VOV4.Bahnar – Pơm kiơ̆ Tơchơ̆t đơ̆ng Thủ tướng Teh đak, Anih tơm KO\ng ang tŏk bŏk oei tơlĕch bơ̆ theh kăng kươk kon pơlei chô̆ chĭp ăn kon pơlei lơ̆m jâ̆p teh đak. Kăng kươk kon pơlei pơtăl ăn hla bar chư̆ng minh kon pơlei, iŏk yua vă pơm jang găh hla bar kăl lơ̆m jâ̆p teh đak Việt Nam. Đơ̆ng năr 1/7/2021, adrin keh đang tơdrong bơ̆ 50 trĭu theh kăng kươk kon pơlei chô̆ chĭp, vă hơtŏk kơjăp tơdrong vei hơlen đơ̆ng teh đak găh kăng kươk kon pơlei, pơm trong hiôk ăn kon pơlei chă bơ̆ hla bar hành chĭn păng dôm tơdrong kăl kơ kon pơlei; tơrĕk truh pơjing Jơnŭm pơgơ̆r điê̆n tưh, pơm trong hơtŏk mŭk drăm – tơpôl kơ jâ̆p teh đak; tơgop pơhiôk ăn tơdrong tang găn păng tơjră tơdrong pơm kơnê̆. Thoi noh, kăng kươk kon pơlei noh yă kiơ? Hla bar kăl vă bơ̆ theh kăng kươk kon pơlei đei bơ̆ thoi yơ? Anih jang yơ đei xơnong gơh bơ̆ theh kăng kươk kon pơlei? Kon pơlei đei xơnong pơyua păng xơnong jang kiơ hăm theh kăng kươk kon pơlei. Păng kơlih kiơ athei bơ̆ Theh Kăng kươk chô̆ chĭp adrol kơ năr  01/7/2021.

Kăng kươk kon pơlei jing minh lơ̆m dôm kơloăi hla bar pơkăp dơh hơkâu po đơ̆ng kon pơlei Việt Nam. ‘Nâu jing trong pơkăp ‘nao găh hla bar chư̆ng minh kon pơlei, pơtơm axong păng iŏk yua đơ̆ng xơnăm 2016. Kiơ̆ Khôi luơ̆t Kăng kươk kon pơlei xơnăm 2014 bơngai đơ̆ng 14 xơnăm tŏk tơ̆ kơpal gô đei axong ăn theh Kăng kươk kon pơlei.

Kăng kươk kon pơlei đei kơjă pơkăp găh kăng kươk, tơdrong erih kon pơlei kơ bơngai đei axong ăn vă chă pơm jang găh hla bar hanh chĭn lơ̆m jâ̆p teh đak Việt Nam, gơh yua pơtăl kơ hô̆ chĭu lơ̆m tơdrong mă Việt Nam păng minh teh đak nai đei pơkăp dăh mă tơchơ̆t apŭng plenh teh axong kon pơlei ƀar teh đak gơh yua theh Kăng kươk kon pơlei pơtăl kơ yua hô̆ chĭu.

Xơnăm 2016, Việt Nam pơtơm tơplih hla bar chư̆ng minh hăm theh kăng kươk kon pơlei đei trong chrek. Truh blŭng xơnăm 2021, theh kăng kươk kon pơlei chô̆ chĭp dang ei đei 12 kơsô̆. Kơsô̆ theh kăng kươk kon pơlei noh jing kơsô̆ pơkăp ăn kơdih tơ ‘ngla bơngai. Kiơ̆ Tơdrong pơkăp 13 lơ̆m Tơchơ̆t 137/2015/NĐ-CP đơ̆ng Jơnŭm pơgơ̆r teh đak, dôm kơsô̆ pơkăp 12 kơsô̆, đei pơkăp noh 6 kơsô̆, lơ̆m noh 03 kơsô̆ mă blŭng noh pơkăp dêh char, plei tơm mă trung ương vei lăng dăh mă kơsô̆ pơkăp teh đak, anih mă kon pơlei chih măt khai sinh; 1 kơsô̆ pơtoi kơ noh jing pơkăp anglŏ xơnăm rơneh păng pơkăp găh drŏnglo drăkăn; 2 kơsô̆ pơtoi noh pơkăp xơnăm rơneh kơ kon pơlei păng 6 kơsô̆ mă hơtuch noh kơsô̆ ưh đei pơkăp kiơ.

Pơtih: kơsô̆ kăng kươk kon pơlei noh: 037153000257 noh vă akhan:

Kơsô̆ 037 noh kơsô̆ pơkăp ăn dêh char Ninh Bình

Kơsô̆ 1 noh pơtih ăn đe drăkăn, rơneh ăh anglŏ xơnăm 20

Kơsô̆  53 noh pơtih ăn bơngai rơneh 1953

Kơsô̆ 000257 jing kơsô̆ hlôi pơkăp. Kơsô̆ pơkăp lơ̆m theh kăng kươk kon pơlei ưh lai yơ gơh tơplih, jô̆ hloi hăm bơngai đei axong hơdrăp kơyuơ hiong, dăh mă tơplih găh anih oei xa kơ po.

