VOV4.Bahnar - Anih chĕp kơ̆l pơ gơ̆r khul linh dêh char Lâm Đồng ‘nao kĭ jang hơ doi hăm Anih pơ gơ̆r khul lui phât Việt Nam dêh char Lâm Đồng. Tơ drong jang hơ doi âu gô vei kơ jăp ƀiơ̆ tơ drong pơ vei ‘lơ̆ng hơ iă đơ̆ng linh hăm kon pơ lei, tơ iung tơ drong tơ guăt đĭ đăng hơ drĕch hơ drung. Atŭm hăm ‘nŏh jing tơ drong kăl vă hơ nơ̆ng jang ‘lơ̆ng tơ drong “Krao hơ vơn kon pơ lei rơ gei” păng “Krao hơ vơn kon pơ lei rơ gei lơ̆m tơ drong jang pơ jing tơ ring tơ rang ‘nao”.

Lơ̆m dôm sơ năm âu ki, dêh char Lâm Đồng hơ nơ̆ng tơ rĕk truh tơ drong lui khop. Kiơ̆ đơ̆ng noh, pơ jing tơ drong pơ vei ‘lơ̆ng hơ iă, hlôh vao băl đơ̆ng dôm tơ drong lui khop hăm dôm anih jang kơ pal păng khul kơ dră tơ ring. Tơ drong ‘nŏh tơ ƀôh hơ dăh trong jang tôch trŏ găh tơ drong lui khop đơ̆ng Đảng păng tĕh đak; kon pơ lei kiơ̆ lui khop jĭ 1 păh ưh gơ̆h tơ plĕh lơ̆m tơ drong tơ guăt đĭ đăng hơ drĕch hơ drung.

 Lui phât hăm khul linh đơ̆ng sơ̆ truh dang ei hơ nơ̆ng yak hơ doi lơ̆m lơ tơ drong jang. Tơ drong yak hơ doi ‘nŏh vang vei kơ jăp tơ drong sơ đơ̆ng chinh trĭ, sơ đơ̆ng lơ̆m tơ pôl. Atŭm hăm ‘nŏh, pơm pơ ‘lơ̆ng um rup Ƀô đô̆i Ƀok Hô lơ̆m jơ hngâm đon kon pơ lei. 

Anih chĕp kơ̆l pơ gơ̆r khul linh dêh char Lâm Đồng năm ngôi păng hơ iă hăm Hnam chuơ Linh Quang, plt Đà Lạt ƀlep ƀât lêh Vu Lan

 Bơ̆ jang kiơ̆ nơ̆r pơ tho đơ̆ng Quân ủy Trung ương păng trong jang đơ̆ng anih jang Đảng Quân khu 7 găh hơ nơ̆ng tơ plih ‘nao păng hơ tŏk tơ drong chĕp kơ̆l pơ gơ̆r khul linh bơ̆ jang tơ drong jang ƀơm truh tơ drong lui khop lơ̆m chăl ‘nao, Anih chĕp kơ̆l pơ gơ̆r khul linh dêh char Lâm Đồng kĭ pơ kăp jang hơ doi hăm Anih pơ gơ̆r khul lui phât Việt Nam dêh char ƀât blŭng khei 4 âu ki.

Đại tá Trần Văn Khương - Chính ủy Anih chĕp kơ̆l pơ gơ̆r khul linh dêh char Lâm Đồng pơ ma hơ dăh: “Tơ drong kĭ pơ kăp jang hơ doi âu vă hơ nơ̆ng pơm hơ tŏk tơ drong pơ vei, tơ guăt đĭ đăng hơ drĕch hơ drung, pơ jing păng hơ met kơ jăp đon lui, pơ vei ‘lơ̆ng hơ iă đơ̆ng khul linh dêh char hăm Anih pơ gơ̆r tơ drong lui phât Việt Nam dêh char; tưk tơ iung tơ drong jang đơ̆ng Khul lui phât Việt Nam dêh char Lâm Đồng lơ̆m tơ drong pơ jing păng vei lăng tĕh đak. Kiơ̆ đơ̆ng nŏh vang vei kơ jăp tơ drong sơ đơ̆ng chinh trĭ, sơ đơ̆ng tơ pôl păng jang atŏk tơ iung mŭk drăm, jŏh ayŏ kơ dŏ xoang, tơ pôl tơ̆ dêh char”.

