VOV4.Bahnar – Anih tơm Pơtho Pơhrăm hlôi tơlĕch pơtho hŏk trư̆k tuyê̆n ƀlep hăm tơdrong hơbuh hli đơ̆ng pơrang jĭ, lơ̆m noh tơ̆ dôm tơring hơbuh pơrang jăl 1, 2 (pơkăp nhen tơring xơđơ̆ng jơk păng dreng) noh gơh pơtho hŏk kơtă. Mă lei, lơ tơdrong akhan, vă vei xơđơ̆ng ăn hŏk tro năm hŏk lơ̆m khei năr erih atŭm, hơbĕch hơbal, hơlen tơnăp pơrang jĭ COVID-19 noh atŭm hăm dôm trong jang nhen: ƀet vaccine, “5k”, pơgơ̆r hŏk đơ̆ng ataih... noh hơmet tơdrong hơlen y tê̆ lơ̆m hnam trưng vă pơjing cham char xơđơ̆ng ăn đe hơ ioh năm hŏk tơ̆ hnam trưng.

Kiơ̆ dôm bơngai juăt jang, lơ̆m khei năr pơrang jĭ COVID-19 hơbuh hli, tơdrong vei xơđơ̆ng jơhngơ̆m jăn ăn hŏk tro jing kăp gĭt hloh. Lơ̆m khei năr teh đak bơ̆n pơm kiơ̆ ƀlep erih xơđơ̆ng, hơbĕch hơbal, hơlen pơrang jĭ COVID-19 tơnăp hloh, đei năm hŏk tơ̆ hnam trưng kơtă jing tơdrong hơpơi kăp gĭt đơ̆ng đe hŏk tro noh kăl đei trong jang hrôih hloh vă đe hơ ioh gơh đei năm hŏk. Tơdrong pơkăp tơring vă tơchơ̆t pơtho hŏk trư̆k tuyê̆n dăh mă hŏk kơtă jing trŏ ƀlep hăm khei năr âu. Mă lei, atŭm hăm trong pơkăp tơring noh kăl đei lơ trong jang drơ̆ng minh nai vă hŏk tro năm truh hnam trưng nhen ƀet vaccine, pơgơ̆r hŏk đơ̆ng ataih, “5K”. Kiơ̆ Phŏ Kơdră Anih jang Joh ayŏ - Pơtho pơhrăm kơ Kuôk hô̆i Tạ Văn Hạ, kăl pơgơ̆r tơdrong hơlen y tê̆ hăm hŏk tro tơ̆ hnam trưng hŏk mă kơjăp ƀơ̆t đe hơ ioh năm hŏk hơlơ̆k tơ̆ hnam trưng kơlih “tơring xơđơ̆ng” lơ̆m tang găn păng tơjră pơrang jĭ COVID-19 noh ưh đei xơđơ̆ng ling lang: Pơrang jĭ ưh đei tơring, pơrang ưh đei hơgăt teh pơkăp. ‘Năr âu xơđơ̆ng, mă lei dơning noh jing anih pă đei xơđơ̆ng bơih. Noh truh âu kơnh bơ̆n athei pơkăp hơdăh, nhen tơ̆ Nhâ̆t đei băt găh teh tơdrŏ, mưh nhen teh tơdrŏ noh đe hơ ioh đei hŏk pơhrăm thoi yơ păng pơkăp nhen thoi yơ. Bơ̆n athei pơjing minh tơdrong tơchơ̆t hơdăh lơ̆m hnam trưng, ƀơ̆t đei  F0 noh gô đei hơmet thoi yơ, hăm đe hơ ioh noh thoi yơ, hăm bơngai pơtho noh thoi yơ.

