VOV4.Bahnar - Giĕng âu ki, Hop akŏm mă 2, Kuô̆k hô̆i jăl XV pơ gơ̆r kiơ̆ trong trư̆k tuyê̆n hăm Anih pơ dăh đơ̆ng Hnam Kuô̆k hô̆i truh tơ̆ 62 Khul tang măt Kuô̆k hô̆i dôm dêh char, plt găh Trung ương. Kŭm hăm tơ drong chih pơ jing luơ̆t, hop akŏm âu, Kuô̆k hô̆i oei ‘măn lơ jơ vă set hơ len dôm tơ drong găh mŭk drăm, tơ pôl, jên thu mong, tơ lĕch jang kơ tĕh đak, dăr lăng păng tơ chơ̆t dôm tơ drong kăl nai. Giĕng âu ki, Khul tang măt Kuô̆k hô̆i dôm dêh char tơ̆ tơ ring Tây Nguyên vang pơ ma nuh tôch tơ năp găh lơ tơ drong tơ̆ hop akŏm; lơ̆m nŏh đei lơ nơ̆r pơ ma ƀơm truh lơ tơ drong tơ̆ tơ ring.

Đơ̆ng rŏng mơ̆ng Hla ar tơ roi găh tơ drong tơ chơ̆t  1,2 trong jang, tơ drong tơ gŭm hơ drô̆ vă atŏk tơ iung dôm dêh char, plt: Hải Phòng, Nghệ An, Thanh Hóa păng Thừa Thiên Huế păng Hla ar hơ len năng tơ drong tơ chơ̆t găh 1,2 trong jang, tơ drong tơ gŭm hơ drô̆ vă atŏk tơ iung dôm dêh char âu, Khul tang măt Kuô̆k hô̆i dêh char Dak Lak pơ ma nuh, lăp đon păng drơ̆ng nơ̆r ăn dôm hla ar chih. Tơ gop thim nơ̆r ăn tơ drong ‘nâu, Khul tang măt Kuô̆k hô̆i dêh char Dak Lak akhan, tơ drong chih tơ roi đơ̆ng Khul kơ dră tĕh đak ‘nŏh tôch kăl. Dôm hla ar chih tơ roi tôch kơ jăp. Tơ dăh tơ drong tơ chơ̆t đei drơ̆ng nơ̆r gô pơ jing đei tơ drong ‘lơ̆ng ăn dôm tơ ring jang tŏk păng iŏk ‘lơ̆ng dôm tơ drong pran tơ̆ tơ ring kơ dih. Mă lei, athei tơ rĕk truh tơ drong đei yoa mưh bơ̆ jang.

Khul tang măt Kuô̆k hô̆i dêh char Dak Lak vang pơ ma nuh lơ tơ drong tơ̆ hop akŏm

Bơ ngai tang măt Y Vinh Tơr, Kơ dră chĕp kơ̆l Khul tang măt Kuô̆k hô̆i dêh char Dak Lak đei nơ̆r pơ ma: “Tơ drong đei yoa mưh bơ̆ jang athei tơ klep hăm jơ năr ‘nŏh jĭ đơ̆ng blŭng sơ năm 2022 vă pơ jing tơ drong ‘lơ̆ng ăn dôm tơ ring đei khei ‘năr jang tŏk. Kơ lih yoa tơ̆ âu jĭ dôm trong jang pơ long năng, 1,2 tơ drong tơ gŭm hơ drô̆ kŭm chih mă hơ dăh khei ‘năr hai. Lơ̆m hla ar chih hơ len năng kŭm đei chih truh đĭ sơ năm 2025 ‘nŏh lăp vă tơ lĕch dôm tơ drong tơ gŭm mă lăp kiơ̆ khei ‘năr. Thoi nŏh truh khei ‘năr dŏh kơnh bơ̆n hơ len năng tơ drong tơ gŭm yơ đei yoa, lăp ‘nŏh bơ̆n pơih xă, chih tơ lĕch jing tơ drong tơ gŭm atŭm ăn dôm tơ ring vă pơ jing đei tơ drong ‘lơ̆ng pơ yoa ăn tơ drong jang tŏk lơ̆m chăl ‘nao.”

