VOV4.Bahnar - Lơ̆m khei ‘năr jĭ hơ buh COVID-19 tŏk bŏk đei ƀôh krê hơ mơt tơ̆ lơ tơ ring lơ̆m teh đak, vă tơ drong jang kla jên vei sơ đơ̆ng tôm, tơ tom, sơ đơ̆ng ăn bơ ngai sa jên khei hưu, tơ gŭm ƀao hiêm tơ pôl, ƀao hiêm tơ pôl Việt Nam athei Kŏng ti tơm Bưu điện Việt Nam păng ƀao hiêm tơ pôl rim dêh char, pơ lei tơm kla jên khei hưu, tơ gŭm ƀao hiêm tơ pôl khei 9 păng khei 10 sơ năm 2021 atŭm kla lơ̆m 1 ‘măng. Kiơ̆ kơ ‘noh, ƀao hiêm tơ pôl rim tơ ring pơ jing trong jang pơ gơ̆r kla jên ăn bơ ngai sa yua iŏk hăm jên măt vei sơ đơ̆ng tang găn jĭ. Tơ drong pơ gơ̆r kla, veh ver akŏm lơ bơ ngai; pơ gơ̆r tơ roi tơ băt ăn bơ ngai sa yua dôm tơ drong tơm tơ plih găh trong kla, hơ nih kla vă bơ̆ jang kiơ̆. ‘Nâu jĭ ‘măng mă 4 lơ̆m sơ năm ‘nâu, ƀao hiêm tơ pôl Việt Nam athei ƀao hiêm tơ pôl rim dêh char, pơ lei tơm jang hơ dai kŭm hăm anih jang Bưu điện pơ gơ̆r kla jên khei hưu, tơ gŭm ƀao hiêm tơ pôl akŏm 2 khei lơ̆m 1 ‘măng kla vă vei sơ đơ̆ng tơ drong đei yua ăn bơ ngai sa yua đei tôm, tơ tom, hơ dai hăm ‘noh tơ gop vei sơ đơ̆ng tang găn jĭ.

Thuem: Tơ blơ̆