Dang ei, jô̆ hloi theh Kăng kươk kon pơlei chô̆ chip noh tŏk bŏk oei đei 4 kơloăi hla bar tơ ‘ngla đei iŏk yua nhen băl, noh jing hla bar Chư̆ng minh 9 kơsô̆, hla bar Chư̆ng minh 12 kơsô̆, Theh Kăng kươk kon pơlei đei trong chrek păng Theh Kăng kươk kon pơlei chô̆ chĭp . KIơ̆ tơchơ̆t đơ̆ng khôi luơ̆t teh đak noh hla bar Chư̆ng minh 9 kơsô̆ oei khei năr yua lơ̆m 15 xơnăm jô̆ đơ̆ng năr axong, oei Theh Kăng kươk kon pơlei noh athei tơplih ăh kơdih kâu tôm 25 xơnăm, 40 xơnăm păng 60 xơnăm. Mưh hla bar chư̆ng minh, kăng kươk kon pơlei duh oei khei năr yua noh kon pơlei duh oei gơh pơtoi yua. Teh đak bơ̆n tŏk bŏk oei tơrĕk truh tơdrong tôm kon pơlei yua drơ̆ng minh kơloăi hla bar noh Theh kăng kươk kon pơlei chô̆ chĭp.

Tơl nơ̆r apinh găh tơdrong mă kon pơlei hăm kăl athei vih trŏ anih po chih măt (hô̆ khẩu) vă bơ̆ hla bar tơplih Theh Kăng kươk kon pơlei chô̆ chip ưh? Thươ̆ng tă Tô Anh Dũng, Kơdră Anih vei răk hla bar kăp gĭt kơ teh đak găh kon pơlei, lơ̆m Anih tơm Kŏng ang ăn tơbăt: “Dang ei, Anih tơm Kŏng ang tŏk bŏk oei pơgơ̆r Anih jang Kŏng ang 63 dêh char, plei tơm găh tơdrong bơ̆ Kăng kươk kon pơlei chô̆ chĭp điê̆n tưh ăn bơngai oei tơdăng. Kon pơlei gơh năm truh anih tơjê̆ hloh vă bơ̆ Kăng kươk kon pơlei mă ưh kơ kăl chôt vih tơ̆ anih chih măt hô̆ khẩu”.

Bơngai yơ đei axong bơ̆ adrol?: 

- “Anih tơm Kŏng ang tŏk bŏk oei hơvơn tôm kon pơlei năm bơ̆ lơ̆m ‘măng âu kơlih kăng kươk kon pơlei chô̆ chip điê̆n tưh gô ‘măn ăn tơdrong pơm jang vă pơkăp tơjur ƀiơ̆ tơdrong tơnap găh hla bar hanh chĭn, mă tơdrong tơm đơ̆ng Anih tơm Kŏng ang noh vă pơm jang ăn kon pơlei gơh tenh hloh mă tơjur ƀiơ̆ tơdrong tơhlăk tơhlĭn găh dôm hla bar ưh kơ kăl”.

Mưh minh ‘nu kon pơlei ‘nao bơ̆ đang theh kăng kươk kon pơlei đei pơkăp chrek noh hăm kăl bơ̆ theh kăng kươk đei chô̆ chĭp dăh mă ưh?

-  “Hla bar Chư̆ng minh kon pơlei dăh mă Kăng kươk kon pơlei 12 kơsô̆ xo noh duh oei gơh yua ƀơ̆t oei khei năr pơkăp yua”

Kơlih kiơ Kŏng ang dôm dêh char, plei tơm athei bơ̆ hăt hot lơ̆m ‘măng mă âu, bơ̆ ăh kơmăng, kơ ‘năr thoi âu?

-  “Tơdrong tơm đơ̆ng Anih tơm Kŏng ang noh adrin bơ̆ 50 trĭu tŏ theh kăng kươk kon pơlei chô̆ chĭp điê̆n tưh truh năr 1/7/2021. Nhen bơ̆n hlôi băt ăh năr 1/7/2021 noh Luơ̆t Oei xa đei iŏk yua păng dôm tơdrong jang găh kon pơlei pơkăl pơm hiôk găh hla bar hanh chĭn. Đơ̆ng rŏng kơ năr 1/7/2021, Anih tơm Kŏng ang gô pơtoi hăm dôm Anih jang tơm, rim anih jang, yuơ noh vă pơm jang tơnăp găh Jơnŭm pơgơ̆r điê̆n tưh, hơyak truh Jơnŭm pơgơ̆r kơsô̆ păng tơdrong jang mŭk drăm kơsô̆ noh Anih tơm Kŏng ang hlôi pơgơ̆r Kŏng ang 63 dêh char plei tơm hơtŏk bơ̆ theh kăng kuơk kon pơlei chô̆ chĭp điê̆n tưh đơ̆ng dang ei truh năr 1/7/2021 vă ‘măn pơm jang ăn kon pơlei”.

Lan chih păng pơre nơ̆r