VOV4.Bahnar - Pôk rơih bơngai jang tang măt ăn Kuôk hô̆i jăl 15 păng jang tang măt lơ̆m Hô̆i đŏng kon pơlei dôm jăl jang đơ̆ng xơnăm 2021- 2026 jing tơdrong kăp gĭt kơ teh đak, jing trong hiôk vă kon pơlei pơm kiơ̆ xơnong pơm tơ ‘ngla kơ po kiơ̆ đơ̆ng tơdrong rơih iŏk, pôk tơlĕch dôm bơngai jang tang măt tơpă đei đon ‘lơ̆ng, tơgăl jang tang măt ăn kon pơlei tơ̆ Kuôk hô̆i păng Hô̆i đŏng kon pơlei dôm jăl jang. Kơyuơ thoi noh, tơdrong pơgơ̆r tơroi tơbăt pôk rơih bơngai jang tang măt ăn Kuôk hô̆i jăl 15 păng jang tang măt lơ̆m Hô̆i đŏng kon pơlei dôm jăl jang đơ̆ng xơnăm 2021 - 2026  athei đei dôm anih jang đơ̆ng trung ương truh tơring tơrĕk, pơm jang hăm lơ trong jang phara băl vă tơgop kăp gĭt lơ̆m tơdrong đei jơnei kơ tơdrong pôk rơih.

Atŭm hăm jâ̆p teh đak, rim tơring kon pơlei kon kông tŏk bŏk oei hơtŏk pran tơdrong tơroi tơbăt hăm lơ trong jang phara băl, vă tơgŭm kon pơlei hlôh vao hơdăh găh tơdrong kăp gĭt kơ tơdrong pôk rơih păng đei xơnong kăp gĭt hăm hla kơphĭu kơdih po. Đơ̆ng blŭng khei 3/2021, Jơnŭm jang găh Bơngai kon kông lơ̆m Anih jang găh Bơngai kon kông hlôi tơbang Tơdrong jang 1449 găh tơlĕch chă tơroi tơbăt găh tơdrong pôk rơih bơngai jang tang măt ăn Kuôk hô̆i jăl 15 păng jang tang măt lơ̆m Hô̆i đŏng kon pơlei dôm jăl jang đơ̆ng xơnăm  2021 - 2026 hăm tơring kon pơlei kon kông.

Kiơ̆ kơ noh, tơdrong kăl tơroi tơbăt akŏm găh tơdrong gĭt kăl kơ tơdrong pôk rơih; dôm tơdrong pơkăp đơ̆ng khôi luơ̆t teh đak nhen: Khôi luơ̆t xơnăm 2013, Lươ̆t Pôk rơih bơngai jang tăng măt Kuôk hô̆i, Luơ̆t Pôk rơih bơngai jang lơ̆m Hô̆i đŏng kon pơlei dôm jăl jang oei yua; dôm hla bar pơtho găh tơdrong pôk rơih đơ̆ng Teh đak, hla bar đơ̆ng Anih juăt jang Kuôk hô̆i păng Jơnŭm pôk rơih kơ teh đak.

Tơroi tơbăt găh dôm tơdrong tơchơ̆t, pơkăp pôk rơih, xơkơ̆t hăm bơngai jang tang măt ăn Kuôk hô̆i păng jang tang măt lơ̆m Hô̆i đŏng kon pơlei, găh xơnong pôk rơih, xơnong lĕch măt tơgar đơ̆ng kon pơlei păng xơnong bơngai tăh hla lơ̆m tơdrong vang năm akŏm pôk rơih.

Tơroi tơbăt găh tơdrong tơgŭm đơ̆ng kon pơlei, kon pơlei kon kông hăm trong ang tơplih 'nao đơ̆ng Đảng; tơdrong pơlong jang vă xơng kơ kuh kơ tơdrong pôk rơih; pôk bơnê tơtom hăm dôm anih jang păng tơ 'ngla bơngai jang đei jơnei rơgei lơ̆m tơdrong jang pôk rơih, mă hăt noh tơdrong jang pôk rơih tơ̆ tơring đei lơ kon pơlei erih jang xa, tơring groi kông, tơring xơlam teh, tơring tơnap tap.

Tơroi tơbăt găh tơdrong kăl lơ̆m akŏm pơma dơnuh hăm kon pơlei tăh hla, găh tơdrong erih pơm jang păng tơdrong vă jang đơ̆ng dôm bơngai lĕch măt tơgar, mă kăl noh dôm bơngai kon kông lĕch măt tơgar, bơngai lĕch măt tơgar tơ̆ tơring kon pơlei kon kông, bơngai lĕch măt tơgar jing bơngai kon kông tŏ xĕt măt bơngai, bơngai lĕch măt tơgar lơ̆m tơring tơnap tap hloh.

Tơroi tơbăt găh tơdrong pơvih, vei xơđơ̆ng ăn tơdrong pôk rơih gơh đei jơnei păng tơdrong tơroi tơbăt găh jơnei đơ̆ng pôk rơih, tơguăt jang hadoi tang găn păng tơjră pơrang jĭ Covid-19.