Vang pơ ma nuh găh tơ drong tơ gŭm jang ƀao hiêm tơ pôl, Khul tang măt Kuô̆k hô̆i dêh char Kon Tum athei hơ nơ̆ng tơ gŭm ƀao hiêm y tê̆ ăn bơ ngai ưh đei jên răt kơ dih. ‘Nâu jĭ tơ drong tôch kăl tơ gŭm ăn kon pơ lei, mă loi jĭ kon pơ lei kon kông gơ̆h sơng iŏk tơ drong khăm hơ met jĭ, vei lăng jơ hngâm pran, tơ jur ƀiơ̆ tơ drong mơ mat tat găh jên hu. Ƀok Phạm Đình Thanh, Phŏ Kơ dră chĕp kơ̆l Khul tang măt Kuô̆k hô̆i dêh char Kon Tum tơ roi, ‘nŏh jĭ đơ̆ng rŏng kơ Thủ tướng tĕh đak tơ lĕch tơ drong Tơ chơ̆t kơ sô̆ 861 kĭ ăn hơ năn dôm xăh tơ ring III, tơ ring II, tơ ring I găh tơ ring kon kông păng groi kông đơ̆ng 2021-2025, kơ sô̆ bơ ngai đei jên tĕh đak tơ gŭm răt ƀao hiêm y tê̆ kơ dêh char jur tôch lơ.

Dăr hơ len năng tơ̆ yăn âu đơ̆ng Khul tang măt Kuô̆k hô̆i dêh char Kon Tum ăn ƀôh, lơ̆m kơ sô̆ dôm bơ ngai oei đei tĕh đak tơ gŭm ƀao hiêm y tê̆, đei lơ bơ ngai tôch mơ mat tat, ưh đei jên vă răt ƀao hiêm y tê̆ ăn kơ dih păng unh hnam. Kăl loi, dôm bơ ngai âu mă lơ ‘nŏh jĭ bơ ngai kon kông ngăl. Lơ̆m kơ sô̆ hlŏh 51.800 ‘nu kon pơ lei Kon Tum ưh pă đei tĕh đak tơ gŭm ƀao hiêm y tê̆ đei hlŏh 49.300 ‘nu ‘nŏh jĭ kon pơ lei kon kông, iŏk đei hlŏh 95%.

Tơ̆ hơ năp tơ drong ‘nâu, bơ ngai tang măt Phạm Đình Thanh đei nơ̆r pơ ma: “Khul kơ dră tĕh đak, Thủ tướng tĕh đak athei pơ tho ăn dôm anih tơm, anih jang kơ pal đei ƀơm truh jăh hơ len năng mă trŏ tơ drong ‘nâu vă tơ tom tơ lĕch dôm tơ drong tơ gŭm mă lăp, hơ nơ̆ng tơ gŭm ƀao hiêm y tê̆ ăn kon pơ lei tơ ƀâp mơ mat tat lơ̆m tơ drong arih, ưh đei jên vă răt ƀao hiêm y tê̆ ăn kơ dih; vă tơ gŭm ăn kon pơ lei, mă loi jĭ kon pơ lei kon kông gơ̆h khăm hơ met jĭ, vei lăng jơ hngâm pran, tơ jur ƀiơ̆ tơ drong mơ mat tat găh jên hu ăn đe sư, kŭm vă tơ gop pơm hơ tŏk kơ sô̆ bơ ngai kon kông vang răt ƀao hiêm y tê̆, truh sơ năm 2025 đei 98% kon pơ lei kon kông vang răt ƀao hiêm y tê̆ kiơ̆ tơ drong hơ găt mă Tơ drong tơ chơ̆t kơ sô̆ 88, Kuô̆k hô̆i jăl XIV hlôi chih tơ lĕch”.

