VOV4.Bahnar - Khei 6 sơ năm ‘nâu, dôm xăh, thĭ trơ̆n kơ apŭng Ia Grai, dêh char Gia Lai lĕch đơ̆ng tơ ring mơ mat tat păng tơ ring mơ mat tat dêh hlŏh (kiơ̆ tơ drong tơ chơ̆t kơ sô̆ 861 ‘năr 4/6/2021 đơ̆ng Thủ tướng tĕh đak). ‘Nâu jĭ tơ drong hơ iă đơ̆ng Khul kơ dră tơ ring păng kon pơ lei yoa đơ̆ng adrin jang tơ iung mŭk drăm, tơ pôl, sut pơ đĭ pơ ngot, tơ jur tơ nuh hin hlôi iŏk đei lơ tơ drong jơ nei. Mă lei, tơ drong ‘nâu tơ tă pơm ăn lơ unh hnam jing mơ mat tat mưh vă tŏk iŏk jên đơ̆ng anih mong jên tơ gŭm tơ pôl vă jang xa dơ̆ng, đơ̆ng nŏh đei lơ tơ drong mơ mat tat ‘nao dơ̆ng.

Sơ năm 2017, mŏ R’mah Blich, tơ̆ plei Doch Tung, xăh Ia Grái, apŭng Ia Grai, dêh char Gia Lai jĭ unh hnam đei tŏk iŏk jên đơ̆ng tơ drong tơ gŭm jang xa, tech mơ dro tơ̆ tơ ring mơ mat tat vă rong kon tơ rong. Đơ̆ng kơ sô̆ jên đei tŏk iŏk 30 triu, mŏ Blich pơm hơ met hơ drong păng răt rong rơ mo păng đĭ kla đei 1 păh jên hre bơih. Mă lei, ‘nao âu rơ mo hnam mŏ lôch đĭ yoa jĭ pơ plei tơ̆ hơ kar. Mŏ Blich kăl đei jên vă rong dơ̆ng, mă lei xăh đĭ tŏk jing tơ ring I bơih, pă đei tơ ring mơ mat tat nhen adrol sơ̆ bơih, kơ na mŏ pơ ngơ̆t hơ mơt ưh kơ gơ̆h tŏk iŏk jên dơ̆ng: “Adrol ki inh tŏk iŏk jên vă jang xa, tĕch mơ dro, dang ei tŏk jing tơ ring I, lơ unh hnam tŏk iŏk bơih, nhen khul nhôn tơ̆ âu, kla đang ‘nŏh mih ma duch nă ưh kơ băt hăm gơ̆h tŏk iŏk dơ̆ng ưh yoa ưh pă đei lơ̆m tơ ring tơ gŭm, hơ pơi ‘mĕh khul kơ dră pơ gơ̆r pơ jing trong tơ gŭm ăn kon pơ lei.”

Mŏ R’mah Blich, plei Doch Tung tôch sơ ‘ngon yoa rơ mo hnam mŏ lôch đơ̆ng jĭ, pă pôm hơ drong hŏh đĕch, oei năr kla hre ‘nŏh vă truh bơih

Nhen thoi nŏh mơ̆n, yă Puih Phyim bơ ngai lơ̆m pơ lei kŭm đei tŏk iŏk 40 triu hlak jên đơ̆ng tơ drong jang ‘nâu vă pơ tăm chĕh phe. Yă Puih Phyim tơ roi: xăh lĕch đơ̆ng tơ ring mơ mat tat mă lei kon pơ lei oei tôch mơ mat tat yoa jĭ Covid-19. Tơ dăh ưh đei tŏk iŏk jên nhen adrol ki kon pơ lei hơ nat vă gơ̆h jang xa: “Đơ̆ng tơ ring đei asong tŏk iŏk jên tơ gŭm dang ei xăh Ia Grái jing găh tơ ring I, ưh pă đei tơ gŭm nhen adrol sơ̆ bơih, kon pơ leu oei tơ ƀâp lơ mơ mat tat. 2 sơ năm ‘nâu đei jĭ Covid ưh gơ̆h jang xa kiơ, ‘long điêu, chĕh phe jur kơ jă kŭm pơm mơ mat ăn kon pơ lei ‘năi. Hơ pơi ‘mĕh pơm thoi yơ tĕh đak chă đei trong tơ gŭm ăn kon pơ lei”

