VOV4.Bahnar – Phŏ Thủ tướng juăt jang kơ teh đak bơ̆n Trương Hòa Bình ‘nao pơkăp găh tơdrong hop akŏm Jơnŭm pơgơ̆r jang Trung ương Tơdrong tơchơ̆t jang kơ teh đak găh Hơtŏk tơ iung mŭk drăm tơpôl tơring kon pơlei kon kông păng groi kông jăl xơnăm 2021-2030. Phŏ Thủ tướng pơjao ăn Anih jang găh bơngai kon kông, Anih tơm Axong jang păng dôm anih jang tơm, rim tơring tơrĕk đei xơnong jang hadoi tơnăp, khŏm mă keh đang dôm xơnong jang đei pơjao trŏ khei năr pơkăp, hơmet kơchăng vă tơlĕch jang Tơdrong pơkăp đơ̆ng khei 10/2021. Ƀơ̆t ‘măng âu, bơngai chih kơtơ̆ng ang ăn Rađiô nơ̆r pơma VN đei pơma dơnuh hăm ƀok Hầu A Lềnh – Ƀô̆ trưởng, Kơdră Anih jang găh bơngai kon kông găh tơdrong jang kăp gĭt âu.

- Thơ thâu hơ iă kơlih ih hlôi đei Kuôk hô̆i pôk jang Ƀô̆ trưởng, Kơdră Anih jang găh bơngai kon kông! Hăm xơnong jang kơpal anih jang găh kon kông, hơbŏ ih adoi oei kơchĕng lơ găh tơdrong tơgŭm ăn Khul kơpal teh đak vă pơtoi vei lăng tơnăp hloh ăn kon pơlei kon kông?

Ƀok Hầu A Lềnh: “Nhôn xơkơ̆t, mă mônh noh pơtoi adrin vă pơtoi jang kiơ̆ dôm hnưr kang ƀô̆, đe kơpal, duh nhen khul kang ƀô̆ jang găh tơdrong jang kon kông lơ̆m 75 xơnăm kơ âu, vă pơtoi atŭm hăm dôm anih jang tơm, anih jang Trung ương păng tơring vang tơgŭm ăn kơ Đảng vă đei dôm trong pơkăp jang kăp gĭt hloh, ‘nao hloh, păng tơlĕch jang đei jơnei dôm trong pơkăp jang noh. Mă kăl noh Tơchơ̆t kơsô̆ 88 Kuôk hô̆i găh tơchơ̆t Tơdrong jang mŭk drăm tơpôl tơring kon pơlei kon kông păng groi kông lơ̆m dôm xơnăm đơ̆ng rŏng kơnh”. 

- Ƀô̆ trưởng ăi, đơ̆ng tơpă tơdrong erih păng tơdrong jang noh ih kơchĕng thoi yơ găh trong hiôk păng mŭk drăm hơtŏk kơ tơring groi kông?

Ƀok Hầu A Lềnh: “Găn ga tơdrong hŏk pơhrăm păng pơm jang hơtŏk tơdrong jang tơ̆ tơring kon pơlei kon kông, nhôn ƀôh hơdăh, tơring kon pơlei kon kông oei tơnap tap lơ. ‘Nâu jing tơring đei lơ mŭk drăm păng joh ayŏ tơpôl, vei xơđơ̆ng tơring păng duh jing tơring đei lơ joh ayŏ kon kông kăp gĭt. Dôm mŭk drăm pran noh hlôi đei Đảng, Teh đak xơkơ̆t đơ̆ng lơ jăl jang păng hlôi đei trong pơkăp jang iŏk yua mŭk drăm pran noh vă hơtŏk tơdrong erih ăn kon pơlei. Mă lei, atŭm hăm dôm tơdrong đei jơnei noh duh oei lơ tơnap tap hrat hrĭn. Mă kăl noh găh ming man anih jang, pơtho pơhrăm, tơdrong hlôh vao lơ̆m pơm jang păng tĕch tơlĕch tơmam drăm đơ̆ng kon pơlei”.