Khul tang măt Kuô̆k hô̆i dêh char Kon Tum vang hop akŏm

Khul tang măt Kuô̆k hô̆i dêh char Dak Lak ‘nŏh akhan, tơ drong hơ met ming Luơ̆t tĕch mơ dro ƀao hiêm ‘nŏh tôch kăl vă vei lăng tơ drong đei yoa tơ găl, trŏ luơ̆t đơ̆ng dôm khul grŭp, rim bơ ngai vang răt ƀao hiêm; hơ tŏk tơ drong tĕch mơ dro ƀao hiêm; tơ gop tơ iung păng vei kơ jăp tơ drong jang tŏk mŭk drăm, tơ pôl, vei sơ đơ̆ng tơ drong arih xa kơ kon pơ lei; hơ tŏk tơ drong đei yoa mưh vei lăng tĕh đak hăm tơ drong tĕch mơ dro ƀao hiêm. Mă lei, dôm tơ drong tơ gŭm găh tĕch mơ dro ƀao hiêm athei chih mă rơ đăh ƀiơ̆. Kăl loi, dôm hla ar pơ kăp răt ƀao hiêm: lơ tơ drong hơ găt lơ̆m hla ar chih, tơ drong đei yoa nhen vă thuơ kơ dôm anih tĕch ƀao hiêm ngăl, nhen tơ̆ trong 1, Apăng 14 đei chih, dôm pang gơ̆h pơ ma nuh drơ̆ng nơ̆r ăn hla ar pơ kăp, mă tơ pă tơ drong ‘nâu oei ưh kơ lăp.

Bơ ngai tang măt Lê Thị Thanh Xuân, Phŏ Kơ dră chĕp kơ̆l Khul tang măt Kuô̆k hô̆i dêh char Dak Lak đei nơ̆r pơ ma: “Lơ hla ar pơ kăp đei anih tĕch ƀao hiêm chih tơ lĕch hơ drol ngăl bơih. Hăm bơ ngai hlôh vao, đei hŏk jrŭ ‘nŏh tơ drong đŏk păng băt tơ drong hơ găt ‘nŏh đei yoa dăh ưh hăm kơ dih kâu. Mă lei hăm kon pơ lei kon kông, bơ ngai ưh đei hŏk jrŭ nai, tơ drong đŏk păng băt dôm tơ drong hơ găt ‘nŏh ưh kơ lơ. Kơ na kăl đei nơ̆r pơ kăp ‘lơ̆ng đơ̆ng bơ ngai răt păng anih tĕch hai. Nhôn athei tơ rĕk truh hla ar pơ kăp răt ƀao hiêm vă pơm thoi yơ, nơ̆r chih, chư chih lơ̆m hla ar ƀônh hlôh hlŏh. Lơ bơ ngai đŏk ‘nŏh băt hloi. Mă loi jĭ hăm ƀao hiêm vei lăng kon bơ ngai”.

Kŭm tơ̆ jơ pơ ma nuh, dôm bơ ngai tang măt Kuô̆k hô̆i dêh char Dak Lak hlôi tơ gop ăn dôm tơ drong ƀơm truh: kla jên mưh pơ dơ̆h răt ƀao hiêm, sek tơ lang tơ dỏng tơ gar băl ƀao hiêm, tơ drong vei lăng tĕh đak hăm anih tĕch ƀao hiêm tơ̆ tơ ring, pơ gơ̆r pơ tho pơ hrăm ming, hơ tŏk đon hlôh vao, chih tơ băt ăn tơ drong tĕch mơ dro ƀao hiêm vă vei kơ jăp tơ drong jang ‘nâu, găn lê̆ dôm tơ drong tơ kêng tơ hlâu...

Dơ̆ng: Tơ blơ̆