VOV4.Bahnar - Trong jang atŏk tơ iung mŭk drăm tơ pôl 5 sơ năm 2021 – 2025 păng trong vă jang truh sơ năm 2030 ‘nŏh jĭ 1 lơ̆m 4 tơ drong gĭt kăl đei hop akŏm Trung ương 3 jăl 13 pơ gơ̆r tơ̆ Hà Nội hơ tuch giĕng âu ki pơ ma nuh. Pơ ma hơ dăh ‘nâu jĭ trong jang tôch gĭt kăl ƀơm truh tơ drong jang kiơ̆ tơ drong tơm, tơ drong jang atŏk tơ iung mŭk drăm tơ pôl mă Hop akŏm Đảng ‘măng mă 13 tơ lĕch, tơ drong đei Tổng Bí thư Nguyễn Phú Trọng pơ ma tơ ƀôh trong lơ̆m ƀai iung pơ ma pơih blŭng hop akŏm. Lơ kăn ƀô̆ Đảng viên, dôm bơ ngai juăt jang mŭk drăm akhan, Anih tơm Chinh trĭ tơ chĕng tôch trŏ găh tơ drong jang mŭk drăm, chinh trĭ, tơ pôl kơ Việt Nam. Kiơ̆ đơ̆ng nŏh pơ ma hơ dăh truh 1,2 tơ drong tơm dơ nơm mă tĕh đak athei akŏm jơ hngâm jang tŏk, tơ ƀôh hơ dăh đon pơ hnŏng đơ̆ng Đảng păng Tĕh đak hơ nơ̆ng bơ̆ jang kiơ̆ 2 tơ drong jang tơm, adrin jang đei dôm tơ drong hơ găt găh mŭk drăm, tơ pôl lơ̆m sơ năm ‘nâu.

Kiơ̆ bơ ngai juăt jang mŭk drăm Đinh Trọng Thịnh, Hop akŏm Trung ương ‘măng mă âu đei lơ nơ̆r tơ gop tôch rơ đăh vă bơ̆ jang ‘lơ̆ng hlŏh tơ drong jang atŏk tơ iung mŭk drăm, tơ pôl lơ̆m 5 sơ năm truh. Atŭm hăm ‘nŏh akhan, ƀât mă oei đei tơ drong jĭ Covid-19, Đảng, tĕh đak đei nơ̆r pơ tho tôch kơ jăp mưh bơ̆ jang 2 tơ drong jang tơm, ‘nŏh jĭ khŏm tang găn jĭ, mă lei athei jang ‘lơ̆ng tơ drong jang atŏk tơ iung mŭk drăm tơ pôl hai, vă pơm hơ tŏk tơ drong arih xa ăn kon pơ lei. Yoa thoi nŏh, mă đơ̆ng jĭ Covid -19 tơ pŏh tôch hơ mơt, đei đunh, mă lei hrei ‘nâu bơ̆n tôch kơ chăng lơ̆m tơ drong tang găn jĭ păng bơ̆ jang atŏk tơ iung mŭk drăm, tơ pôl. Lơ̆m 6 khei âu ki, tơ drong jang tŏk mŭk drăm ‘lơ̆ng mơ̆n, đei truh 5,64% păng lui lơ̆m dôm khei hơ tuch sơ năm 2021, mŭk drăm Việt Nam gô đei lơ tơ drong ‘lơ̆ng vă jang tŏk, rŏ năng jang tŏk hlŏh 7%.  Dôm tơ drong jơ nei âu hlôi păng tŏk bŏk jang kĕh tơ drong jang atŏk tơ iung mŭk drăm mă Đảng păng tĕh đak tơ lĕch ƀât blŭng sơ năm kơ jăl jang 5 sơ năm đơ̆ng 2021-2025.

Bơ ngai juăt jang mŭk drăm Đinh Trọng Thịnh akhan: “Nơ̆r athei đơ̆ng Tổng Bí thư găh tơ plih ‘nao đon tơ chĕng, đon hlôh vao păng bơ̆n athei jang đei yoa ‘lơ̆ng hlŏh lơ̆m 5 sơ năm blŭng a đơ̆ng 2021- 2025 păng klep truh sơ năm 2030, ‘nŏh jĭ 1 lơ̆m dôm nơ̆r athei tôch gĭt kăl vă bơ̆n gơ̆h jing 1 tĕh đak jang kơ măy pơ drŏng. Nhôn akhan, lơ̆m hop akŏm Trung ương 3 âu tôch gĭt kăl vă tơ chơ̆t, kŭm jing trong vă khul kơ dră tơ ring, dôm anih tơm, anih jang kơ pal bơ̆ jang kiơ̆ ‘lơ̆ng dôm nơ̆r athei đơ̆ng Anih tơm Chinh trĭ Trung ương Đảng kŭm nhen đơ̆ng anih jang mŭk drăm vă bơ̆n gơ̆h jang tŏk pran kơ jăp tơ̆ hơ năp ning mônh kơnh.”

