VOV4.Bahnar - Lơ̆m jơ bơ̆ jang tơ̆ hop akŏm mă 4 giĕng âu ki, mưh tơ gop nơ̆r găh tơ drong tơ proh trong iŏk yoa tĕh kơ tĕh đak đơ̆ng 2021 - 2030, trong jang truh sơ năm 2050 păng trong iŏk yoa tĕh 05 sơ năm (2021-2025), Anih chĕp kơ̆l pơ gơ̆r Kuô̆k hô̆i tam mă asong ăn Dơ nŏ anih vei lăng kon pơ lei dêh char gơh tơ plih ming tơ drong iŏk yoa tĕh hăm tĕh chun na, tĕh bri ‘long tang găn sar bar, tĕh bri kơ drơ̆ng, tơ drong ‘nâu athei tơ roi ăn Thủ tướng tĕh đak set hơ len, kĭ tơ chơ̆t.

Kơ dră tơm vei lăng tơ mam drăm păng cham char Trần Hồng Hà ăn tơ băt, tơ drong tơm đơ̆ng tơ prŏh hơ met ‘nŏh vă ‘măn răk tĕh pơm lăp hăm tơ drong ‘mĕh vă jang atŏk tơ iung anih jang, trong nơ năm hrơ̆ch ‘lơ̆ng, tơ ƀưh rim anih jang, tơ ring tơ rang, tơ drong jang mŭk drăm păng dôm tơ ring jang tŏk tơm kơ tĕh đak; vei kơ jăp 3,5 triu ha chŭn na ƀa đak; vei lăng kơ jăp yơ̆p bri ‘long đơ̆ng 42 - 43%. Anih chĕp kơ̆l pơ gơ̆r Kuô̆k hô̆i akhan, mă tơ pă tơ̆ 1,2 tơ ring, tơ drong iŏk yoa chŭn na rei pơ tăm ƀa vă pơ tăm dôm kơ loăi ‘long nai dăh mă rong ka hơ dang oei tôch đei yoa găh mŭk drăm.

Tơ gŭm ăn nơ̆r athei tơ plih ming ‘long pơ tăm tơ̆ chŭn na, Kơ dră vei lăng jên hu – Anih mong jên Nguyễn Phú Cường ăn tơ băt: “Dang ei vei chŭn na rei pơ tăm ƀa, vei sơ đơ̆ng tơ mam xa. ‘Ngoăih kơ tĕh rei pơ tăm ƀa gơ̆h tơ plih đơ̆ng rei pơ tăm ‘long kiơ̆ sơ năm jing pơ tăm ‘long đunh sơ năm. Kăl vei lăng tĕh rei pơ tăm ƀa tơ̆ tơ ring tĕh tơ măn đak krong Cửu long. Tĕh rei pơ tăm ƀa rim sơ năm 1 ha kon pơ lei iŏk đei đơ̆ng 50 - 70 triu hlak jên. Mă lei tơ dăh tơ plih, pơ tăm ‘long nai ‘nŏh đei iŏk yoa đơ̆ng 500 - 700 triu hlak jên”.

Mă lei dôm bơ ngai tang măt akhan, tơ drong iŏk tĕh rei pơ tăm ƀa vă pơ yoa ăn tơ dỏng jang nai kŭm tôch mơ mat. Athei chih hơ dăh tơ drong hơ găt asong tơ plih ming, tơ ring vă tơ plih ming, tơ ring ưh gơ̆h tơ plih. Tơ tăm hăm nơ̆r pơ ma đơ̆ng Khul kơ dră tĕh đak găh asong ăn Dơ nŏ anih vei lăng kon pơ lei dêh char gơ̆h tơ plih ming tĕh rei pơ tăm ƀa, tĕh bri’long tang găn sar bar, tĕh bri kơ drơ̆ng mă ưh đei tơ roi ăn Thủ tướng tĕh đak, Kơ dră Anih jang luơ̆t kơ Kuô̆k hô̆i Hoàng Thanh Tùng akhan, tơ drong hơ găt thoi âu ưh đei lei lăi hăm tơ drong hơ găt lơ̆m luơ̆t tĕh:

