VOV4.Bahnar - Đei pơjao xơnong vei lăng hloh 29.000ha bri păng teh bri, lơ̆m dôm xơnăm âu ki, gơnơm hloh 27.000ha bri đei kla jên vei hơlen. Anih jang găh bri  Kon Braih hlôi đei jên xơđơ̆ng ăn tơdrong jang vei lăng bri. Atŭm hăm noh, tơdrong erih đe kang ƀô̆, bơngai jang tơ̆ anih jang adoi đei hơtŏk noh roi tơguăt hloh hăm bri.

 ‘Năr yơ duh thoi ăi, khul kang ƀô̆, bơngai jang kơ Anih jang găh bri Kon Braih, găk hơlen tơ̆ Anih hơlen bri Đăk Kôi 1, lơ̆m xăh Đăk Kôi, apŭng Kon Braih duh năm tơ̆ bri chă vei hơlen bri, vei lăng hơgăt teh đei pơjao. Mưh nhen adrol ki, vă hơlen tôm minh tơring bri kông, hang hơ̆ng lăng hăm đei khul tơtông koh ot ‘long bri, dăh mă kon pơlei chă muih xoh choh teh bri dăh mă ưh noh năm jơ̆ng măh hiong dôm jơ hloi, phơ phŏ măh đĭ minh pơgê pơtơm năm truh tơring kăl hơlen.

 Dang ei noh pha, gơnơm đei axong ăn kơmăi flightcam, khul chă hơlen adrô̆ rơih anih ƀônh đang kơ noh ‘măn kơmăi kơleng găh anih kăl hơlen. ‘Nhŏng Trần Văn Tiệp ăn tơbăt: “Dang ei đei jên kla vei lăng bri mă mônh noh hơmŏ ăn kơ nhôn hơbăn ao hrŭk pơgăn răm âu to Anih jang duh tơrĕk tơnăp ăn tơdrong erih ‘nhŏng oh. Mă mônh găh tơdrong hơlen băt muih choh teh bri. Xơ̆ noh năm tơ̆ bri kơdrơ̆ng hơtaih hơteng, noh ba ưh kơ kĕ năm jơjâ̆p, oei dang ei noh tơpăr minh văr noh băt tôm tơdrong, ba ƀôh tôm đĭ, đei tơdrong kiơ noh ƀôh băt tơtom păng tang găn hloi”.

Đơ̆ng xơnăm 2011 vih tơ̆ rŏng, khei năr tam mă đei jên kla vei lăng bri, mă hăt noh ăh Anih jang găh bri Kon Braih ưh đei iŏk koh ot tơ̆r, tơdrong erih bơngai jang tôch tơnap tap. Atŭm hăm noh jên axong ăn tơdrong vei lăng bri rim xơnăm adoi tŏ xĕt xot. ‘Nâu jing tơdrong tơm pơm ăn bri hơnơ̆ng ƀơm unh xa ăh pơyan phang păng ƀơm khul tơtông bri koh phă rim xơnăm. Ƀok Nguyễn Văn Quý, Phŏ Kơdră Anih jang găh bri Kon Braih ăn tơbăt, pơkăp kla jên vei lăng bri hlôi hơtŏk jơhngơ̆m pran ăn bơngai jang găh bri păng hơ ‘nhăk tơdrong ‘nao truh hăm tơring bri: “Đơ̆ng xơnăm 2011 truh xơnăm 2020 rim xơnăm Anih jang đei yua đơ̆ng bri pơhlom truh 13 tih hlj. Đơ̆ng jên âu Anih jang hlôi pơkăp pơjao vei lăng bri ăn pơlei pơla. Đơ̆ng pơkăp noh hlôi pơm tơplih đon kơchĕng đơ̆ng kon pơlei hăm tơdrong vei lăng bri tơ̆ hơgăt bri đei pơjao. Mă ƀar noh Anih jang kơdih pơjao vei lăng hăm khul juăt vei lăng bri kơ Anih jang vă kla jên khei jang ăn kang ƀô̆ bơngai jang đơ̆ng 8 truh 9 trĭu hlj 1 ‘nu lơ̆m 1 khei”.

Đơ̆ng kơsô̆ jên hăm kơjă pơkăp pơhlom 570.000 hlj minh ha, rim xơnăm, Anih jang găh bri Kon Braih păng dôm pơlei pơla đei jên jang xơđơ̆ng ăn tơdrong vei lăng bri păng hơtŏk tơdrong erih kơ bơngai jang găh bri. ‘Nhŏng Lê Hữu Diễn, pơm jang tơ̆ Lăm kih thuơ̆t kơ Anih jang găh bri Kon Brai, đei 21 xơnăm tơguăt hăm tơdrong jang bri, kơdih po hlôi găn ga lơ tơdrong erih atŭm hăm bri ăn tơbăt: “Đei jên vei lăng bri noh tơdrong erih đe kang ƀô̆, bơngai jang nhôn đei hơtŏk. Dôm tơdrong tơgŭm đei Khul kơpal kơ anih jang tơgŭm tôm tơdrong hloh. Iŏk yua đơ̆ng đei jên vei lăng bri truh dang ei tŏk pơhlom đơ̆ng 3 truh 4 ‘măng pơtêng hăm adrol ki. Nhôn xơđơ̆ng jơhngơ̆m pơm jang hloh păng tơguăt tơnăp hloh hăm tơdrong jang po”.

Tơpă tơdrong pơm kiơ̆ pơkăp kla jên vei lăng bri tơ̆ Anih jang găh bri Kon Braih ăn ƀôh, âu jing pơkăp măh kăp gĭt vă rim anih iŏk jang găh bri tơ̆ Kon Tum vei lăng păng hơtŏk bri tơnăp hloh.

Lan chih păng pơre nơ̆r