VOV4.Bahnar - ‘Nao âu, tơ̆ anih jang kơ Khul kơ dră tĕh đak, Phó Thủ tướng Trương Hòa Bình, Kơ dră Anih pơ gơ̆r jang kơ Trung ương găh tơ drong jang tơm kơ tĕh đak atŏk tơ iung mŭk drăm tơ pôl tơ̆ tơ ring kon kông păng groi kông đơ̆ng 2021-2030 pơ gơ̆r hop akŏm anih ‘nâu. Vang hop akŏm đei Kơ dră Anih vei lăng hơ drĕch kon kông Hầu A Lềnh, Phŏ Kơ dră, kơ dră chĕp kơ̆l dôm anih jang kơ pal ‘nŏh jĭ bơ ngai vang jang lơ̆m Anih pơ gơ̆r. 

Tơ drong jang tơm kơ tĕh đak găh hơ drĕch kon kông păng tơ ring groi kông ‘nŏh jĭ 1 lơ̆m 3 tơ drong jang tơm kơ tĕh đak đơ̆ng 2021-2025, hlôi đei Kuô̆k hô̆i kĭ ăn trong tơ mât jên jang hăm kơ sô̆ jên jang đơ̆ng Trung ương, tôch gĭt kăl hăm tơ drong jang atŏk tơ iung mŭk drăm, tơ pôl kơ tĕh đak, tơ gŭm ăn tơ drong jang xa păng vei lăng ‘lơ̆ng tơ drong arih xa ăn kon pơ lei tơ̆ tơ ring kon kông păng groi kông, jĭ tơ ring oei “tơ nuh hin” dêh hlŏh lơ̆m tĕh đak. Yoa thoi nŏh, Phó Thủ tướng athei dôm anih tơm, anih jang kơ pal păng Anih pơ gơ̆r jang hơ tŏk đon jang tơ năp, jăh chih pơ jing păng tơ lĕch trong jang mă hơ dăh vă gơ̆h pơ gơ̆r jang đang ‘lơ̆ng tơ drong ‘nâu iŏk đơ̆ng jăl khei mă 4/2021, tơ gop hơ tŏk hrĕnh tơ drong tơ lĕcg jên jang đơ̆ng tĕh đak, hơ met pơ ‘lơ̆ng dôm tơ drong ưh ‘lơ̆ng đơ̆ng jĭ COVID-19, tơ iung dơ̆ng tơ drong jang mŭk drăm, vei sơ đơ̆ng tơ drong arih ăn kon pơ lei.

Phó Thủ tướng Trương Hoà Bình pơ gơ̆r hop akŏm

Nơ̆r tơ roi đơ̆ng Anih pơ gơ̆r, Kơ dră Anih vei lăng hơ drĕch kon kông Hầu A Lềnh ăn tơ băt, Anih oei jang hơ doi tôch kơ jăp hăm dôm anih tơm, anih jang kơ pal đei ƀơm truh hơ met ‘lơ̆ng rim hla ar vă pơ yoa ăn tơ drong hơ len năng đơ̆ng Khul chă hơ len kơ tĕh đak vă tơ roi ăn Thủ tướng tĕh đak kĭ asong tơ mât jên jang kiơ̆ tơ dỏng hơ găt. Tơ drong tơm đơ̆ng tơ drong jang âu đei 10 tơ drong jang iĕ. Pơ hnŏng iŏk đơ̆ng sơ năm 2021-2025 pơm tơ jur ƀiơ̆ tơ drong ưh hơ tŏ băl găh tơ drong arih xa, iŏk yoa đơ̆ng tơ ring kon kông păng groi kông hăm kơ sô̆ jô̆ atŭm lơ̆m tĕh đak; truh sơ năm 2025 tơ jur đei 50% kơ sô̆ xăh, pơ lei pơ la mơ mat tat dêh hlŏh, truh sơ năm 2030 ‘nŏh ưh pă đei xăh, pơ lei pơ la mơ mat tat dêh hlŏh bơih. Akŏm đĭ đăng jên jang lơ̆m khei ‘năr âu, tŏ sĕt hlŏh ‘nŏh 147.000 ti.

Tơ̆ hop akŏm, bơ ngai tang măt ăn dôm anih jang kơ pal đei ƀơm truh pơ ma nuh găh khei pơ gơ̆r bơ̆ jang dôm tơ drong jang tơm, mă loi ‘nŏh đơ̆ng dang ei truh đĭ sơ năm 2021, hơ năp jang, tơ drong jang đơ̆ng Anih pơ gơ̆ jang tơ̆ Trung ương, khul jang tơ gŭm tơ̆ dôm dêh char, plt, trong mong akŏm thim jên (jên ODA, jên tơ gŭm lơ̆m tơ pôl).

