VOV4.Bahnar - Anih vei lăng hơ drĕch kon kông ‘nao pơ gơ̆r "Hop akŏm vang pơ tôch tơ drong jang tơ̆ Anih vei lăng hơ drĕch kon kông sơ năm 2021". Sơ năm âu ki, Anih vei lăng hơ drĕch kon kông hlôi tơ plih tôch ‘lơ̆ng găh trong pơ gơ̆r jang, hơ tŏk iŏk yoa kơ măy kơ mŏk, hơ tŏk tơ drong pran, đei yoa mưh vei lăng; băt hơ dăh rim tơ drong, sek tơ lang dôm tơ drong tơ tŏ tơ̆ tơ ring kon kông păng groi kông, mă loi jĭ tơ drong jĭ Covid 19; tơ gop pơm hơ tŏk tơ drong arih xa ăn kon pơ lei kon kông, vei sơ đơ̆ng mŭk drăm, tơ pôl, sơ đơ̆ng chinh trĭ păng vei sơ đơ̆ng tơ drong arih xa tơ pôl tơ̆ tơ ring kon kông; chih pơ kĕh dôm hla ar chih tơ roi, Nơ̆r pơ tho bơ̆ jang kiơ̆ Tơ drong jang tơm kơ tĕh đak atŏk tơ iung mŭk drăm tơ pôl tơ̆ tơ ring kon kông păng groi kông, tơ roi ăn Khul kơ dră tĕh đak, thủ tướng tĕh đak.

Ƀok Kơ dră Hầu A Lềnh iung pơ ma lơ̆m hop akŏm

Sơ năm ‘nao 2022, Anih vei lăng hơ drĕch kon kông đei pơ jao tơ drong jang pơ gơ̆r bơ̆ jang Tơ drong jang tơm kơ tĕh đak atŏk tơ iung mŭk drăm, tơ pôl tơ̆ tơ ring kon kông păng groi kông, hăm tơ drong jang tôch lơ. Athei đei 1 trong jang hơ doi mă kơ jăp đơ̆ng dôm anih tơm, anih jang kơ pal, dôm tơ ring tơ rang truh hloi tơ̆ pơ lei pơ la, rim unh hnam păng kon pơ lei.

Dơ̆ng: Tơ blơ̆