Bơngai jang tang măt ăn Kuôk hô̆i Nguyễn Anh Trí duh akhan, lơ̆m khei năr erih atŭm hăm pơrang jĭ COVID -19 hơbuh hli noh tơdrong hŏk duh athei hơlen truh tơdrong tơplih. Hŏk tro ưh gơh hŏk trư̆k tuyê̆n, hŏk kiơ̆ tivi hơnơ̆ng kơlih ưh kơ xơđơ̆ng tơdrong hlôh vao păng đunh đai kơnh gô pơrăm truh jơhngơ̆m jăn, đon bơnôh đe hơ ioh. Kơyuơ noh, kăl pơjing cham char hnam trưng hŏk xơđơ̆ng vă mĕ ƀă đe hŏk tro xơđơ̆ng ‘nhăk kon năm truh hnam trưng: Tơdrong kăp gĭt noh akŏm đei khul jang y tê̆ kơtă lơ̆m hnam trưng hŏk. ‘Nâu jing y tê̆ tơ̆ tơring. Atŭm hăm rim bơngai pơtho, dôm bơngai rong kon tơrong noh đei minh minh khul jang kăp gĭt noh jing kang ƀô̆ y tê̆. Rim năr pơkă hơyuh tô̆ hơkâu jăn, đang kơ noh pơtho ăn đe hơ ioh băt dôm tơdrong, păng mưh đei nhôm ƀơm jĭ noh xeh ngĭm hloi ăn đe hơ ioh.

Tơ̆ ‘măng hop akŏm ‘năo âu đơ̆ng Khul kơpal teh đak hăm Anih tơm Pơtho Pơhrăm găh pơm kiơ̆ pơkăp ăn xơnăm hŏk 2021-2022 lơ̆m khei năr pơrang jĭ COVID-19 hơbuh hli, Phŏ Thủ tưởng teh đak bơ̆n Vũ Đức Đam hlôi pơkăl Anih Pơtho Pơhrăm jang atŭm hăm dôm anih jang kơpal tơlĕch dôm trong jang vei xơđơ̆ng ăn hŏk tro năm hŏk tơ̆ hnam trưng. Kiơ̆ kơ noh, atŭm hăm tơdrong hơtŏk tenh ƀet vaccine ăn hŏk tro đơ̆ng 12 xơnăm truh hơla 18 xơnăm noh kăl hơlen, hơmet pơ ‘lơ̆ng trong jang y tê̆ lơ̆m hnam trưng, vei xơđơ̆ng ăn hŏk tro năm hŏk lơ̆m khei năr hơbuh pơrang jĭ: Đe hơ ioh hŏk tro, mă hăt noh lơ̆m xơnăm tam mă gơh ƀet vaccine năm hŏk, bơ̆n athei đei trong vei lăng. Pơkăl Anih tơm Y tê̆ hăm Anih tơm Pơtho Pơhrăm chă hơlen lăng dơ̆ng, hơmet tơdrong hơlen y tê̆ lơ̆m hnam trưng, pơm thoi yơ ăn tôm đe hơ ioh hŏk tro adoi đei hơlen vei jơhngơ̆m jăn tơnăp lơ̆m khei năr pơrang jĭ hơbuh hli, trŏ ƀlep hăm pơkăp, bơ̆n truh hnam trưng noh athei xơđơ̆ng păng lơ̆m hnam trưng noh cham char athei xơđơ̆ng.

Dang ei, đei  23 dêh char, plei tơm ăn hŏk tro năm hŏk kơtă, 15 dêh char, plei tơm hŏk kiơ̆ pơkăp trư̆k tuyê̆n păng hŏk kơtă, dôm dêh char, plei tơm nai noh hŏk kiơ̆ trư̆k tuyê̆n păng hŏk kiơ̆ tivi. Lơ tơring tŏk bŏk oei tơplih hŏk kiơ̆ kơtă ƀơ̆t pơrang jĭ đei hơlen tang găn. Lơ bơngai juăt jang akhan, ăh pơgơ̆r đei tơdrong hơlen y tê̆ xơđơ̆ng lơ̆m hnam trưng, tơroh tơroi tơbăt đơ̆ng hŏk tro păng dôm hnam trưng hăm tơdrong chih akŏm tang găn păng tơjră pơrang jĭ kơ tơring păng tơlĕch lơ trong jang nai noh gô pơjing đei cham char xơđơ̆ng ăn hŏk tro năm hŏk tơ̆ hnam trưng.

Lan chih păng pơre nơ̆r