Dang ei, rim tơring ataih yaih tŏk bŏk oei hăt hot hơtŏk pran tơdrong tơroi tơbăt găh pôk rơih truh rim pơlei pơla, tơgŭm ăn kon pơlei kon kông hlôh vao găh xơnong jang po lơ̆m tơdrong pôk rơih truh âu kơnh. Dôm jăl pơgơ̆r tơring hlôi rơih đei khul kang ƀô̆ chă tơroi tơbăt gơh pơma nơ̆r kon kông, hlôh vao lơ̆m tơdrong jang tơroi tơbăt ăn kon pơlei, tơguăt kơjăp đơ̆ng tơroi kiơ̆ um rŭp ƀôh đang măt hăm tơroi pơre nơ̆r. Khul kŏng ang xăh gơh rơgei, khul linh vei xơlam teh, đoan hơdruh tơdăm, jơnŭm jang đe drăkăn... duh đei hơvơn vă vang jang  "tơlĕch hơvơn". Yă Nguyễn Thị Hồng Vân, Phŏ Kơdră Anih jang măt trâ̆n tôh kuôk Việt Nam dêh char Lạng Sơn ăn tơbăt: “Nhôn hlôi pơjing tơdrong jang vă hơtŏk pran tơdrong tơroi tơbăt găh pôk rơih hăm trong chă tơroi tơbăt athei tơpă mă trŏ ƀlep, hơbĕch hơbal mă lei athei đei jơnei tơnăp. Lơ̆m noh mă kăl akŏm truh dôm bơngai tơ̆ tơring tơnap tap, tơring kon pơlei kon kông tơ̆ xơlam teh... Đơ̆ng noh pơlang xă vă 'năr pôk rơih Kuôk hô̆i păng Hô̆i đŏng kon pơlei dôm jăl jang đơ̆ng xơnăm 2021-2026 tơpă jing 'Năr akŏm pơchơt kơ đĭ đăng kon pơlei.”

Vă trŏ ƀlep hăm rim hơdrung bơngai, tơdrong tơroi tơbăt ăn kon pơlei kiơ̆ pơkăp đei ƀôh đang măt, chă tơroi tơbăt, iŏk yua kơjăp dôm tơdrong pơre nơ̆r. Lơ trong tơroi tơbăt gơh rơgei nhen chĕp vei xơnong dơnơm kơ bơngai đei kon pơlei lui yom, tơlĕch pơdăh joh hri tơ̆ dôm anih akŏm kơchơ dăh mă chih akŏm hla bar kăl 'măn tơroi tơbăt hăm nơ̆r kon kông lơ̆m tơring vă kơ ƀônh hlôh vao, ƀônh hơdơ̆r... Yă Phạm Thị Lan, Phŏ Kơdră Anih jang măt trâ̆n tôh kuôk Việt Nam dêh char Gia Lai xơkơ̆t tơdrong đei jơnei đơ̆ng khul jang “tơroi tơbăt pơre nơ̆r” tơ̆ tơring ataih yaih: “Mă kăl noh dôm bơngai đei kon pơlei lui yom gơh rơgei, đe kră pơlei, kơdră thôn pơlei, yua kơdih nơ̆r po đe yĕt, nơ̆r pơma tơ̆ tơring nhen Jarai păng Bahnar vă tơroi tơbăt kơtơ̆ng ang atŭm truh hăm rim kon pơlei. KIơ̆ đơ̆ng tơroi tơbăt âu lơ kon pơlei, mă kăl noh kon pơlei kon kông đe duh băt hơdăh păng yua hla kơphĭu kơdih po vă pôk iŏk dôm bơngai đei đon 'lơ̆ng, gơh rơgei vang jang tang măt lơ̆m Hô̆i đŏng kon pơlei dôm jăl jang”.

Jăh vă akhan, hăm tơdrong hơtŏk pran tơroi tơbăt găh pôk rơih kiơ̆ lơ trong jang, tơdrong tơroi tơbăt găh pôk rơih tơ̆ tơring ataih yaih hlôi tơgop tơjră hăm dôm tơdrong kơchĕng glăi, jâu kư̆ kă đơ̆ng khul ayăt kơnê̆; tơgŭm kon pơlei kon kông băt hơdăh: Năm tăh kơphĭu noh tơgop pôk iŏk bơngai rơgei, tang măt ăn kon pơlei tơlĕch dôm trong pơkăp hơtŏk tơ iung... tơgŭm ăn tơdrong erih kơdih đe xư klaih đơ̆ng hin dơnuh, xơđơ̆ng tơdrong erih. Đơ̆ng noh, kon pơlei kon kông băt hơdăh hloh găh xơnong jang kơ po păng kơchăng vang năm tăh hla ăn 'Năr pôk rơih.

Lan chih păng pơre nơ̆r