VOV4.Bahnar - Đơ̆ng rŏng 9 năr bơ̆ jang hơ nơ̆ng, tơ păt ‘lơ̆ng, ‘măng hop akŏm mă 1, Kuô̆k hô̆i jăl XV hlôi jang đang dôm tơ drong đei tơ lĕch păng iŏk đei jơ nei tôch ‘lơ̆ng. Pơ ma pơ tôch hop akŏm, Kơ dră Kuô̆k hô̆i Vương Đình Huệ krao hơ vơn kon pơ lei, linh, bơ ngai tăh hla lơ̆m tĕh đak, dôm anih tĕch mơ dro, khul grŭp tơ pôl, kon pơ lei bơ̆n oei xa tơ̆ tĕh đak đe tơ iung tơ drong juăt tơ guăt 1 ƀơ̆r đon, jang kiơ̆ 'lơ̆ng dôm trong jang, tơ drong tơ gŭm đơ̆ng Đảng, khôi luơ̆t tĕh đak, akŏm jơ hngâm khŏm tang găn đei tơ drong jĭ Covid-19, vei lăng tơ drong arih, jơ hngâm pran, hiôk sơ đơ̆ng kơ kon pơ lei.

‘Măng hop akŏm mă 1, Kuô̆k hô̆i jăl XV jĭ hop akŏm đei lơ tơ drong gĭt kăl, pơ gơ̆r lơ̆m khei ‘năr jĭ Covid-19 oei tơ pŏh tôch dêh, mă loi tơ̆ plt Hồ Chí Minh, 1,2 dêh char găh Pơ băh păng tôch krê tơ pŏh xă. Dôm anih jang kơ pal, khul tang găn jĭ blŭng a păng rim anih jang chinh trĭ oei akŏm jơ hngâm tôch ai bơ̆ jang ‘lơ̆ng rim troing jang tang găn jĭ vă vei lăng jơ hngâm pran, tơ drong arih kơ kon pơ lei. Tơ̆ hơ năp tơ drong ‘nŏh, Kuô̆k hô̆i drơ̆ng nơ̆r tơ jur ƀiơ̆ năr hop akŏm pă 8 năr, atŭm hăm ‘nŏh hơ met ming trong bơ̆ jang, dôm tơ drong kăl pơ ma nuh păng chih tơ mât lơ̆m tơ drong tơ chơ̆t atŭm kơ hop akŏm dôm trong jang gĭt kăl vă tang găn jĭ Covid-19. Tơ drong 'nŏh ăn ƀôh Kuô̆k hô̆i hlôi lăng kiơ̆ tơ̆ yăn âu, bơ̆ jang hrĕnh, hơ bĕch hơ bal, tơ tom yoa tơ drong kăl ƀât măt păng kăl hlŏh jĭ vei lăng jơ hngâm pran ăn kon pơ lei.

“Băt hơ dăh dôm tơ drong mơ mat tat, long nol tih yoa đơ̆ng jĭ Covid-19, Kuô̆k hô̆i, dôm bơ ngai tang măt Kuô̆k hô̆i hlôi bơ̆ jang tôch tơ năp, păng ‘mĕh plang đĭ jơ hngâm, pơ gĕnh jơ năr, bơ̆ jang ‘ngoăih jơ jang hloi păng jang thim lơ̆m dôm năr pơ dơ̆h, tơ plih ‘nao, rơ gei, tơ gop lơ nơ̆r kăp gĭt, trŏ ƀlep, tôch tơ găl vă Kuô̆k hô̆i set hơ len, drơ̆ng nơ̆r păng tơ lĕch 29 tơ drong tơ chơ̆t. Tơ tom sek tơ lang dôm tơ drong gĭt kăl kơ plăh dang ei hai, tơ chơ̆t dôm tơ drong gĭt kăl đunh đai hai, vang pơ jing đei 1 hop akŏm đei jơ nei ‘lơ̆ng tôm tơ drong, đei kon pơ lei păng bơ ngai tăh hla lăp đon, tơ chĕng ‘lơ̆ng”.