“Pơ jao hơ năp jang ăn Dơ nŏ anih vei lăng kon pơ lei dêh char gơ̆h tơ chơ̆t tơ plih ming tơ drong yoa tĕh rei pơ tăm ƀa hlŏh 10 ha. Tĕh bri ‘long tang găn sar bar, bri kơ drơ̆ng hlŏh 20 ha. Kiơ̆ tơ drong hơ găt đơ̆ng Luơ̆t tĕh ‘nŏh yoa Thủ tướng kĭ, dang ei pơ jao ăn Dơ nŏ anih vei lăng kon pơ lei dêh char ‘nŏh sư pha hăm luơ̆t, jing ưh trŏ hăm luơ̆t tĕh. Tơ dăh hơ la kơ 10 ha tĕh rei pơ tăm ƀa, hơ la 20 ha hăm tĕh bri ‘long tang găn sar bar, bri kơ drơ̆ng, tơ ring gơ̆h tơ plih ming tơ drong yoa tĕh mă lei athei tơ roi ăn Jơ nŭm pơ gơ̆r kon pơ lei đơ̆ng rŏng kơ ‘nŏh Dơ nŏ anih vei lăng kon pơ lei gơ̆h bơ̆ jang. Oei dang ei bơ̆n asong ăn Dơ nŏ anih vei lăng kon pơ lei dêh char jang đang kơ ‘nŏh tơ roi ăn Thủ tướng thoi nŏh sư ưh kơ trŏ, ưh đei lăp hăm tơ drong hơ găt lơ̆m Luơ̆t tĕh”.

Anih chĕp kơ̆l pơ gơ̆r Kuô̆k hô̆i athei vei kơ jăp tĕh rei pơ tăm ƀa tơ plih jing tĕh pơ tăm ‘long nai vă huei phă pơ răm tơ drong hơ găt hăm tĕh rei pơ tăm ƀa, mưh kăl ‘nŏh gơ̆h iŏk rei pơ tăm ƀa dơ̆ng, găn tôch ai tơ drong tơ plih tĕh rei pơ tăm ƀa tơ̆ dôm tơ ring rei pơ tăm ƀa tơm vă pơ tăm ming ‘long nai, pơm ‘lơ̆ng ăn tơ drong hơ găt jang atŏk tơ iung bri ‘long, đei yoa tơ klep hăm tơ drong pơ tăm ‘long bri, atŏk tơ iung mŭk drăm đơ̆ng bri păng vei lăng cham char.

Găh nơ̆r athei asong ăn Dơ nŏ anih vei lăng kon pơ lei dêh char tơ plih ming tơ drong yoa tĕh rei pơ tăm ƀa, tĕh bri ‘long tang găn sar bar, bri ‘long kơ drơ̆ng mă ưh đei tơ roi ăn Thủ tướng tĕh đak kiơ̆ tơ drong hơ găt đơ̆ng Apăng 58 Luơ̆t tĕh, Anih chĕp kơ̆l pơ gơ̆r Kuô̆k hô̆i akhan, ‘nâu jĭ 1 tơ drong tơ plih tih kăl đei chih akŏm mă tôm, hơ len năng mă rơ đăh. Ƀât mă Khul kơ dră tĕh đak oei pơ tho chih akŏm rim tơ drong bơ̆ jang đei vă hơ met ming Luơ̆t tĕh, ‘nŏh tam kăl pơ ma truh tơ drong ‘nâu lơ̆m hla ar tơ chơ̆t ôh. Tơ dăh kăl Khul kơ dră tĕh đak athei chih akŏm, hơ len năng đang kơ ‘nŏh tơ roi ăn Kuô̆k hô̆i mưh pơ gơ̆r hơ met ming Luơ̆t tĕh tơ̆ hơ năp kơnh.

Găh dôm trong vei lăng, iŏk yoa tĕh tơ̆ hơ năp kơnh, Kơ dră Kuô̆k hô̆i Vương Đình Huệ athei: “Trong jang tơ̆ hơ năp kơnh ‘nŏh athei tơ mât yoa kơ măy kơ mŏk ‘nao vă vei lăng tĕh. Yoa tơ drong vei lăng tĕh ‘nŏh jĭ tơ drong tơm vă dăr lăng đơ̆ng Kuô̆k hô̆i mư̆h bơ̆ jang kiơ̆ trong ‘mơ ‘met, tang găn pơ huach kư̆ kă. Truh âu kơnh kơ sô̆ chih jô̆ găh tĕh athei mă rơ đăh, năm truh tơ̆ rim tơ ring đei dăr lăng. Kơ sô̆ chih mă ưh kơ lăp hăm kơ sô̆ chĕng tơ proh hơ drol ‘nŏh ưh gơ̆h ôh. Tôch hơ nat vă gơ̆h băt hơ dăh”.

 Lại Thị Hoa: Chih

Dơ̆ng: Tơ blơ̆