VOV4.Bahnar - Giĕng âu ki, pơ gơ̆r Hop akŏm ưh ê kơ Kuô̆k hô̆i (jăl 15) kiơ̆ trong trư̆k tuyê̆n truh hăm 62 anih pơih pơ dăh tơ̆ dôm dêh char, pơ lei tơm (plt). Hop akŏm vă tơ tom set hơ len, tơ chơ̆t 1,2 tơ drong tih, gĭt kăl găh mŭk drăm, tơ pôl, jên hu vă tơ gŭm tơ tom ăn tơ drong Jang tang găn jĭ COVID-19 păng tơ drong jang tơ iung ming păng jang tŏk mŭk drăm tơ pôl.

Tơ drong gĭt kăl blŭng a đei dôm bơ ngai tang măt Kuô̆k hô̆i akŏm pơ ma nuh tơ̆ hop akŏm ưh ê kơ Kuô̆k hô̆i (jăl 15) ‘nŏh: hơ len năng, drơ̆ng nơ̆r ăn Tơ drong tơ chơ̆t găh trong jang jên hu vă tơ gŭm tơ lĕch jang ‘lơ̆ng tơ drong jang tơ iung ming păng jang tŏk mŭk drăm, tơ pôl. Tơ drong tơ chơ̆t âu tôch gĭt kăl vă tơ jră hăm jĭ COVID-19, hơ met pơ ‘lơ̆ng hiong răm, jang tơ iung ming păng jang tŏk pran kơ jăp mŭk drăm, tơ pôl, tơ iung dơ̆ng anih jang xa, sek tơ lang ‘lơ̆ng tơ drong arih xa, pơ yoa ăn tơ pôl. ‘Nâu kŭm jing tơ drong đei lơ bơ ngai tăh hla lơ̆m tĕh đak tôch tơ rĕk.

Jơ bơ̆ jang lơ̆m hop akŏm tơ̆ Hnam Kuô̆k hô̆i

Bơ ngai tăh hla Nguyễn Văn Huy, tơ̆ plt Yên Bái, dêh char Yên Bái pơ ma: “Inh tôch hơ iă đei băt hop akŏm mă âu Kuô̆k hô̆i drơ̆ng nơ̆r ăn lơ tơ drong gĭt kăl, mă loi jĭ dôm tơ drong đei ƀơm truh jĭ COVID-19. Jĭ 1 ‘nu bơ ngai tăh hla tơ̆ tơ ring groi kông, inh ƀôh tơ drong chĕp kơ̆l pơ gơ̆r tôch trŏ, tơ tom đơ̆ng Kuô̆k hô̆i, Khul kơ dră tĕh đak lơ̆m tơ drong tang găn jĭ, mă loi jĭ tơ plih ming trong tang găn jĭ jing ‘moi kiơ̆ sơ đơ̆ng ‘lơ̆ng, gơ̆h tang găn đei tơ drong jĭ COVID-19. Inh kŭm hơ pơi ‘mĕh truh âu kơnh Kuô̆k hô̆i, Khul kơ dră tĕh đak đei trong dăr lăng, vei lăng ‘lơ̆ng hlŏh dơ̆ng vă mưh tơ lĕch dôm tơ drong tơ chơ̆t, tơ drong jang hơ met pơ ‘lơ̆ng hiong răm, tơ iung dơ̆ng mŭk drăm tơ pôl, sek tơ lang ‘lơ̆ng tơ drong arih xa kơ tơ pôl”.

Găh tơ drong kăl đơ̆ng hop akŏm ưh ê âu, Tổng thư ký, Kơ dră vei lăng anih jang kơ Kuô̆k hô̆i Bùi Văn Cường ăn tơ băt: Vă tơ gop ăn tơ drong jang tŏk ming mŭk drăm tơ pôl, Hop akŏm ưh ê đei pơ gơ̆r vă chă đei lơ trong jang tơ tom găh jên hu, tơ gŭm ‘lơ̆ng mưh bơ̆ jang tơ iung ming păng jang tŏk mŭk drăm, tơ pôl; sek tơ lang dôm tơ drong tơ hlăk găh luơ̆t mưh tơ mât jên jang tŏk: “ ‘Măng hop akŏm âu tơ pă mơ̆n tôch gĭt kăl yoa bơ̆n kăl đei 1 trong jang ‘lơ̆ng ƀơm truh tơ drong jang tơ iung ming păng jang tŏk mŭk drăm. Yoa thoi nŏh kơ sô̆ jên jang jĭ tơ drong tôch gĭt kăl vă jang tŏk dơ̆ng mŭk drăm. Tơ dăh đei drơ̆ng nơ̆r ƀât dôm năr blŭng sơ năm 2022 ‘nŏh gô tưk tơ iung tơ drong jang tŏk lơ̆m sơ năm 2022-2023 păng klĕp truh đĭ jăl jang hloi. ‘Nŏh jĭ tơ drong tôch gĭt kăl. Tơ dăh lê̆ gô truh hop akŏm khei 5 ‘nŏh gô hiơ̆ 5 khei ‘mơ̆i mă gơ̆h tơ chơ̆t”.  