Lăp đon hăm tơ drong ‘nâu, ƀok Cao Tiến Tư – Phŏ Kơ dră vei lăng xăh Thuần Mỹ, apŭng Ba Vì, Hà Nội hơ mĕng, hăm tơ drong pơ gơ̆r pran kơ tang đơ̆ng Đảng păng Khul kơ dră chĕp kơ̆l tĕh đak, tĕh đak bơ̆n gô găn đei tơ drong jĭ Covid 19 păng vei kơ jăp tơ drong jang tŏk mŭk drăm:

“Nhôn jĭ đảng viên, kiơ̆ đơ̆ng tơ drong kơ tơ̆ng ang gơ̆h băt đei lơ tơ drong, kŭm nhen đon pơ hnŏng đơ̆ng Đảng, Tĕh đak, Tổng bí thư Nguyễn Phú Trọng pơ tho athei tang găn jĭ hai, jang atŏk tơ iung mŭk drăm hai, ‘nŏh jĭ 1 lơ̆m dôm trong jang tôch trŏ đơ̆ng Đảng, Tĕh đak. Đơ̆ng nŏh pơm hơ tŏk anih dơ̆ng ăn Việt Nam lơ̆m apŭng plenh tĕh; lơ̆m khei ‘năr đei jĭ hơ buh dôm tĕh đak lơ̆m apŭng plenh tĕh jang mŭk drăm jur tôch dêh, mă lei Việt Nam hlôi vei kơ jăp trong jang tŏk mŭk drăm, tôch ‘lơ̆ng. Jĭ đảng viên lăng ƀôh trong jang tôch trŏ đơ̆ng Đảng păng tĕh đak, nhôn bơ̆ jang păng tôch hơ iă mưh trong jang âu đơ̆ng tĕh đak tôch lăp đon kon pơ lei, jơ̆ bơ ngai đảng viên tơ̆ tơ ring vă adrin jang kiơ̆ ‘lơ̆ng trong jang ‘nŏh.”

Mă lei hơ dai hăm dôm tơ drong jang đei, lơ̆m ƀai iung pơ ma ƀât blŭng hop akŏm, Tổng Bí thư Nguyễn Phú Trọng oei pơ ma truh dôm tơ drong tam mă lăp, athei hơ met ming tơ̆ hơ năp kơnh hai. Kiơ̆ bơ ngai juăt jang mŭk drăm Nguyễn Trí Hiếu, bơ̆n ưh gơ̆h lăp pơ ma tơ lĕch dôm tơ drong ‘lơ̆ng đơ̆ng mŭk drăm mă ưh đei pơ ma truh tơ drong tam mă ‘lơ̆ng vă chă trong hơ met ming. Atŭm hăm ‘nŏh akhan, vă hơ nơ̆ng tang găn jĭ đei yoa păng jang atŏk tơ iung mŭk drăm, athei hơ tŏk hrĕnh tơ drong ƀet vaccine Covid -19 ăn đĭ đăng kon pơ lei ‘nŏh jĭ tơ drong tôch gĭt kăl:

“Tơ drong hơ met pơ ‘lơ̆ng anih jang pơ gang, vei lăng jơ hngâm pran ăn đĭ đăng kon pơ lei ‘nŏh jĭ tơ drong tôch gĭt kăl vă gơ̆h jang đei tơ drong jang atŏk tơ iung mŭk drăm păng tang găn jĭ vă mŭk drăm Việt Nam hơ nơ̆ng jang tŏk pran kơ jăp. Bơ̆n athei hơ nơ̆ng hơ met ming trong pơ gơ̆r păng hla ar vei lăng, kơ lih lơ hla ar vei lăng đơ̆ng Việt Nam pơm hiơ̆ hyĭn, mơ mat tat, hơ drom băl jing găn trong anih tĕch mơ dro jang xa. Yoa thoi nŏh, inh athei bơ̆n hơ nơ̆ng hơ met ming trong pơm hla ar vei lăng vă pơ jing tơ drong ‘lơ̆ng ăn tơ drong jang tŏk.”

Đơ̆ng rŏng kơ hop akŏm âu, Khul kơ dră chĕp kơ̆l Trung ương athei: Kơ dră chĕp kơ̆l đảng lơ̆m Khul kơ dră tĕh đak jăh pơ tho ăn dôm anih jang kơ pal, mơ̆ng, jang kiơ̆ ‘lơ̆ng nơ̆r pơ tho đơ̆ng Trung ương vă hơ met pơ ‘lơ̆ng rim hơ yak ăn dôm Hla ar chih Trong jang vă tơ roi ăn Kuô̆k hô̆i set hơ len, tơ chơ̆t. Trong jang atŏk tơ iung mŭk drăm, tơ pôl kăl đei pơih xă, pơm hơ dăh dơ̆ng vă gơ̆h iŏk đei tơ drong drơ̆ng 1 nơ̆r ăn dôm tơ drong tih, tôch gĭt kăl nhen: Tơ drong trŏ ƀlep, lăp ‘lơ̆ng đơ̆ng tơ drong jang tơm, dôm tơ drong hơ găt kăl, dôm tơ drong pơm hơ tŏ ‘lơ̆ng găh tơ drong jang mŭk drăm păng 12 tơ drong jang, trong vă jang tơm đei tơ lĕch. Dôm tơ drong pơ gơ̆r, tơ drong tơ gŭm, trong vă bơ̆ jang đei 6 tơ drong jang tơm păng 3 tơ drong jang gĭt kăl hlôi đei Hop akŏm mă XIII kơ Đảng chih hơ dăh vă jăh hơ met pơ ‘lơ̆ng dôm tơ drong tam mă pran oei đei đơ̆ng sơ̆ lơ̆m tơ drong jang mŭk drăm, vei lăng kơ jăp ‘lơ̆ng ăn tơ drong jang mŭk drăm lơ̆m tĕh đak, tơ plih ‘nao trong jang tŏk, pơm hơ tŏk tơ drong đei yoa, ‘lơ̆ng rơ gei păng kơ sư̆k pơ jei, hơ met pơ ‘lơ̆ng anih tơ mât jên jang xa, tĕch mơ dro, pơ jing tơ drong hiôk hian vă kon pơ lei, anih tĕch mơ dro gơ̆h yak hlŏh dôm tơ drong mơ mat tat yoa đơ̆ng jĭ Covid-19 pơm tơ lĕch.

Dơ̆ng: Tơ blơ̆