Kiơ̆ kơ ‘nŏh, tơ drong jang hơ doi đơ̆ng 2021 - 2025 đei: roi tơ băt tơ drong vei lăng sơ đơ̆ng tĕh đak ăn đe ƀok pơ tho, bơ ngai kiơ̆ lui; roi tơ băt trong jang đơ̆ng Đảng, tơ drong tơ gŭm, khôi luơ̆t tĕh đak, tơ drong vei sơ đơ̆ng tĕh đak dang ei, trong tơ ƀôh đon tơ chĕng ăn đe ƀok pơ tho, bơ ngai kiơ̆ lui khop… Jang hơ doi vang roi tơ băt, krao hơ vơn druh dăm jĭ kon hơ ‘lơ̆p bơ ngai kiơ̆ lui khop pơm kiơ̆ ‘lơ̆ng Luơ̆t năm pơm linh. Vang pơ gơ̆r roi tơ băt dôm tơ drong kăl dang ei vă đe ƀok pơ tho, bơ ngai kiơ̆ lui khop băt hơ dăh, vang tơ jră plơ̆ dôm nơ̆r pơ ma kư̆ kă, phă ngơ̆r đơ̆ng khul hơ yăt, iŏk yoa dôm tơ drong ƀơm truh lui phât vă phă ngơ̆r. Pơ gơ̆r ăn ƀô đô̆i năm bơ̆ jang tơ gŭm ăn kon pơ lei, bơ ngai kiơ̆ lui phât tơ̆ tơ ring hơ tăih yăih sut pơ ngot, tơ jur tơ nuh hin. Pơ gơ̆r tơ ƀâp, pơ ma nuh, ngôi pơ chơt lơ̆m dôm năr lêh tih kơ khul linh păng tơ drong lui phât. Jang hơ doi ‘lơ̆ng dôm tơ drong nhen “Man hnam tơ gŭm linh – kon pơ lei”, “Hnam tơ gŭm ăn bơ ngai mơ mat tat” ăn dôm bơ ngai kiơ̆ lui đei tơ drong arih xa mơ mat tat, man lơ anih pơ yoa ăn hŏk hôp, jŏh ayŏ kơ dŏ xoang, tơ plŏng kơ dâu tơ̆ dôm hnam chuơ.  

Ƀok chuơ Thích Thanh Tân – Kơ dră chĕp kơ̆l Anih pơ gơ̆r lui phât Việt Nam dêh char Lâm Đồng pơ ma hơ dăh, khul lui phât Việt Nam dêh char vă tơ lĕch jang hrơ̆ch ‘lơ̆ng, tôm tơ drong jang hơ doi đơ̆ng dêh char truh tơ̆ apŭng. Kon pơ lei lui phât kŭm hơ nơ̆ng chă tơ gŭm ăn kăn ƀô̆, linh dêh char bơ̆ jang dôm tơ drong jang kơ dih kĕ jang.

 Đại tá Nguyễn Công Anh – Phŏ Kơ dră vei lăng chinh trĭ Quân khu 7 tơ chĕng ‘lơ̆ng tơ drong jang hơ doi, atŭm hăm ‘nŏh pơ ma hơ dăh Anih chĕp kơ̆l pơ gơ̆r khul linh dêh char Lâm Đồng jĭ 1 lơ̆m dôm anih năm hơ drol lơ̆m tơ drong jang ‘nâu tơ̆ Quân khu 7. Tơ̆ âu mơ̆n, ‘ngoăih kơ pơ ma truh dôm tơ drong jang kăl bơ̆ jang hloi đơ̆ng rŏng kơ kĭ pơ kăp, Phŏ Kơ dră vei lăng chinh trĭ Quân khu 7 pơ ma hơ dăh tơ drong athei jang ‘lơ̆ng tơ drong roi tơ băt vă tơ ƀôh rơ đăh hlŏh dơ̆ng tơ drong jang, hơ năp jang đơ̆ng khul linh păng khul lui phât tơ̆ găh Pơ băh Tây Nguyên.

 Kơ dră Anih krao hơ vơn kon pơ lei dêh char Lâm Đồng Phạm Thị Phúc tơ ƀôh tơ drong hơ iă păng lui kiơ̆ tơ drong kĭ pơ kăp jang hơ doi đơ̆ng Anih chĕp kơ̆l pơ gơ̆r khul linh dêh char hăm Anih pơ gơ̆r tơ drong lui phât Việt Nam dêh char Lâm Đồng. Hơ mĕng, tơ drong jang hơ doi gô hơ met kơ jăp hlŏh dơ̆ng tơ drong pơ vei đơ̆ng linh hăm kon pơ lei, tơ iung jơ hngâm đon tơ guăt đĭ đăng hơ drĕch hơ drung. ‘Nŏh gô jing tơ drong kăl vă hơ nơ̆ng bơ̆ jang ‘lơ̆ng tơ drong “Krao hơ vơn kon pơ lei rơ gei” păng Krao hơ vơn kon pơ lei rơ gei mưh bơ̆ jang pơ jing tơ ring tơ rang ‘nao”. Khul linh păng khul lui phât vă hơ nơ̆ng yak hơ voi vang bơ̆ jang ‘lơ̆ng tơ drong pôk rơih bơ ngai tang măt Kuô̆k hô̆i jăl XV păng bơ ngai tang măt Jơ nŭm pơ gơ̆r kon pơ lei jơ̆p tơ ring đơ̆ng 2021 - 2026 truh âu kơnh.

Dơ̆ng: Tơ blơ̆