Tơ̆ hop akŏm âu, Kuô̆k hô̆i oei set hơ len, drơ̆ng nơ̆r ăn 8 kơ luơ̆t đei: luơ̆t hơ met ming, chih tơ mât dơ̆ng 1,2 tơ drong lơ̆m Luơ̆t tơ mât jên jang kơ tĕh đak, Luơ̆t tơ mât jên jang kiơ̆ trong tĕh đak hăm kon pơ lei jang hơ doi, Luơ̆t Tơ mât jên jang, Luơ̆t rơih anih iŏk jang, Luơ̆t unh điên, Luơ̆t  tĕch mơ dro, Luơ̆t Thuê̆ tĕch tơ mam kăl păng luơ̆t pơm kiơ̆ nơ̆r sek pak. Vang pơ ma nuh trư̆k tuyê̆n tơ̆ hop akŏm, Khul tang măt Kuô̆k hô̆i dêh char Dak Lak drơ̆ng nơ̆r hăm tơ drong hơ met ming, chih tơ mât dơ̆ng 1,2 tơ drong lơ̆m 8 kơ luơ̆t vă tơ ƀôh hơ dăh tôm trong jang đơ̆ng Đảng păng tơ tom hơ met ming dôm tơ drong mơ mat tat, tơ hlăk tăk đei tơ̆ yăn âu.

Bơ ngai tang măt Kuô̆k hô̆i dêh char Dak Lak tơ gop nơ̆r hơ met ming, chih tơ mât dơ̆ng 8 kơ luơ̆t

Tơ gop nơ̆r ăn Luơ̆t tơ mât jên jang tĕh đak, ƀok Y Vinh Tơr, Kơ dră chĕp kơ̆l Khul tang măt Kuô̆k hô̆i dêh char Dak Lak drơ̆ng nơ̆r hăm 3 tơ drong kăl kơ chih hơ met, mă lei ƀok athei tơ rĕk hlŏh dơ̆ng truh tơ drong klăih song hơ năp jang hăm dôm tơ drong jang đei jên ODA: “Tơ drong ƀơm truh nơ̆r pơ kăp kơ apŭng plenh tĕh đơ̆ng tĕh đak păng Khul kơ dră tĕh đak Việt Nam hăm păih kĭ pơ kăp ‘nŏh jĭ dôm anih jang đơ̆ng tĕh đak đe, dôm tơ drong kăl ƀơm truh trong bơ̆ jang dôm tơ drong ‘nâu. Tơ dăh ưh đei hơ len năng pơm hơ dăh hơ năp jang đơ̆ng dôm anih tơm, anih jang kơ pal, tơ ring tơ rang ‘nŏh mưh bơ̆ jang gô đei tơ drong glăi. Mă loi ƀơm truh khei năr hơ găt bơ̆ jang, tơ drong ‘lơ̆ng đơ̆ng bơ̆ jang đơ̆ng nŏh gô ƀơm ưh ‘lơ̆ng truh bưng ai Việt Nam mưh mât jang hơ doi.”

Tơ tăm truh luơ̆t pơm kiơ̆ nơ̆r sek phak, bơ ngai tang măt Nguyễn Thị Thu Nguyệt akhan, luơ̆t athei chih hơ dăh ƀiơ̆ găh dôm tơ drong pơ jao jang tang: “Tơ̆ apăng 55 ‘nŏh chih hơ met ming hơ năn apăng luơ̆t jĭ “pơ jao hơ năp athei pơm kiơ̆ nơ̆r phak păng pơ jao hơ năp sek tơ lang tơ mam drăm”, tơ̆ âu kŭm tam mă pơm hơ dăh trong sek tơ lang hơ năp đei pơ jao vă pơm kiơ̆ nơ̆r phak hăm hơ năp sek tơ lang tơ mam pha ra băl ƀât yơ? Yoa thoi nŏh athei Khul kơ dră tĕh đak chih hơ met mă hơ dăh ƀiơ̆ găh trong pơ jao hơ năp sek tơ lang tơ mam thoi yơ vă gơ̆h rơ đăh rơ đong”.

Mĭnh tơ drong gĭt kăl nai dơ̆ng đei Kuô̆k hô̆i set hơ len, drơ̆ng nơ̆r ‘măng mă âu ‘nŏh jĭ Tơ drong tơ chơ̆t găh trong tơ mât jên jang man trong gre kơ dâu hrĕnh Bắc - Nam găh Hơ lĕch đơ̆ng 2021-2025. Kơ dră Kuô̆k hô̆i Vương Đình Huệ pơ ma hơ dăh, trong nơ năm jĭ huan pham ăn tơ drong jang mŭk drăm, tơ gop tơ iung jơ hngâm pran, tưk tơ iung tơ drong jang mŭk drăm, tơ pôl, vei lăng sơ đơ̆ng tĕh đak; hơ met pơ ‘lơ̆ng trong nơ năm ‘nŏh jĭ tơ drong jang tôch gĭt kăl. Kơ plăh hrei ‘nâu, jăh tơ lĕch jang hrôih tơ drong jang ‘nâu roi gĭt kăl hlŏh dơ̆ng, jăh tơ lĕch jên jang đơ̆ng tĕh đak, tơ gop tơ iung ming păng jang tŏk mŭk drăm.

                                                                                                Dơ̆ng: Tơ blơ̆