- Kiơ̆ kơ ih, trong jang mă yơ trŏ ƀlep lơ̆m khei năr dang ei vă pơm trong ăn dôm tơring tŏk bŏk oei tơnap tap vă gơh hơtŏk tơ iung?

Ƀok Hầu A Lềnh: “Nhôn kơchĕng dôm trong jang tơm adrol hloh noh tơguăt kơjăp lơ̆m trong jang đơ̆ng Đảng, Teh đak. Mă kăl noh Tơchơ̆t Hop akŏm Đảng dôm jăl. Mă hăt noh khei năr tơjê̆ âu, lơ̆m Tơchơ̆t Hop akŏm Đảng jâ̆p teh đak ‘măng mă 13 hlôi tơbang dôm xơkơ̆t kăp gĭt păng hơdăh. Khul kơpal teh đak duh hlôi pơm hơdăh hăm dôm tơdrong pơm jang đơ̆ng Khul Kơpal teh đak. Inh kơchĕng, dôm trong pơkăp jang đơ̆ng Đảng, Teh đak dang ei hlôi tôm tong. Tơdrong oei kăl noh pơgơ̆r jang thoi yơ dôm trong pơkăp jang noh kăl đei akŏm lơ̆m tơdrong jang kơ tôm anih jang chĭnh trĭ lơ̆m khei năr truh. Noh jing dôm trong jang hơdăh gô hơ ‘nhăk ăn kon pơlei hơtŏk hloh găh tơdrong erih.

- Ƀô̆ trưởng hlôi đei Thủ tướng teh đak Phạm Minh Chính pơjao xơnong jang Phŏ Kơdră Jơnŭm pơgơ̆r jang Trung ương Tơdrong tơchơ̆t kơ teh đak, hơtŏk mŭk drăm tơpôl tơring kon pơlei kon kông păng groi kông jăl xơnăm 2021 - 2030, Ƀô̆ trưởng gô vă pơtruh hăm Thủ tướng teh đak tơlĕch dôm trong pơkăp jang yơ vă pơm jang đei jơnei tơchơ̆t jang kăp gĭt âu  kơ teh đak?

Ƀok Hầu A Lềnh: “Hăm tơdrong pơtruh ăn Jơnŭm jang pơkăp kơ teh đak găh tơbang hơlen tơlĕch jang, gô pơtruh ăn Thủ tướng Teh đak tơchơ̆t trong axong jang; păng pơtruh ăn Kuôk hô̆i ăh ‘măng hop akŏm mă blŭng kơ Kuôk hô̆i jăl 15 vă pơkăp axong jang. Dang ei nhôn tŏk bŏk oei hơmet atŭm hăm dôm hla bar kăl đei tơrĕk; đei dôm tơdrong tơchơ̆t, pơkăp axong jên jang, dôm Tơchơ̆t pơtho pơm kiơ̆ tơlĕch jang; pơtho pơjing Jơnŭm pơgơ̆r jang, Anih axong jang; Atŭm hăm noh duh keh đang pơkăp axong jang đơ̆ng dang ei truh xơnăm 2025 đơ̆ng Jơnŭm pơgơ̆r tơdrong pơkăp jang.

Atŭm hăm noh Anih jang găh bơngai kon kông jang hadoi hăm dôm Anih jang tơm, anih jang đei tơrĕk vă chih akŏm hla bar, trong pơkăp jang vă pơtruh ăn Thủ tướng teh đak kĭ pơkăp đơ̆ng dang ei truh khei 9 xơnăm 2021. Hăm minh tơchơ̆t noh ăh xơnăm 2021 gô athei keh đang tôm trong pơkăp jang păng dôm Tơchơ̆t pơtho jang vă pơjing tơdrong drơ̆ng nơ̆r đơ̆ng Trung ương truh tơ̆ tơring, vă tơlĕch tơdrong jang âu đei jơnei kơjăp. 

 - Ŏ ăh, bơnê kơ Ƀô̆ trưởng hơu!

Lan chih păng pơre nơ̆r