Ƀok Nguyễn Đức Tấn, Kơ dră vei lăng kon pơ lei xăh Ia Grái ăn tơ băt, xăh đei hlŏh 10 rơ bâu ‘nu kon pơ lei, kơ sô̆ kon pơ lei kon kông đei vă jê̆ 45%, kơ sô̆ unh hnam tơ nuh, vă jê̆ tơ nuh jur kiơ̆ sơ năm, truh dang ei oei pă vă jê̆ 500 unh hnam. Ƀok Tấn kŭm tôch tơ tăm mưh xăh tŏk jing tơ ring I. Jĭ Covid-19 oei pơm mơ mat tat tôch dêh. Tơ dăh ưh đei tŏk iŏk jên tơ gŭm nhen adrol ki, kơ sô̆ unh hnam tơ nuh dơ̆ng tơ̆ xăh gô tŏk lơ: “Hrei ‘nâu vă gơ̆h đei jên jang xa, atŏk tơ iung mŭk drăm, pơ tăm ‘long, jang ƀa ‘nŏh athei tŏk iŏk jên đơ̆ng anih mong jên tơ gŭm tơ pôl ngăl. Tơ dăh dang ei ưh pă đei jên yơ vă tơ plih ăn anih mong jên tơ gŭm tơ pôl ‘nŏh jing mơ mat tat ăn kon pơ lei kon kông tơ̆ âu tơ pă. Xăh apinh tơ lĕch 1 trong tơ gŭm yơ ‘nŏh ăn unh hnam kon pơ lei vă gơ̆h tŏk iŏk jên đơ̆ng tĕh đak tơ gŭm, pơ jing tơ drong ‘lơ̆ng ăn kon pơ lei jang xa.”

Đơ̆ng rŏng kơ tơ drong tơ chơ̆t 861 ‘năr 04/6/2021 đơ̆ng Thủ tướng tĕh đak đei yoa, 13/13 xăh, thĭ trơ̆n tơ̆ apŭng Ia Grai tơ tă tơ ring I ngăl. Vă akhan apŭng đei truh 10 xăh jĭ tơ ring II tŏk jing tơ ring I mưh tơ mât yoa tơ drong tơ chơ̆t. 1800 unh hnam oei tŏk iŏk jên đơ̆ng tơ drong tơ gŭm jang xa, tĕch mơ dro, đơ̆ng rŏng kơ kla 60 ti hlak jên, ‘nŏh ưh pă đei anih yơ vă chă tŏk iŏk dơ̆ng.

Ƀok Đỗ Văn Đông, Phŏ Kơ dră vei lăng kon pơ lei apŭng Ia Grai, ăn tơ băt: “Mơ mat tat hrei ‘nâu ‘nŏh mih ma duch nă ưh pă gơ̆h tŏk iŏk jên bơih, Dơ nŏ anih vei lăng kon pơ lei apŭng kŭm pơ tho ăn Anih mong jên tơ gŭm tơ pôl apŭng hơ nơ̆ng hơ len năng, đei trong jang rơ gei, lăp ‘lơ̆ng vă pơ jing tơ drong hiôk hian ăn kon pơ lei gơ̆h tŏk iŏk jên lơ̆m khei ‘năr oei mơ mat tat âu. Hơ nơ̆ng roi tơ băt ăn kon pơ lei trong tơ gŭm âu mă trŏ vă kon pơ lei hlôh vao, đei đon adrin jang tŏk. Tơ drong tơ gŭm đơ̆ng tĕh đak lơ̆m 1 bruh yơ ‘nŏh đĕch, oei mưh tơ drong arih xa kơ kon pơ lei roi tŏk ƀiơ̆, dôm tơ drong tơ gŭm gô đei kăt tơ jur ƀiơ̆ vă kon pơ lei kơ chăng lơ̆m tơ drong jang xa, tĕch mơ dro ăn kơ dih.”

Lĕch đơ̆ng tơ ring mơ mat tat păng mơ mat tat dêh hlŏh ‘nŏh jĭ tơ drong hơ iă hăm apŭng Ia Grai, dêh char Gia Lai. Mă lei hăm vă jê̆ 2.000 unh hnam oei tŏk iŏk jên đơ̆ng anih mong jên tơ gŭm tơ pôl ăn unh hnam tĕch mơ dro, jang xa tơ̆ tơ ring mơ mat tat jing hiong lê̆ anih gơ nang yoa. Kơ plăh ‘nŏh, dôm tơ drong mơ mat tat ‘nao yoa jĭ tơ̆ kon tơ rong, jĭ covid-19 hlôi đei păng kon pơ lei kăl đei trong tơ gŭm vă gơ̆h hơ met pơ ‘lơ̆ng.

Hoàng Qui: Chih

Dơ̆ng: Tơ blơ̆