mơ mat tat hlŏh kơ dêh char Kon Tum, ƀok A Mon, Phŏ Kơ dră vei lăng kon pơ lei xăh Đăk Blô, apŭng Đăk Glei ăn tơ băt, kăn ƀô̆, linh vei lăng tơ ring sơ lam ling lang jing anih gơ nang yoa tôch sơ đơ̆ng kơ khul kơ dră pơ gơ̆r păng kon pơ lei tơ̆ tơ ring:

“Kơ đông linh Đăk Blô jang hơ doi vang roi tơ ƀôh ăn khul kơ dră tơ ring bơ̆ jang tơ drong jang tơ gŭm ăn kon pơ lei jang tŏk mŭk drăm, tơ pôl, vei sơ đơ̆ng tĕh đak. Mă loi tơ gŭm ăn kon pơ lei rơ mo yŏng, mă 2 jĭ nhŭng yŏng, mă 3 ‘nŏh sim. Hơ dai hăm ‘nŏh jang hơ doi hăm Khul drŏ kăn anih tơm Hà Nội, drŏ kăn dêh char, apŭng păng xăh pơ tăm sâm tơ lei ăn kon pơ lei, vei kơ jăp tơ drong sơ đơ̆ng chinh trĭ tơ̆ tơ ring”.

 Hơ dai hăm tơ drong tơ gŭm ăn kon pơ lei tơ̆ tơ ring sơ lam jang mŭk drăm, pơm hơ tŏk tơ drong arih xa, dôm kơ đông linh vei lăng sơ lam tơ̆ Kon Tum oei jang hơ doi hăm dôm anih jang đảng, khul kơ dră pơ gơ̆r 13 xăh sơ lam hơ tŏk tơ drong tơ roi tơ băt, pơ tho tơ ƀôh luơ̆t ăn kon pơ lei. Mă hơ dăh găh trong jang đơ̆ng Đảng, khôi luơ̆t đơ̆ng tĕh đak tơ jur ƀơm truh tơ ring sơ lam; găh tơ drong tang găn jĭ Covid-19; vang jang ‘lơ̆ng tơ drong Tơ chơ̆t 01, ‘năr 9/1/2015 đơ̆ng Thủ tướng tĕh đak “găh pơ gơ̆r tơ drong jang đĭ đăng kon pơ lei vang vei lăng tĕh đak, vei sơ đơ̆ng tơ̆ tơ ring sơ lam tĕh đak lơ̆m chăl 'nao”.

Đại úy Diệp Xuân Hòa, Bơ ngai jang chinh trĭ tơ̆ Kơ đông linh Đăk Blô, ăn tơ băt: “Lơ̆m dôm sơ năm âu ki, lơ unh hnam păng kon pơ lei tơ̆ xăh Đăk Blô kŭm hăm kăn ƀô̆, linh đơ̆ng kơ đông kĭ pơ kăp vang vei lăng trong sơ lam, jrăng sơ lam. Kiơ̆ đơ̆ng nŏh tơ gop vang vei kơ jăp trong sơ lam, jrăng sơ lam lơ̆m tơ ring yoa Kơ đông vei lăng, vang vei kơ jăp tơ drong sơ đơ̆ng chinh trĭ, sơ đơ̆ng lơ̆m tơ pôl tơ̆ tơ ring yoa Kơ đông vei lăng”.

Lơ̆m 5 sơ năm âu ki, đei 245 khul grŭp pơ lei pơ la; vă jê̆ 720 unh hnam, hlŏh 570 ‘nu bơ ngai tơ̆ dôm xăh sơ lam kơ dêh char Kon Tum vang chih măt vei lăng trong sơlam, jrăng sơ lam... Đại tá Lê Minh Chính, Chính ủy Ƀô đô̆i vei lăng tơ ring sơ lam dêh char Kon Tum ăn tơ băt, khul linh vei lăng tơ ring sơ lam Kon Tum hlôi pơ jing đei tơ drong jang đĭ đăng kon pơ lei vang vei kơ jăp tơ ring sơ lam:

“Anih jang Đảng, Anih chĕp kơ̆l pơ gơ̆r khul linh vei lăng tơ ring sơ lam dêh char hlôi pơ tho ăn dôm kơ đông jang ‘lơ̆ng tơ drong jang roi tơ ƀôh, pơ jing, hơ met kơ jăp anih jang chinh trĭ tơ̆ tơ ring sơ lam. Anih jang Đảng, khul kơ dră păng kon pơ lei tơ̆ dôm xăh sơ lam tôch hơ iă mưh đei lơ tơ drong jang tơ gŭm truh hăm kon pơ lei. Tơ drong arih xa kơ kon pơ lei tơ̆ tơ ring sơ lam roi tŏk ‘lơ̆ng. Hăm dôm tơ drong jang thoi kơ pal hlôi tơ gop ‘lơ̆ng, hơ met kơ jăp tơ drong jang đĭ đăng kon pơ lei vang vei kơ jăp tơ ring sơ lam”.

Hăm dôm tơ drong tơ gop đơ̆ng khul linh vei lăng tơ ring sơ lam Kon Tum, truh dang ei đei 4 xăh sơ lam kơ dêh char Kon Tum iŏk đei tôm 19 tơ drong hơ găt găh pơ jing tơ ring tơ rang ‘nao. 9 xăh oei đei dơ̆ng iŏk đei đơ̆ng 9 tơ drong hơ găt tŏk tơ̆ kơ pal. Kŭm hăm khul kơ dră tơ ring, kăn ƀô̆, linh đơ̆ng dôm kơ đông vang adrin tơ gŭm ăn kon pơ lei pơ jing tơ mam OCOP păng chă trong jang hơ doi, pơm tơ lĕch, tĕch mơ dro tơ mam đơ̆ng choh jang xa đei. Khul linh vei lăng tơ ring sơ lam Kon Tum hơ nơ̆ng chih hơ dăh, vang tơ gop ăn tơ drong jang atŏk tơ iung mŭk drăm, jŏh ayŏ kơ dŏ xoang, pơ jing tơ drong arih xa phĭ tơ nŏ, hiôk chơt ăn kon pơ lei tơ̆ tơ ring sơ lam 'nŏh jĭ tơ drong jang tôch gĭt kăl vă hơ nơ̆ng hơ met kơ jăp, pơ jing tơ drong jang đĭ đăng kon pơ lei vang vei lăng kơ jăp 'lơ̆ng tơ ring sơ lam.

Dơ̆ng: Tơ blơ̆