Jơ hôp pơ tôch Hop akŏm mă mônh, Kuô̆k hô̆i jăl XV

Tơ̆ hop akŏm mă blŭng kơ jăl jang ‘nao, Kuô̆k hô̆i hlôi jang đang tơ drong tôch gĭt kăl ‘nŏh set hơ len, tơ chơ̆t ăn khul grŭp, bơ ngai jang păng pôk rơih, kĭ pơ kăp ăn dôm bơ ngai jang tih kơ tĕh đak, lăp hăm dôm tơ drong hơ găt đơ̆ng Đảng păng khôi luơ̆t tĕh đak. Hăm tơ drong drơ̆ng nơ̆r, lui kiơ̆ kơ jăp, Kuô̆k hô̆i hlôi pôk Kơ dră tĕh đak, Kơ dră Kuô̆k hô̆i, Thủ tướng tĕh đak păng dôm kơ chư̆k chĕp kơ̆l nai hai. Kŭm hăm 'nŏh, Kuô̆k hô̆i set hơ len, tơ chơ̆t ăn dôm trong jang lơ̆m 5 sơ năm 2021-2025: Trong jang atŏk tơ iung mŭk drăm, tơ pôl; Trong jang jên hu tĕh đak, tŏk iŏk, kla jên hre kơ tĕh đak; Trong tơ mât jên jang đunh păh lăp. Atŭm hăm 'nŏh set hơ len, tơ chơ̆t trong tơ mât jên ăn Tơ drong jang tơm kơ tĕh đak găh pơ jing tơ ring tơ rang 'nao păng Tơ drong jang tơm kơ tĕh đak tơ jur tơ nuh hin kơ jăp 'lơ̆ng đơ̆ng 2021-2025.

Tơ drong set hơ len, tơ chơ̆t ăn dôm trong jang, tơ drong vă jang lơ̆m 5 sơ năm kơ tă lơ̆m hop akŏm mă blŭng kơ jăl jang ‘nŏh jĭ tơ drong adrin tôch tih đơ̆ng Kuô̆k hô̆i, Khul kơ dră tĕh đak, dôm anih jang kơ pal; tôch gĭt kăl hăm tơ drong jang tŏk kơ tĕh đak, pơih trong ‘lơ̆ng ăn Khul kơ dră tĕh đak, dôm anih jang kơ pal, tơ ring tơ rang kơ chăng jăh jang kiơ̆ dôm tơ drong tơ chơ̆t đơ̆ng Kuô̆k hô̆i kŭm nhen tơ drong Tơ chơ̆t đơ̆ng Hop akŏm mă XIII. Pơ ma nuh, hơ len năng dôm tơ drong jang mŭk drăm, tơ pôl, thu mong, tơ lĕch jên jang kơ tĕh đak 6 khei blŭng sơ năm păng dôm trong vă jang tơm lơ̆m 6 khei hơ tuch sơ năm 2021, Kuô̆k hô̆i pôk pơ ư tơ drong adrin đơ̆ng Khul kơ dră tĕh đak lơ̆m tơ drong chĕp kơ̆l pơ gơ̆r bơ̆ jang kiơ̆ 2 tơ drong jang tơm: Tang găn jĭ Covid-19 hai, jang atŏk tơ iung mŭk drăm, vei kơ jăp tơ drong jang tŏk, năng tông tơ drong arih xa păng vei lăng jơ hngâm pran ăn kon pơ lei hai.