Pơ ma pơ tôch jơ bơ̆ jang, Phó Thủ tướng Trương Hòa Bình tơ chĕng ‘lơ̆ng Anih vei lăng hơ drĕch kon kông păng dôm anih tơm, anih jang kơ pal, bơ ngai jang lơ̆m Anih pơ gơ̆r jang kơ Trung ương đei nơ̆r pơ tho tôch ‘lơ̆ng, pơ gơ̆r jang tôch hơ iă ‘moi kiơ̆ dôm tơ drong jang đei pơ jao kiơ̆ trong jang đei tơ lĕch. Mă lei, Phó Thủ tướng athei Anih vei lăng hơ drĕch kon kông athei chih iŏk dôm tơ drong kăl păng jăh jang pơ kĕh 2 tơ drong jang đĭ khei ‘năr bơih; atŭm hăm ‘nŏh jăh tơ roi ăn Kơ dră chĕp kơ̆l anih pơ gơ̆r kĭ tơ lĕch tơ drong hơ găt bơ̆ jang păng tơ drong jang lơ̆m sơ năm 2021 đơ̆ng Anih pơ gơ̆r jang kơ Trung ương kiơ̆ đơ̆ng chă iŏk nơ̆r tơ gop đơ̆ng dôm anih tơm, bơ ngai vang jang tơ̆ Hop akŏm Anih pơ gơ̆r jang kơ Trung ương ‘năr 22/3/2021.

Hăm dôm tơ drong jang tơm 6 khei hơ tuch sơ năm, Phó Thủ tướng Trương Hòa Bình pơ ma hơ dăh, dôm anih tơm, anih jang kơ pal đei ƀơm truh athei jang hơ doi mă ‘lơ̆ng hlŏh dơ̆ng, khŏm jang kĕh dôm tơ drong vă hơ met hơ drol vă gơ̆h tơ lĕch jang kiơ̆, lơ̆m nŏh akŏm chih hơ met trong pơ gơ̆r păng dôm hla ar pơ tho bơ̆ jang. Năng kăl truh tơ drong tơ chĕng hơ len, tơ lĕch trong jang vă pơ lung, akŏm đei tơ drong tơ gŭm đơ̆ng apŭng plenh tĕh păng đơ̆ng tơ pôl vă bơ̆ jang Tơ drong jang ‘nâu. Atŭm hăm ‘nŏh, hơ tŏk tơ drong tơ roi tơ băt, krao hơ vơn kon pơ lei vang akŏm jơ hngâm bơ̆ jang kiơ̆:

“Tơ drong kăl hlŏh ‘nŏh pơm thoi yơ vă hơ tŏk đon hlôh vao, đei đon adrin jang kơ dih đơ̆ng kon pơ lei, đei đon jang tŏk, ưh đei gô chang gơ nang yoa ‘mĕh xa hơ păh đơ̆ng tĕh đak. Bơ̆n athei tơ iung đei jơ hngâm đon hưch hanh, vang pơ jei băl bơ̆ jang, akŏm đei jên tơ mât ăn tơ drong jang pơm trong, man anih jang, mă loi ‘nŏh jĭ iung jang xa blŭng a. Đei trong pơ lung iung jang xa, kăl loi hăm khul mơ lôh. Kơ na bơ̆n athei đei trong pơ tho pơ hrăm tơ drong jang mă lăp lơ̆m chăl kơ măy kơ mŏk ‘nao 4.0”.

Tơ drong tơm đơ̆ng tơ drong jang kơ tĕh đak atŏk tơ iung mŭk drăm, tơ pôl tơ̆ tơ ring kon kông păng groi kông đơ̆ng 2021-2030 ‘nŏh pơm tơ jur ƀiơ̆ tơ drong ưh hơ tŏ băl găh tơ drong arih xa, iŏk yoa đơ̆ng tơ ring kon kông păng groi kông pơ têng hăm kơ sô̆ jô̆ păh lăp atŭm kơ tĕh đak; truh sơ năm 2025 tơ jur đei 50% kơ sô̆ xăh, pơ lei pơ la mơ mat tat dêh hlŏh, truh sơ năm 2030 ưh pă đei xăh, pơ lei pơ la mơ mat tat dêh hlŏh.

Kiơ̆ Phó Thủ tướng Trương Hòa Bình, lơ̆m khei ‘năr jĭ COVID- 19 oei hơ nơ̆ng ƀơm kơ nê̆ truh rim tơ drong arih xa, mŭk drăm, tơ pôl, Tơ drong jang tơm kơ tĕh đak găh hơ drĕch kon kông păng tơ ring kon kông đei năng tôch gĭt kăl, vă tơ gop tơ iung tơ drong jang xa, tĕch mơ dro, chă tơ drong jang hai, jĭ tơ drong tôch gĭt kăl găh tơ drong vei sơ đơ̆ng arih xa tơ pôl hai, mă loi ‘nŏh hăm dôm bơ ngai ưh pŭn ai, dôm unh hnam tơ nuh, unh hnam mơ mat tat tơ̆ dôm tơ ring hơ tăih yăih...

Dơ̆ng: Tơ blơ̆