VOV4.Bahnar - Jei lơ̆m năr 9/11, Kuô̆k hô̆i hơnơ̆ng chă pơma dơnŭh găh rim tơdrong jang tang găn jĭ Covid-19. Rim kơdră tang măt hôn bơnê dôm trong tơlech jang đơ̆ng Khŭl kơdră tĕh đak lơ̆m tang găn jĭ hơbŭh Covid-19 vă erĭh sa pơm joăt ‘lơ̆ng hơ iă lơ̆m chăl hle; hơdrin atŏk kơtang pơma dơnŭh găh vaccine, pơgang ming hơmet. Mă lei, mĭnh ƀar ‘nu kơdră tang măt akhan: Bơ̆ jang tơdra hơdrol jĭ hơbŭh Covid-19, pơrô̆ tang găn jĭ tơ̆ mĭnh ƀar tơring oei mơ suơ̆l mơsoăl, tơdrong pơjing mĭnh ƀar tơdrong tơchơ̆t bơ̆ jang tơ̆ mĭnh ƀar tơring oei tim mă lăp, pơm tơnap tap ăn chă yơ yak, chơ pơdŭ tơmam drăm. Lơ kơdră tang măt athei Khŭl kơdră Tĕh đak kăl: hrôih hơlen dơ̆ng mĭnh ƀar tơdrong tơchơ̆t pơ gia găh tơdrong erĭh sa pơm joăt ‘lơ̆ng hơ iă, sơđơ̆ng, tang găn jơnei vă đei trong hơmet ming trŏ lăp hăm chăl hle. Pơma trŭh tơdrong hŏk pơhrăm trư̆k tuyên lơ̆m khei ‘năr jĭ hơbŭh Covid-19, mĭnh ƀar ‘nu kơdră tang măt akhan: tơdrong hŏk trư̆k tuyên ‘nŏh trong tôch kơ lăp, sơđơ̆ng ăn bơngai hŏk lơ̆m khei ‘năr đei jĭ hơbŭh Covid-19 pơrăm kơtang mă lei oei đei tơdrong tim mă lăp nhen tơdrong ‘lơ̆ng hơ iă lơ̆m pơtho păng hŏk pơhrăm tim gan trŏ; kmăi kmŏk iŏk yua chă pơ yua ăn pơtho păng hŏk pơhrăm oei kơ ƀăh kơ bôch, tơdrong vei lăng năng tông hŏk tro tim mă ‘lơ̆ng.

Tơblơ̆ nơ̆r: Amazưt