Kơ dră Kuô̆k hô̆i Vương Đình Huệ pơ ma pơ tôch hop akŏm

Kuô̆k hô̆i athei đơ̆ng rŏng kơ hop akŏm, Khul kơ dră tĕh đak, Thủ tướng tĕh đak đak, dôm anih jang kơ pal kơ tĕh đak hơ nơ̆ng tơ plih ‘nao, hơ tŏk tơ drong ‘lơ̆ng, đei yoa mưh bơ̆ jang, klăih song hơ dăh tơ drong chĕp kơ̆l, pơ gơ̆r bơ̆ jang mă lăp, hơ dai hăm hơ tŏk tơ drong vei lăng, dăr hơ len, tơ klep hăm tơ drong tơ blang hơ dăh đơ̆ng khul grŭp, rim bơ ngai, mă loi ‘nŏh jĭ bơ ngai chĕp kơ̆l. Kơ dră Kuô̆k hô̆i Vương Đình Huệ athei, dôm anih jang kơ Kuô̆k hô̆i, Khul tang măt Kuô̆k hô̆i păng dôm bơ ngai tang măt Kuô̆k hô̆i hơ nơ̆ng tơ plih ‘nao mă brĕ, hơ tŏk tơ drong ‘lơ̆ng, đei yoa mưh bơ̆ jang, hơ tŏk tơ drong dăr lăng mưh bơ̆ jang kiơ̆ dôm Tơ drong tơ chơ̆t đơ̆ng hop akŏm.

“Athei dôm bơ ngai tang măt Kuô̆k hô̆i jăh tơ roi ăn bơ ngai tăh hla lơ̆m tĕh đak găh tơ drong iŏk đei đơ̆ng hop akŏm, hơ nơ̆ng vei kơ jăp tơ drong pơ ma nuh hăm bơ ngai tăh hla. Kuô̆k hô̆i krao hơ vơn kon pơ lei, linh, bơ ngai tăh hla lơ̆m tĕh đak, dôm anih tĕch mơ dro, kon pơ lei bơ̆n oei tơ̆ tĕh đak đe tơ iung tơ drong juăt tơ guăt 1 ƀơ̆r đon, tơ gŭm băl, vang yang hơ doi, lui kiơ̆, jang kiơ̆ ‘lơ̆ng dôm trong jang, tơ drong tơ gŭm đơ̆ng Đảng, khôi luơ̆t tĕh đak, akŏm jơ năr, tơ mam, kơ sư̆k vă vei lăng, tang găn khŏm đei tơ drong jĭ Covid-19, vei lăng tơ drong arih, jơ hngâm pran, vei sơ đơ̆ng ăn kon pơ lei”. 

Jơ nei đơ̆ng hop akŏm mă 1, Kuô̆k hô̆i jăl XV ‘nŏh jĭ tơ drong ‘lơ̆ng hơ iă blŭng a ăn jăl ‘nao. Kiơ̆ tơ drong jang, hơ năp jang đei pơ jao kiơ̆ tơ drong hơ găt đơ̆ng Khôi luơ̆t tơm păng luơ̆t tĕh đak, hlôh vao hơ dăh dôm tơ drong jang tơm, dôm trong jang tih, gĭt kăl lơ̆m Ƀai iung pơ ma pơih blŭng hop akŏm ki ƀok Tổng Bí thư Nguyễn Phú Trọng, jang đang ‘lơ̆ng dôm tơ drong jang kiơ̆ Tơ drong tơ chơ̆t đơ̆ng Hop akŏm Đảng lơ̆m tĕh đak 'măng mă XIII, hăm jơ hngâm đon hơ nơ̆ng tơ plih 'nao, hơ nơ̆ng hơ met pơ 'lơ̆ng păng tơ iung tơ drong juăt 'lơ̆ng hơ iă lơ̆m 75 sơ năm, hăm tơ drong chĕp kơ̆l đơ̆ng Đảng, tơ drong yak hơ doi đơ̆ng rim anih jang chinh trĭ; tơ drong tơ gŭm jơ hngâm, lui kiơ̆ đơ̆ng kon pơ lei, bơ ngai tăh hla lơ̆m tĕh đak, kon pơ lei bơ̆n oei xa tơ̆ tĕh đak đe păng bôl boăl lơ̆m apŭng plenh tĕh, Kuô̆k hô̆i jăl XV gô jang đang 'lơ̆ng tơ drong jang đei Đảng păng kon pơ lei pơ jao ăn.

Dơ̆ng: Tơ blơ̆